San Juan 9 - DIOSPA QHELQACHISQ

Jesús uj runata qhawarichin

¹ Chantá Jesús chaymanta llojsimuspa, uj runata rikorqa. Chay runa paqarisqanmantapacha ñawsa karqa.

² Jinapi Jesuspa yachachisqankuna payta taporqanku: Yachachej Wiraqochi, imajtintaj kay runa ñawsa paqarinman karqari? Tatan mamanchu juchallerqanku, chayrí paychu? nispa.

³ Chantá Jesús kuticherqa: Mana paypa juchanraykuchu, nitaj tatan mamanpa juchankuraykuchu kay runa ñawsa paqarerqa. Manachayqa pay ajina paqarerqa paypi Dios atiyninwan imatachus ruwananta rikunaykichejpaj.

⁴ P'unchayllaraj kashajtin, Kachamuwajniypa ruwananta ruwananchejpuni tiyan. Laqhayaykojtinñarí, mana pipis imatapis ruwayta atinñachu.

⁵ Kay pachapi kanaykamaqa noqamin runakunapaj k'anchay jina kani, nispa.

⁶ Chayta niytawan, Jesusqa thoqayninwan uj chhika t'uruta ruwaspa, ñawsa runaj ñawinman lluch'iykorqa.

⁷ Chantá payta nerqa: Kunanqa rispa, Siloé nisqa estanquepi mayllakamuy, nispa (Siloé “kachasqa” niyta munan). Ñawsa runataj rispa, mayllakamorqa, chantá rikushaj wasinman kutiporqa.

⁸ Chayrayku wasin qayllapi tiyakojkuna, jinataj tukuy payta rejsejkuna ima tapunakorqanku: Manachu kayqa, pichus tiyakuspa mañakoj karqa, chay runa? nispa.

⁹ Wakinkuna nerqanku: Arí, paypuni, nispa. Wakintaj nerqanku: Mana paychu, nispa. Wakinkunataj nerqanku: Payman rijch'akun, nispa. Paytajrí nerqa: Arí, noqapuni kani, nispa.

¹⁰ Jinapi payta taporqanku: Imaynamantataj rikuyta aterqankiri? nispa.

¹¹ Paytaj kuticherqa: Jesús sutiyoj chay runa t'uruta ruwaspa, ñawiyman lluch'iykuwarqa, niwarqataj: Siloeman rispa, mayllakamuy, nispa. Noqataj rispa, mayllakamorqani, chantá chay kikinpachataj rikuyta aterqani, nispa.

¹² Chantá taporqanku: Maypitaj chay runa kashanri? nispa. Paytaj kuticherqa: Mana yachanichu, nispa.

Fariseokuna qhawarej runata tapunku

¹³ Chantá ñawsa karqa, chay runaj wasi masinkuna payta fariseokunaman pusarqanku.

¹⁴ Maypachachus Jesús t'uruta ruwaspa, ñawsa runaj ñawinta qhawarichisqa chaypacha, samarina p'unchay karqa.

¹⁵ Fariseokunapis ujtawan, pichus ñawsa karqa, chay runata tapullarqankutaj imaynamantachus ñawin rikuyta atisqanta. Paytaj kuticherqa: Chay runa t'uruwan ñawiyman lluch'iykuwarqa, chantá mayllakamorqani, kunantaj rikuni, nispa.

¹⁶ Chaypacha wakin fariseokuna nerqanku: Chayta ruwaj runataqa mana Dioschu kachamunman, imaraykuchus pay samarina p'unchayta mana respetanchu, nispa. Wakintajrí nisharqanku: Imaynatataj juchasapa runa chay jina t'ukunata ruwanmanri? nispa. Ajinata paykunaqa ujtataj ujtataj parlasharqanku.

¹⁷ Chantá paykuna, pichus ñawsa karqa, chay runata ujtawan taporqanku: Qanrí, ima ninkitaj, pichus ñawiykita qhawaricherqa, chay runamantari? nispa. Paytaj nerqa: Noqa nini Diosmanta sut'inchaj kasqanta, nispa.

¹⁸ Chaywanpis judiokunaj kurajninkukuna mana creerqankuchu chay runa ñawpajta ñawsa kasqanta, chantá imaynamantachus qhawarisqanta ima. Chayrayku tatanta, mamantawan wajyacherqanku.

¹⁹ Jamojtinkutaj, paykunata taporqanku: Kaychu wawaykichej? Cheqachu paqarisqanmantapacha ñawsa karqa? Jina chayqa, imaynamantataj kunan rikuyta atinri? nispa.

²⁰ Tatan mamantaj kuticherqanku: Arí, payqa wawayku, ñawsataj paqarerqa.

²¹ Chaywanpis mana yachaykuchu imaynamantachus qhawayta atisqanta, nitaj pichus ñawinta kicharisqantapis. Payqa yuyayniyojña. Chayrayku payta tapuychej, paytaj willasonqachej, nispa.

²² Ajinata chay runaj tatan maman nerqanku judiokunaj kurajninkukunata manchachikuspa, imaraykuchus kurajkunaqa tantakunanku wasimanta wijch'unankuta parlanakusqanku, pillapis Jesusta Diospa kachamusqan Cristo, nispa nejkunata.

²³ Chayrayku ñawsa runaj tatan maman nisqanku: Payqa yuyayninpiña, payta tapuychej, nispa.

²⁴ Chantá judiokunaj kurajninkukuna, pichus ñawsa karqa, chay runata ujtawan wajyaspa, nerqanku: Diospa ñawpaqenpi cheqanta parlay. Noqayku yachayku chay runaqa juchasapa kasqanta, nispa.

²⁵ Paytajrí kuticherqa: Noqaqa juchasapachus manachus kasqanta mana yachanichu. Jinapis kayta yachani: Ñawpajta ñawsa karqani, kunantaj rikuyta atiniña, nispa.

²⁶ Jinapi judiokunaj kurajninkukuna ujtawan tapullarqankutaj: Imanasorqataj chay runari? Imaynatataj qhawarichisorqari? nispa.

²⁷ Chantá ñawsa karqa, chay runa kuticherqa: Willarqaykichejña, qankunataj mana uyariwayta munankichejchu. Imapajtaj ujtawan willanayta munankichejri? Qankunapis yachachisqankunamanchu tukupuyta munashallankichejtaj? nispa.

²⁸ Ajinata nisqanrayku, kurajkunaqa payta turiyarqanku: Qanmá chay runaj yachachisqan kanki. Noqaykurí Moisespa yachachisqan kayku.

²⁹ Noqayku yachayku Diosqa Moisesman parlasqanta. Chaywanpis chay runa maymantachus kasqanta mana yachaykuchu, nispa.

³⁰ Chantá manaña ñawsachu karqa, chay runa nerqa: Qankuna maymantachus chay runa kasqanta mana yachasqaykichejqa t'ukuna. Chaywanpis pay noqaj ñawiyta qhawaricherqa.

³¹ Tukuy yachanchej Diosqa juchasapakunata mana uyarisqanta. Aswanpis pikunachus Diosta may jatun respetowan qhawanku, chantá munasqantataj ruwanku, chaykunallata Dios uyarin.

³² Mana jayk'ajpis uyarikorqachu ñawsapuni paqarejpa ñawinta pipis qhawarichisqan.

³³ Manachus chay runa Diospa kachamusqan kanman chayqa, mana imatapis ruwayta atinmanchu, nispa.

³⁴ Judiokunaj kurajninkukunatajrí kuticherqanku: Qanmá paqarisqaykimantapacha juchasapa kanki. Qanchu noqaykuman yachachiwasqayku? nispa. Chantá tantakuna wasimanta payta wijch'orqanku.

Qhawashaj ñawsa runakuna

³⁵ Chantá Jesús uyarerqa judiokunaj kurajninkukunaqa chay runata tantakuna wasimanta wijch'usqankuta. Taripaytawantaj, payta taporqa: Runaj Churinpi atinikunkichu? nispa.

³⁶ Chay runataj kuticherqa: Wiraqochíy, pichus kasqanta willaway, paypi atinikunaypaj, nispa.

³⁷ Jesustajrí kuticherqa: Ñapis payta rikunkiña. Noqa kani, piwanchus parlashanki, chay, nispa.

³⁸ Chantá chay runa nerqa: Tukuyta Kamachej, qanpi atinikuni, nispa. Chantá Jesuspa ñawpaqenpi qonqoriykukuspa, payta yupaycharqa.

³⁹ Jesustaj nerqa: Noqaqa kay pachaman juzganaypaj jamorqani: Ñawsakunata qhawarichinaypaj, rikushasqankuta yuyajkunatataj ñawsa kashasqankuta sut'inchanaypaj, nispa.

⁴⁰ Chantá Jesuswan kasharqanku, chay fariseokunamanta wakin chayta uyarispa, nerqanku: Ajinata nispa, niytachu munanki noqaykupis ñawsallataj kashasqaykuta? nispa.

⁴¹ Jesustaj kuticherqa: Ñawsachus kawajchej chayqa, mana juchayojchu kawajchej. Chaywanpis: Rikuyku, nispa nisqaykichejrayku juchayojpuni kankichej, nispa.