San Juan 14 - DIOSPA QHELQACHISQ

Jesusqa Tata Diosman pusaj ñan

¹ Chaymanta Jesús yachachisqankunata nerqa: Ama phutikuychejchu. Qankunaqa Diospi atinikuychej, noqapipis atinikullaychejtaj.

² Maypichus Tatay tiyakun, chaypeqa tukuypaj wasi tiyan. Manachus jina kanman chayqa, sut'inta niykichejman karqa. Ajinaqa qankunapaj uj cheqata wakichimoj rishani.

³ Rispaqa, noqa qankunapaj uj cheqata wakichimusaj. Chantá qankunata pusaj kutimusaj, maypichus noqa kashani, chaypi noqawan khuska kanaykichejpaj.

⁴ Qankunataj, maymanchus rishani, chayman pusaj ñanta rejsinkichejña, nispa.

⁵ Tomastajrí Jesusta nerqa: Tukuyta Kamachej, mana yachaykuchu maymanchus rishasqaykita. Imaynatataj chayman pusaj ñanta rejsisqaykuri? nispa.

⁶ Chantá Jesús kuticherqa: Noqa ñan kani, cheqa kajtaj, kawsaytaj. Mana pipis Tata Diosman chayayta atinchu, mana noqanejta rispaqa.

⁷ Noqatachus rejsiwankichej chayqa, Tataytapis rejsillankichejtaj. Kunanmantapacha payta rejsinkichej, imajtinchus payta rikushankichej, nispa.

⁸ Chantá Felipe payta nerqa: Tukuyta Kamachej, Tata Diosta rikuchiwayku, chaywantaj sonqo junt'asqa kasqayku, nispa.

⁹ Jesustajrí payman kuticherqa: Felipe, chhika unaytaña qankunawan kashajtiy, manarajpunichu rejsiwanki? Pichus noqata rikuwajqa Tataytapis rikullantaj. Jinaqa, imaraykutaj nishanki: Tata Diosta rikuchiwayku, nispari?

¹⁰ Felipe, Tatayqa noqawan ujchasqa kawsan, noqataj payman ujchasqa kawsani. Imatachus willaykichej, chaytaqa mana noqallamantachu parlani. Aswanpis noqawan ujchasqa kawsaj Tata Diosmin imatachus ruwananta noqanejta ruwan.

¹¹ Creewaychej noqaqa Tata Dioswan ujlla kasqayta, Tata Diostaj noqawan ujlla kasqanta. Manachayrí, ruwasqayta rikuspalla, noqapi atinikuychej.

¹² Kayta sut'ita niykichej: Pichus noqapi atinikojqa, paypis noqaj ruwasqayta ruwallanqataj. Chaypis astawanraj ruwanqa, imaraykuchus noqaqa Tata Dioswan kanaypaj rishani.

¹³ Chantá sutiypi imatachus Tata Diosmanta mañakusqaykichejta noqa ruwasaj, Tata Dios Churinnejta jatunchasqa kananpaj.

¹⁴ Imallatapis noqaj sutiypi mañakunkichej, noqataj chayta ruwasaj, nispa.

Santo Espirituta kachamunanta Jesús nin

¹⁵ Jesús yachachisqankunata nillarqataj: Munakuwankichejchus chayqa, kamachisqaykunata kasuychej.

¹⁶ Noqataj Tata Diosmanta mañasaj waj Sonqochajta kachamunanta, paytaj wiñaypaj qankunawan kanqa.

¹⁷ Santo Espiritoqa imachus cheqa kajta yachachisonqachej. Diosman mana kutirikojkuna mana payta Yanapajninkuta jina jap'iyta atinkuchu, imaraykuchus payta mana rikunkuchu nitaj rejsinkuchu. Qankunatajrí payta rejsinkichejña, imaraykuchus qankunawan kashan, qankunapitaj tiyakonqapuni.

¹⁸ Mana sapaykichejta saqesqaykichejchu, manachayqa qankunawan kanaypaj kutirimusaj.

¹⁹ Uj chhikamantawan Diosman mana kutirikojkunaqa manaña rikuwanqankuchu. Qankunarí rikuwankichej. Noqa kawsasqayraykutaj qankunapis kawsallankichejtaj.

²⁰ Chay p'unchay chayamojtin yachankichej noqaqa Tatayman ujchasqa kasqayta. Ajinata qankunapis noqaman ujchasqa kankichej, imaynatachus noqapis qankunaman ujchasqa kasaj, ajinata.

²¹ Pichus kamachisqayta jap'ikun, kasuntaj, chaymin cheqatapuni munakuwajqa. Noqata munakuwajtataj Tatay munakonqa. Noqapis payta munakullasajtaj, imaynachus kasqaytataj payman rejsichikusaj, nispa.

²² Chantá Judas, mana Iscariote kajchu, Jesusta taporqa: Tukuyta Kamachej, imaraykutaj noqallaykuman rejsichikunki, manataj Diosman mana kutirikojkunamanri? nispa.

²³ Jesustaj kuticherqa: Noqata munakuwajqa nisqayta kasonqa, Tataytaj payta munakonqa. Chantá payman jamusqayku, paywantaj tiyakusqayku.

²⁴ Mana munakuwajrí nisqayta mana kasunchu. Uyarerqankichej, chay parlasqayqa mana noqajllatachu, astawanqa kachamuwaj Tataypata.

²⁵ Qankunawan kashaspa, kay jinamanta nishaykichej.

²⁶ Chaywanpis sonqochaj Santo Espíritu, pitachus sutiypi Tata Dios kachamonqa, chaymin tukuy imata yachachisonqachej, yuyarichisonqachejtaj tukuy imatachus qankunaman nisqayta.

²⁷ Noqaqa sonqo tiyasqa kayta qoykichej. Noqaj qosqay sonqo tiyasqa kaytaj mana runakunaj qosqan jinachu. Chayrayku ama imamantapis phutikuychejchu, nitaj manchachikuychejchu.

²⁸ Kay nisqayta uyarerqankichejña: Rishani chaypis, qankunaman kutimullasajtaj, nispa. Sichus munakuwankichejman chayqa, Tata Diosman rishasqaymanta kusikuwajchej, imaraykuchus payqa noqamanta kuraj.

²⁹ Chaywanpis kunan manaraj junt'akushajtin, chay tukuyta willashaykichej. Ajinamanta junt'akojtin, chay nisqay ajinapuni kasqanta yachankichej.

³⁰ Manaña qankunawan anchata parlasajchu, imaraykuchus kay pachata kamachej jamushanña. Chaywanpis payqa atipanawanpaj mana atiyniyojchu.

³¹ Ajina kanan tiyan, runakuna yachanankupaj noqa Tata Diosta munakusqayta. Yachallanqankutaj paypa kamachiwasqanta ruwasqayta, nispa. Chayta niytawantaj, Jesús nerqa: Sayariychej, jaku ripuna, nispa.