Jueces 2 - DIOSPA QHELQACHISQ

Tata Diospa angelnin Boquinpi rikhurin

¹ Uj kuti Tata Diospa angelnenqa Gilgalmanta Boquín nisqa cheqaman rispa, israelitakunata nerqa: Noqaqa Egipto suyumanta orqhomorqaykichej, jinaspataj pusamorqaykichej, ñawpa tataykichejkunaman qonayta nerqani, chay jallp'akama. Chaypacha paykunata nisqani: Mana jayk'ajpis qankunawan tratoyta p'akisajchu.

² Qankunataj amapuni chay llajtayojkunawan ima tratotapis ruwankichejchu, manachayqa lantinkoj altarninkukunata phirirankichej, nispa. Qankunarí mana kasuwarqankichejchu. Imaraykutaj jinata ruwarqankichejri?

³ Chayrayku kunan niykichej: Chay runakunata ñawpaqeykichejmanta mana wijch'usajchu. Aswanpis paykuna tojlla jina qankunapaj kanqanku, jinallataj diosninkupis misk'anaykichejpaj jina kanqa, nispa.

⁴ Tata Diospa angelnin parlayta tukojtinkama, tukuynin israelitakuna sinch'imanta waqayta qallarerqanku.

⁵ Chayrayku chay cheqata suticharqanku Boquín, nispa. Chayllapitaj Tata Diosman uywa ñak'asqa q'olachinakunata jaywarqanku.

Josué wañupun

⁶ Maypachachus Josué jallp'ata rak'iytawan israelitakunata kacharipusqa chaypacha, paykunaqa sapa ujninku jallp'ankuta jap'ikapoj ripusqanku.

⁷ Jinapi paykuna Tata Diosta kasukuspa kawsakusqanku, Josué, chantá payta yanapaj kurajkuna ima kawsanankukama. Chaykuna kasqanku, pikunachus rikusqanku israelitakunapaj Tata Dios t'ukuna imakunata ruwasqanta, chaykuna.

⁸ Chantá Tata Diospa kamachin Nunpa churin Josueqa wañupusqa 110 watayoj kashaspa.

⁹ Israelitakunataj payta p'ampasqanku paypa jallp'anpi Timnat Seraj nisqapi. Chayqa kashan Efrainpa jatun aylloj jap'iyninpi, Gaas orqomanta wichaynejpi.

¹⁰ Jinallataj watakuna pasasqanman jina Josuéj mitanmanta kaj israelitakunapis wañupullasqankutaj. Ajinamanta qhepa wiñajkunaqa mana Tata Diosta rejserqankuchu, nitaj yacharqankuchu imatachus Tata Dios ruwasqanta israelita ñawpa tatankunapaj.

Israelitakunaqa Tata Diosta saqerparinku

¹¹ Chaymantataj israelitakunaqa Tata Diospa mana munasqan millaykunata ruwarqanku. Baalman rijch'akoj tukuy imaymana lantikunata yupaychayta qallarerqanku.

¹² Paykunaqa karunchakorqanku ñawpa tatankoj yupaychasqanku Tata Diosmanta, pichus Egiptomanta paykunata orqhomusqa, chaymanta. Israelitakunaqa Canaán jallp'api tiyakojkunaj diosninkuta yupaychayta qallarerqanku, Tata Diosta sinch'ita phiñachispa.

¹³ Tata Diosmanta karunchakorqanku Baalpa lantinkunata, Astarotpa lantinkunata ima yupaychaspa.

¹⁴ Chayrayku Tata Diosqa israelitakunaj contrankuta sinch'ita phiñakuspa, tukuy kapuyninkuta suwakunawan qhechucherqa. Jinaspataj, chay muyuyninkumanta kaj awqankunawan paykunata atipaykucherqa, nitaj paykuna kutichikuyta aterqankuchu.

¹⁵ Sapa kuti maqanakuman purirejtinku, Tata Diosqa contrankupi sayaykorqa. Chayrayku manapuni paykunata allinchu rerqa, Tata Dios ñawpajmantaña tiluspa nisqanman jina. Jinamanta Tata Diosqa israelitakunata sinch'i llakiyman churarqa.

¹⁶ Chaypacha Tata Diosqa juezkunata churarqa, suwakunaj makinkumanta israelitakunata kacharichinankupaj.

¹⁷ Chaywanpis israelitakunaqa manapuni kasorqankuchu chay juezkunataqa, manachayqa Tata Diosta wasanchaspa, waj dioskunata yupaycharqanku. Ñawpa tatankukunaqa Tata Diospa kamachisqanta kasukuspa kawsakusqanku. Paykunarí manaraj imapi Tata Diosta wasancharqanku.

¹⁸ Tata Diosqa sapa kuti uj juezta churaj, chantá chay juezta yanapallajpuni. Chay juez kawsashajtintaj, Tata Diosqa israelitakunata awqankukunamanta kacharichejpuni, imaraykuchus sinch'i ñak'ariypi waqasqankuta uyarispa, paykunamanta khuyakorqa.

¹⁹ Juezninku wañupojtintajrí, watejmanta israelitakuna juchallillajtaj kanku, ñawpa tatankumanta astawanraj waj dioskunata qhatispa, chantá yupaychaspa ima. Manapuni t'aqakorqankuchu millayta ruwaspa kawsanamanta nitaj mana uyarikoj kanamanta.

²⁰ Chayraykumin Tata Diosqa Israelpa contranpi sinch'ita phiñakuspa, nerqa: Kay runakunaqa ñawpa tatankuwan tratota ruwasqayta p'akinku, manataj kasuwayta munankuchu.

²¹ Chayrayku kay llajtayojkunamanta, pikunachus Josué wañupusqanmanta qhepakorqankuraj, chaykunataqa mana israelitakunaj ñawpaqenkumanta wijch'usajchu, nispa.

²² Ajinamanta Tata Diosqa yachayta munasharqa israelitakunaqa Tata Diosta kasukuspa purinkumanchus manachus, chayta, imaynatachus ñawpa tatankuna purisqanku, ajinata.

²³ Chayrayku Tata Diosqa mana wijch'orqachu chay llajtayojkunata, pikunatachus Josué kawsashaspa mana wijch'usqachu, chaykunata, manachayqa qhepakunankuta saqellarqa.