San Juan 17 - DIOSPA QHELQACHISQ

Jesús yachachisqankunarayku Diosmanta mañapun

¹ Jesús chay tukuy imata parlaytawan, patata qhawaspa, nerqa: Tatáy, Churiykita jatunchanayki p'unchay chayamunña, qantapis Churiyki jatunchasunanpaj.

² Churiykiman qan atiyta qorqanki, tukuy runata kamachinanpaj, wiñay kawsaytataj qonanpaj, pikunatachus payman qorqanki, chaykunaman.

³ Paykuna wiñay kawsayman yaykunku, maypachachus qanpi, chantá noqapi atinikunku, chaypachalla. Qanpi atinikunanku tiyan, imajtinchus qan uj k'ata cheqa kaj Dios kanki. Noqapipis atinikunallankutaj tiyan, imajtinchus noqaqa qanpa kachamusqayki Jesucristo kani.

⁴ Noqa kay pachapi qanta jatuncharqayki, imaraykuchus imatachus ruwanayta kamachiwasqaykita junt'aniña.

⁵ Kunantaj Tatáy, qayllaykipi jatunchaway, imaynatachus qanwan jatunchasqa karqani manaraj kay pacha ruwasqa kashajtin, ajinata.

⁶ Kay pachamanta qowasqayki runakunaman noqa pichus kasqaykita rejsicherqani. Paykuna qanpatapuni karqanku, qopuwarqankitaj, paykunataj nisqaykita kasorqanku.

⁷ Kunantaj yachankuña tukuy ima qowasqaykeqa qanmantamin kasqanta.

⁸ Imatachus willanayta niwasqaykita noqa paykunaman willarqani, paykunataj chayta jap'ikorqanku. Jinallataj paykuna yachanku noqa qanmantapuni jamusqayta, jinataj qan kachamuwasqaykita creenku.

⁹ Noqaqa mana pikunachus noqapi mana atinikuyta munajkunaraykuchu mañakuyki, manachayqa pikunatachus qan qowarqanki, chaykunaraykulla, imaraykuchus paykunaqa qanpata kanku.

¹⁰ Tukuy noqajta kajkunaqa qanpata kanku, qanpata kajkunataj noqajta. Noqaj jatunchasqa kasqaytaj paykunanejta sut'ita rikuchikun.

¹¹ Noqa manaña kay pachapichu kasaj. Paykunataj kay pachapi qhepakonqanku, noqatajrí qanman jampusaj. May llimphu kaj Tatáy, noqapi atinikojkunata atiyniykiwan waqaychay, paykuna uj sonqolla kanankupaj, imaynatachus qanwan noqawan ujlla kanchej, ajinata.

¹² Kay pachapi paykunawan kashaspaqa, noqa atiyniykiwan paykunata waqaycharqani, pikunatachus qowarqanki, chaykunata. Manataj mayqenpis chinkarqachu, manachayqa chinkananpaj churasqa kajlla, ajinamanta Diospa Qhelqachisqan junt'akunanpaj.

¹³ Kunantaj, maypichus qan kashanki, chayman kutimpushani. Kay pachapi kashaspa, noqaqa qhatiwajkunaman kaykunata nerqani, paykuna noqa jina manchay kusisqa kanankupaj.

¹⁴ Nisqaykita paykunaman willarqani. Diosman mana kutirikojkunatajrí paykunata chejnerqanku, imaraykuchus manaña paykuna jinachu kanku. Noqapis manallataj paykuna jinachu kani.

¹⁵ Mana noqata qhatiwajkunata kay pachamanta orqhonaykitachu mañakuyki, manachayqa paykunata Supaymanta waqaychanaykita.

¹⁶ Paykunaqa, Diosman mana kutirikojkuna imaynatachus yuyanku, mana jinatachu kawsanku, noqapis manallataj chaykunaj yuyasqankuman jinachu kawsani.

¹⁷ Tatáy, nisqaykeqa cheqapuni. Kunantaj nisqaykita kasusqankurayku paykunata qanpaj t'aqay.

¹⁸ Jinaqa imaynatachus qan kay pachaman kachamuwarqanki, ajinallatataj noqapis paykunata tukuy runaman nisqaykita willanankupaj kachani.

¹⁹ Paykunarayku wañunaypaj kawsayniyta qanman jaywayki, ajinamanta paykunapis cheqa kajta jap'ikusqankunejta qanpaj t'aqasqallataj kanankupaj.

²⁰ Mana paykunallapajchu mañakuyki, aswanpis pikunachus paykunaj willasqankunejta noqaman kutirikamonqanku, chaykunapajpis.

²¹ Mañakuyki paykunapura ujchasqallapuni kanankuta. Imaynatachus Tatáy, qanwan, noqawan ujchasqa kanchej, ajinallatataj paykunapis noqanchejman ujchasqapuni kachunku, ajinamanta tukuy runakuna qan kachamuwasqaykita yachanankupaj.

²² Qan atiyta qowarqanki, noqataj chay atiyllatataj noqata qhatiwajkunaman qorqani, noqanchej jina ujlla kanankupaj.

²³ Noqaqa paykunaman ujchasqa kashani, qantaj noqaman. Ajinamanta paykuna uj sonqolla kanqanku, tukuy runakuna yachanankupaj qan kachamuwasqaykita. Yachallanqankutaj qan paykunata munakusqaykita, imaynatachus noqatapis munakuwanki, ajinata.

²⁴ Tatáy, munani qowasqayki kajkuna, maypichus noqa kasaj, chaypi noqawan kanankuta. Chaypacha qowasqayki jatun kayniypa lliphipiyninta rikuyta atenqanku, imaraykuchus manaraj kay pacha ruwasqa kashajtin, qan munakuwarqanki.

²⁵ Tatáy, cheqanpuni kanki. Chaywanpis qanman mana kutirikojkuna justiciaykita mana rejsinkuchu. Noqatajrí rejsiyki, qhatiwajkunapis qan kachamuwasqaykita yachanku.

²⁶ Noqaqa paykunaman pichus kasqaykita rejsicherqani. Chantá astawanraj rejsichisajpis, imaynatachus noqata munakuwanki, ajinallatataj paykunapis ujkunata munakunankupaj. Chaypachataj paykuna noqaman ujchasqallapuni kanqanku, nispa. Ajinata Jesús Tata Diosmanta mañakorqa.