Jueces 15 - DIOSPA QHELQACHISQ

Sansón chajrata ruphaykuchin

¹ Chaymanta mana unayninman trigo oqharina killapi, Sansonqa warminta waturikoj rerqa uj chivitu aparisqa. Chayaspataj, warminpa tatanta nerqa: Warmiyta watukuyta munani, nispa. Warminpa tatantajrí mana yaykuchiyta munarqachu,

² manachayqa pay Sansonta nerqa: Noqaqa yuyarqani manaña payta munakusqaykita, chayrayku ujnin kaj kawsaqeykiwan casarachini. Chaywanpis paypa sullk'an kashanraj aswan alajita. Paywan casarakapuy ari, nispa.

³ Sansontajrí chay sipaspa tatanman kuticherqa: Kunanqa mana juchayojchu kasaj filisteokunata imatachus ruwasaj chaymanta, nispa.

⁴ Chantá campoman rispa, Sansonqa 300 atojkunata jap'imorqa. Chupankumanta iskaymanta iskay t'inkiykuspataj, nina jachunta wataykorqa.

⁵ Chaymantaqa nina jachunta jap'iykuchispa, filisteokunaj chajrankuman atojkunata kachaykorqa. Jinamanta Sansón ruphaykucherqa erapiña kaj trigota, jinataj ruthunapaj kasharqa, chaytapis. Chantá ruphaykuchillarqataj uva sach'akunata, olivo sach'akunatapis.

⁶ Chantá filisteokunaqa tapurarqanku: Pitaj kayta ruwanri? nispa. Kuticherqankutaj: Timnat llajtayoj uj runaj tolqan Sansón sutiyoj kayta ruwarqa, imaraykuchus chay runaqa ususinta Sansonpa kawsaqenwan casaracherqa, Sansonwan casarasqaña kashajtin, nispa. Chayta yachaytawan, filisteokunaqa chay warmita, tatantawan ima ruphaykuchimorqanku.

⁷ Filisteokunaj chay ruwasqankumanta yachaspa, Sansón nerqa: Qankuna chay jinata ruwasqaykichejrayku, tiluni mana kayqa jinallachu kanqa, manachayqa mana samarisajchu qankunata chinkachinaykama, nispa.

⁸ Jinamanta filisteokunata mana khuyaspa maqaykorqa, ashkhatataj wañuracherqa. Chay qhepantataj Etam chhanka jusk'uman tiyakoj rerqa.

Sansón burro k'akiwan filisteokunata wañuchin

⁹ Filisteo soldadokunaqa rispa, Judáj jatun ayllu jap'iyninpi jarakorqanku, Lehí nisqa chaynejkamataj rerqanku.

¹⁰ Chantá Judá jatun ayllumanta kajkuna tapurerqanku: Imaraykutaj noqaykuwan maqanakoj jamunkichejri? nispa. Filisteokunataj kuticherqanku: Sansonta jap'ej jamuyku, mana allinta ruwawasqaykumanta, paytapis jinallataj ruwanaykupaj, nispa.

¹¹ Chayta uyarispa, Judá jatun ayllumanta 3.000 runakuna Etampi chhanka jusk'uman rerqanku, chaypitaj Sansonta nerqanku: Imatataj kayta ruwawaykuri? Manachu yachanki filisteokunaj makinpi kashasqanchejta? nispa. Sansonrí Judamanta chay runakunaman kuticherqa: Imaynatachus filisteokuna ruwawarqanku, jinallatataj noqapis paykunata ruwallarqanitaj, nispa.

¹² Chantá Judamanta kajkunaqa nerqanku: Noqaykoqa qanta jap'ej jamuyku, filisteokunaman apasunaykupaj, nispa. Sansontaj, paykunaman kuticherqa: Mana wañuchinawaykichejta tiluwaychej, nispa.

¹³ Judamanta kajkunataj nerqanku: Mana, mana qanta wañuchisqaykuchu, manachayqa jap'isuspa, filisteokunaman apasuyta munayku. Chayta nispataj, iskay mosoj waskhawan watasqata pakakunanmanta Sansonta orqhomorqanku.

¹⁴ Judamanta kajkunaqa Sansonta Lehiman chayachimojtinkutaj, filisteokuna kusiywan qhaparqachaspa, payta taripaj llojserqanku. Chantá Tata Diosqa Espiritunwan watej Sansonta kallpacharqa. Sansontaj makinpi chay watasqa lino waskhata p'itirarqa, phunu q'aytupis kanman jinata.

¹⁵ Chantá manaraj allin ch'akisqa burro k'akita oqharikuspa, chaywan 1.000 filisteokunata wañuracherqa.

¹⁶ Chaymantataj Sansón nerqa: Uj burro k'akiwan 1.000 runakunata wañucherqani. Uj burro k'akillanwan wañuchispa, uj iskay qotuta wañusqa runata tantarqani, nispa.

¹⁷ Chayta niytawan, chay burro k'akita wijch'urparerqa. Jinataj chay cheqaj sutenqa, Ramat Lehí karqa.

¹⁸ Chaymantaqa Sansón yakumanta mayta ch'akichikushaspa, Tata Diosman mañakorqa: Imapajtaj atipayta yanapawarqankiri? Kunanqa yaku ch'akiywan wañusajchu qanta mana rejsejkunaj makinkupi? nispa.

¹⁹ Chantá Diosqa Lehí nisqa cheqapi uj yaku juturita rikhuricherqa, Sansontaj chay pujyumanta ujyaspa, watej kallpachakorqa. Chayrayku chay jutureqa sutichasqa karqa: Enacoré, nispa. Chayqa kunankama Lehí cheqapi kashan.

²⁰ Sansonqa iskay chunka watata israelitakunata juez jina kamacherqa, israelitakuna filisteokunaj makinpi kashajtinkupis.