Jueces 19 - DIOSPA QHELQACHISQ

Levitawan warminwan

¹ Israel ukhupi manaraj kuraj kamachej kashajtin, uj levita tiyakorqa Efrainpa jallp'ankupi aswan karu orqorara cheqanejpi. Paytaj, Judapi Belén llajtamanta uj warmiwan tantakorqa.

² Chantá chay warmi phiñakuspa riporqa Judapi Belén llajtaman tatanpa wasinman, tawa killatataj chaypi qhepakorqa.

³ Chaymantataj levitaqa kamachinta pusariykukuspa, iskay burrotawan qhatispa, warminta mask'amoj rerqa, paywan kutimpunanpaj parlapayamoj. Belenman chayajtintaj, warmenqa tatanpa wasinman pusaykorqa.

⁴ Ajinallatataj warmej tatanpis levita runata tukuy sonqo wasinpi jap'erqa, nerqataj paykunawan qhepakunanta. Chayrayku levita, kamachin ima kinsa p'unchayta suegronpa wasinpi qhepakorqa, mikhuspa, ujyaspa, puñuspataj.

⁵ Tawa kaj p'unchaypeqa levitawan, warminwan, kamachinwan ima tuta tutamanta ripunankupaj jatarikorqanku. Ripushajtinkuñataj, warmej tatanqa tolqanta nerqa: Manaraj puririshaspa, uj chhika mikhunallatapis mikhurikuwaj ari. Chantá ripullankichej, nispa.

⁶ Jinataj suegronwan tiyaykukuspa mikhorqanku, ujyarqankutaj. Chantá warmej tatanqa levitata nerqa: Kay ch'isitawan qheparikuy ari, khuska kusirikunanchejpaj, nispa.

⁷ Levitaqa watej ripunanpaj sayarikorqa. Chaywanpis payqa qhepakullarqa suegron kutin kutinta qhepakunanta nisqanrayku.

⁸ Phishqa p'unchayninman levitaqa tutamanta ripunanpaj jatarikullarqataj. Suegrontajrí watej nillarqataj: Manaraj ripushaspa kallpachakunaykipaj mikhuyku, nispa. Jinamanta khuska mikhorqanku, chaykamataj p'unchayaykorqa.

⁹ Maypachachus levitaqa, warminwan, kamachinwan ima jatarikorqanku ripunankupaj chaypacha, suegronqa nillarqataj: Ña ch'isiyamushanña. Kay ch'isitawan qheparikuy ari kusirikunanchejpaj, q'ayataj tutamanta ripullankichej, nispa.

¹⁰ Chaywanpis levita runaqa manañapuni uj ch'isitawan qhepakuyta munarqachu, manachayqa riporqapuni warminwan, kamachinwan, chantá iskaynin caronasqa burronkunawan ima. Purispa, Jebús llajtaman chayarqanku, mayqenchus aswan qhepaman Jerusalén sutichasqa karqa, chayman.

¹¹ Ch'isiyaykushasqanrayku levitaj kamachin payta nerqa: Patrón, walej kanman kay jebuseokunaj llajtankupi kunan ch'isi puñukunanchej, nispa.

¹² Patronnin levitatajrí kuticherqa: Kay llajtaqa mana israelitakunajpatachu. Chayrayku mana chimpaykusunchu, astawanqa risunchej Gabaakama.

¹³ Chaypi puñusunchej Gabaapi chayrí Ramapi, nispa.

¹⁴ Ajinaqa rillarqankupuni, inti yaykushajtinñataj Gabaa llajtaman chayarqanku. Chay llajta Benjamín jatun aylloj jap'iyninpi karqa.

¹⁵ Ñanmanta t'aqarikuspataj, chay ch'isi chaypi puñunankupaj, Gabaa llajtaman yaykorqanku. Manataj pipis wasinman wajyarikojtin, llajtaj plazanpi tiyaykukorqanku.

¹⁶ Jinapis ña allin tutañaqa uj machu runa llank'akunanmanta kutimpushaspa, chayninta pasarqa. Chay machu runaqa Efrainpa orqorara cheqanejmanta karqa, chay Gabaa llajtapitaj tiyakusharqa karu llajtayoj jinalla. Chaywanpis Gabaapi tiyakojkunaqa tukuyninku Benjamín jatun ayllumanta karqanku.

¹⁷ Jinapi levitata plazapi tiyashajta rikuspa, chay machu runaqa payta tapurerqa: Maymantataj jamushankiri? Maymantaj rishankiri? nispa.

¹⁸ Levitataj kuticherqa: Tutayaykuchikuyku. Judá jatun ayllupi Belenmanta jamorqayku, rishaykutaj Efraín jatun aylloj jap'iynin ukhu orqonejman, maypichus tiyakuni, chayman. Belenpi karqani, kunantaj Tata Diospa wasinman kutipushani, manataj ni pi kanchu kunan ch'isi wasinman wajyarikuwaj.

¹⁹ Burroykupaj tiyapuwayku pajawan, q'achuwan. Noqaykupajtaj t'anta, vino ima. Mana imapis pisiwaykuchu, nispa.

²⁰ Chay machu runaqa nerqa: Walejta jamorqankichej. Imaykichejchus mana kajtaqa noqa qollasqaykichej. Jinapis amapuni kunan ch'isi kay plazapi puñuychejchu, nispa.

²¹ Chantá machu runaqa paykunata wasinman pusaspa, burronkuman q'achuta qararqa. Paykunaqa chakinkuta mayllakorqanku, chaymantataj mikhorqanku, ujyarqankutaj.

²² May kusiypi karishajtinkutaj, chay llajtamanta millay sajra runakuna wasita muyuykuspa, punkuta takayta qallarerqanku. Paykunataj nerqanku chay wasiyoj machu runata: Chay chayakamoj runaykita orqhomuy. Paywan puñuyta munayku, nispa.

²³ Chantá wasiyoj wasimanta llojsispa, nerqa: Ama jina kaychejchu, kawsaqeykuna. Ama chay millay sajrataqa ruwaychejchu kay chayakamuwaj runawanqa.

²⁴ Kaypi kashan ususiy manaraj qharita rejsej, kay runaj warminpis. Paykunawan imatachus munasqaykichejta ruwaychej. Jinapis kay runawanqa ama chay millaytaqa ruwaychejchu, nispa.

²⁵ Chaywanpis chay runakunaqa wasiyojta mana uyarej tukusqankurayku, levitaqa warminta orqhomuspa, paykunaman jaywarqa. Chay millay runakunataj warmimanta alqochakorqanku sut'iyanankama.

²⁶ Sut'iyaytaña chay warmeqa machu runaj wasinman kutiporqa, qosan kasharqa, chayman, chay punkunejpitaj wañusqa choqakorqa.

²⁷ Levita runaqa sut'iyayta ripunanpaj punkuta kicharispa, warminta wijch'urayashajta rikorqa, punku yaykuna patapi, punku sarunaman makin churasqata.

²⁸ Chantá nerqa: Sayarikuy, ripunachej, nispa. Warmintajrí mana imatapis kuticherqachu. Chantá payqa warminpa ayanta ujnin burroman chajnaykuspa, wasinman riporqa.

²⁹ Wasinman chayaytawan, levitaqa cuchillota oqharikuspa, warminpa ayanta chunka iskayniyojman khuchorqa, chaykunatataj apacherqa tukuy Israel aylluman.

³⁰ Chantá tukuy rikojkuna nerqanku: Egiptomanta israelitakuna llojsimusqankumantapacha mana jayk'ajpis kayman rijch'akojqa karqachu. Sumajta umachakunanchej tiyan, kayman jina imatachus ruwananchejta, nispa.