Jueces 13 - DIOSPA QHELQACHISQ

Sansonpa paqarisqan

¹ Israelitakunaqa watej Tata Diospa mana munasqanta ruwallarqankutaj. Chayrayku Tata Diosqa paykunata filisteokunaj makinkuman tawa chunka watata jaywaykorqa.

² Chaypacha Sorá llajtapi Dan jatun ayllumanta uj runa karqa Manoa sutiyoj, paypa warmintaj manapuni wawayoj kayta aterqachu.

³ Chantá uj p'unchay Tata Diospa angelnin Manoaj warminman rikhurispa, nerqa: Qan mana wawayoj kayta atinkichu. Kunanrí wijsallikunki, jinaspataj uj qhari wawata paqarichikunki.

⁴ Chayrayku kunanmanta ama vinota ujyankichu, nitaj waj machachikoj ujyanakunatapis, nillataj ch'ichipaj qhawasqa mikhunatapis mikhunkichu.

⁵ Uj qhari wawayki kapusonqa. Qanrí chay wawaykej chujchantaqa ama k'utuchinkichu, imaraykuchus chay wawaqa Tata Diospaj t'aqasqa nazareo kanqa manaraj paqarikusqanmantapacha. Aswan jaqaymantaj paymin israelitakunata filisteokunaj makinmanta kacharichenqa, nispa.

⁶ Chayta uyariytawan, warmeqa qosanman willamorqa: Uj runa Diospa angelninman rijch'akoj jamuwarqa, paytaj may mancharina karqa. Manataj taporqanichu pichus kasqanta, nitaj paypis willawarqachu.

⁷ Pay niwarqa: Uj qhari wawata paqarichikunki. Chantá kunanmantapacha amapuni vinota, nitaj ima machachikoj ujyanata ujyankichu. Amallataj ima ch'ichipaj qhawasqa mikhunatapis mikhunkichu, imaraykuchus wawaykeqa Tata Diospaj t'aqasqa nazareo kanqa, manaraj paqarikusqanmantapacha wañupunankama, nispa.

⁸ Chantá Manoaqa Tata Diosmanta mañakorqa: Mañarikuyki, Tukuyta Kamachej Diosníy, warmiyman kachamusqayki runata watej kachamunawaykuta. Ajinamanta pay willawasqayku imatachus ruwanaykuta, paqarinan kashan, chay qhari wawawan, nispa.

⁹ Chantá Diosqa Manoaj mañakusqanta uyarerqa. Jinataj Manoaj warmin campopi kashajtin, Tata Diospa angelnin watejmanta payman rikhurillarqataj. Qosan Manoatajrí mana paywanchu kasharqa.

¹⁰ Chantá warmeqa usqhayta rispa, qosanta nerqa: Qaninpa rikhuriwarqa, chay runa watejmanta rikhurillawantaj, nispa.

¹¹ Manoaqa jatarikuytawan, warminpa qhepanta rerqa, maypichus chay runa kasharqa, chayman, paytataj nerqa: Qanchu kanki, qaninpa warmiywan parlasharqa, chay runaqa? nispa. Chay runataj kuticherqa: Arí, noqa kani, nispa.

¹² Chaypacha Manoaqa nerqa: Maypachachus qanpa niwasqayku junt'akonqa chaypachaqa, imaynatataj chay wawata uywasqaykuri? Imatataj paywan ruwanayku kanqari? nispa.

¹³ Chantá Tata Diospa angelnin payman kuticherqa: Warmiyki tukuy nisqayta junt'anan tiyan:

¹⁴ Ama vinota ujyachunchu, nitaj machachej ujyaykunatapis. Amallataj mikhuchunchu ch'ichipaj qhawasqa mikhuykunatapis. Chay tukuy kamachisqaykunata warmiyki junt'anan tiyan, nispa.

¹⁵ Manoaqa mana yacharqachu chay runaqa Tata Diospa angelnin kasqanta. Chayrayku payta nerqa: Noqaykuwan qheparikuy. Chantá mikhunaykipaj uj chivitoj aychanta kankarqapusqayki, nispa.

¹⁶ Angeltajrí kuticherqa: Qhepakuyman chaypis, mana noqaqa qankunawan mikhuyta atiymanchu. Jinapis atiwaj chay chivituta ñak'aspa, Tata Diosman jaywaspa q'olachiyta, nispa.

¹⁷ Manoataj angelta nerqa: Sutillaykitapis willawayku ari, kay niwasqayku junt'akojtin, qanta jatunchanaykupaj, nispa.

¹⁸ Tata Diospa angelnintajrí kuticherqa: Imapajtaj sutiyta yachayta munankiri? Suteyqa may t'ukuna pakasqa sutimin, nispa.

¹⁹ Chantá Manoaqa uj chivituta, jinallataj poqoykunamanta ofrendatawan ima Tata Diosman jaywarqa, chhanka patapi q'olachispa. Chaypacha Tata Diosqa may t'ukuna imata ruwarqa, Manoawan, warminwan qhawashajtinku.

²⁰ Altarmanta pataman nina oqharikojtinkama, Tata Diospa angelnin nina lawray chawpita janaj pachaman riporqa. Chayta rikuspa, paykuna pampakama umankuta chayachinankukama k'umuykorqanku.

²¹ Jinamanta Manoaqa yacharqa chay runaqa Tata Diospa angelninpuni kasqanta, manañataj ujtawan jayk'ajpis payman, nitaj warminmanpis rikhurerqañachu.

²² Chantá Manoaqa warminta nerqa: Cheqamanta kunanqa Diosta rikusqanchejrayku wañupusunchá, nispa.

²³ Warmintajrí kuticherqa: Sichus Tata Dios wañuchiyta munawasunman karqa chayqa, manachari q'olachisqanchejta, nitaj ofrendanchejtapis jap'iwasunmanchu karqa. Nillataj kay imakunata rikuchiwasunmanchu karqa. Manallataj kay tukuyta willawasunmanchu karqa, nispa.

²⁴ Aswan qhepaman chay warmeqa uj wawata paqarichikorqa, suticharqataj Sansón, nispa. Chay wawa wiñarqa, Tata Diostaj samincharqa.

²⁵ Chantá Tata Diospa Espíritun Sansonman jamuspa, payta kallpacharqa, Danpa jaranpi kashajtin. Chay kashan Sorawan, Estaolwan, chay chawpinejpi jina.