Josué 2 - DIOSPA QHELQACHISQ

Josueqa wateqajkunata Jericoman kachan

¹ Nunpa churin Josueqa Sitín nisqa chaymantapacha iskay wateqajkunata mana pejpa yachasqallan kachaspa, nerqa: Rispa, chay jallp'ata, chantá Jericó llajtatawan allinta qhawamuychej, nispa. Paykunataj rispa, Jericó llajtapi uj sajra purikoj warmej wasinman chayakorqanku, chay ch'isitaj chaypi qhepakorqanku. Chay warmej sutenqa Rajab karqa.

² Jinapis uj rikoj waj llajtayojkuna chayamusqankuta Jericó llajtata kuraj kamachejman willasqanku: Israelitakuna llajtanchejta wateqaj jamusqanku, nispa.

³ Chantá Jericota kuraj kamachej Rajabman nichimorqa: Wasiykiman chayamojkunata orqhomuy, imaraykuchus chaykunaqa llajtanchejta qhawaj jamunku, nispa.

⁴ Warmitajrí chay iskay runakunata pakaykuspa, nerqa: Arí, iskay runakuna wasiyman chayamorqanku. Chaywanpis mana yacharqanichu maymantachus kasqankuta.

⁵ Paykunarí llajtaman yaykuna punku manaraj wisq'akushajtin, laqhayaykushajtinña riporqanku, nitaj yachanichu maymanchus risqankuta. Chaywanpis sichus usqhayta qhatiykuwajchej chayqa, taripamuwajchejraj, nispa.

⁶ Warmitajrí chay runakunata wasi pataman wicharichisqa, chaypitaj ch'akinanpaj tantasqan linaza ukhuman paykunata pakaykusqa.

⁷ Chantá kuraj kamachejpata soldadonkunaqa wateqaj runakunata mask'aj rerqanku, Jordán mayupi maynejpichus ch'ajchalla karqa, chaykama. Chay soldadokuna llojsisqankutawantaj, llajtaman yaykuna jatun punkuta wisq'arqankupacha.

⁸ Wateqajkuna manaraj puñushajtinku, Rajab wasi pataman wicharispa, paykunata nerqa:

⁹ Noqa yachani Tata Dios qankunaman kay jallp'ata qosqasuykichejta, chayrayku noqayku sinch'ita manchachikushayku. Tukuy kaypi tiyakojkunaqa qankunata manchachikuspa, wañushaykuña.

¹⁰ Noqayku uyariyku, Egiptomanta llojsimushajtiykichej, Puka Mama Qochapi yakuta Tata Dios ch'akichisqanta, chayninta qankuna chimpanaykichejpaj. Yachallaykutaj qankunaqa amorreo runakunaj iskaynin kuraj kamachejninkuta, Sijonta chantá Ogtawan atipaspa chinkarparichisqaykichejta. Paykunaqa Jordán mayu chimpapi karqanku.

¹¹ Chayta yachaspataj, noqaykoqa maytapuni kharkatitispa llawch'iyayku. Chayrayku qankunawan maqanakunaykupaj manaña kallpapis kanchu, imaraykuchus Tata Diosniykichejqa janaj pachapi, kay pachapipis Diospuni.

¹² Chayrayku Tata Diospa sutinpi tilunawaykichejta mañakuykichej, aylluyta khuyanaykichejpaj, imaynatachus noqapis qankunata khuyaykichej, ajinata. Tiluwasqaykichejta junt'anaykichejta yachanaypaj, imallatapis prendata jina qowaychej ari.

¹³ Tatayta, mamayta, turaykunata, ñañaykunata, tukuy pikunachus paykunawan tiyakojkunata ama wañuchinkichejchu. Wañuchisqa kanamanta jark'akuwasqayku ari, nispa.

¹⁴ Chantá chay wateqajkuna kuticherqanku: Sichus kay nisqaykuta mana junt'aykumanchu chayqa, Dios wañuchiwachuyku. Qanrí kaypi kasqaykumanta amapuni pimanpis willankichu. Maypachachus Tata Dios kay jallp'ata qowasqayku chaypacha, noqayku nisqaykuta junt'aspa qanmanta khuyakusqayku, nispa.

¹⁵ Chantá Rajabqa ventanannejta paykunata uj waskhawan jawaman urayk'ucherqa, imaraykuchus wasenqa llajtaj phatu perqan patapi karqa.

¹⁶ Manaraj kacharparishaspa, Rajab paykunata nerqa: Orqorara cheqaman riychej, qankunata mask'asojkuna ama taripasunaykichejpaj. Chaypi kinsa p'unchayta pakakuychej, paykuna llajtaman kutimpunankukama, chantá ripuychej, nispa.

¹⁷ Chantá paykuna nerqanku: Noqaykoqa tiluspa qanman imatachus nisqaykuta junt'asqaykupuni.

¹⁸ Maypachachus kay llajtaman chayamusqayku chaypacha, urayk'uchiwarqayku, chay ventanaman kay puka waskhata watanki. Wasiykimantaj tantamunki tataykita, mamaykita, turaykikunata, chantá tukuy aylluykitawan.

¹⁹ Mayqellanpis wasiykimanta llojsinman chayqa, wañuchisqa kanqa, wañusqanmantataj noqaykoqa mana juchayojchu kasqayku. Sichus wasiykipi kashajkunata pipis imananman chayrí, noqayku juchayoj kasqayku.

²⁰ Kunan imatachus parlasqanchejta ama pimanpis willankichu. Sichus willawaj chayqa, tiluchiwasqaykuta manaña junt'asqaykuchu, nispa.

²¹ Rajabtaj kuticherqa: Nisqaykichejqa ajina kachun, nispa. Chaymantataj kachaporqa, paykunataj riporqanku. Chantá chay warmeqa puka waskhata ventananman wataykorqa.

²² Wateqajkunaqa orqorara cheqanejman rispa, chaypi kinsa p'unchayta pakakorqanku. Soldadokunataj tukuynejta mask'arqanku, mana maypi tarispataj, Jericó llajtaman kutiporqanku.

²³ Chaymanta chay iskay runakunaqa orqorara cheqamanta urayk'amorqanku, mayuta chimpaspataj, Nunpa churin Josué kasharqa, chayman kutiporqanku. Chantá payman imatachus rikusqankuta willarqanku.

²⁴ Paykuna Josueta nerqanku: Tata Diosqa chay tukuynin jallp'ata qowanchejña. Tukuy chaypi tiyakojkunaqa may jina mancharisqa kashanku, nispa.