Josué 19 - DIOSPA QHELQACHISQ

Simeón jatun aylloj jap'iynin

¹ Iskay kaj suertepi choqasqa jallp'ataj Simeón jatun aylluman, mashkhachus kasqankuman jina qosqa karqa. Simeón jatun aylloj jap'iynenqa Judá jatun aylloj chawpinpi karqa.

² Simeón jatun aylloj jap'iyninpi kaj llajtakuna kaykuna karqanku: Berseba, Sebá, Molada,

³ Jasar Súal, Balá, Esén,

⁴ Eltolad, Betul, Jormá,

⁵ Siclag, Bet Marcabot, Jasar Susá,

⁶ Bet Lebaot, chantá Sarujén ima. Chay tukuy llajta, jinataj juch'uy llajtankunantin ima chunka kinsayoj karqanku.

⁷ Chay jawa kay llajtakunata jap'illarqankutaj: Rimonta, Ayinta, Eterta, chantá Asanta ima. Chay llajtakuna, juch'uy llajtakunantin ima tawa karqanku.

⁸ Jinallataj Simeón jatun ayllumanta kajkunaqa Baalat Berkama chay llajtakunaj muyuyninpi kaj juch'uy llajtakunatawan jap'illarqankutaj, chaytaj uranej ch'innejpi Ramat llajtakama karqa. Chay jallp'amin Simeón jatun aylluman chayarqa, mashkhachus kasqankuman jina.

⁹ Simeón jatun aylloj jap'iynenqa Judá jatun aylloj jap'iynin chawpipi karqa, imaraykuchus Judá jatun aylloj jap'iynenqa jatun karqa. Chayrayku Simeón jatun aylloqa chaypi jallp'ata jap'erqa.

Zabulón jatun aylloj jap'iynin

¹⁰ Kinsa kaj suertepi choqasqa jallp'ataj Zabulón jatun ayllupajñataj karqa, mashkhachus kasqankuman jina. Chay jap'iypa mojonnenqa Saridkama karqa.

¹¹ Chaymanta mojonnenqa inti yaykuynejman Maralakama rillarqapuni, chaymantataj Dabesetkama, chaytaj Jocneanpa chimpan wayq'opi tukukorqa.

¹² Saridmanta chay mojonqa inti llojsimuynejman Quislot Taborkama rerqa, chaymanta Daberatman rerqa, chaymantataj Jafiaman wicharerqa.

¹³ Chaymanta mojonnenqa inti llojsimuynejman Gat Jeferman chayarqa, chaymantataj Itacasinman rerqa. Chaymantataj Rimonman Negáj muyuyninta llojserqa.

¹⁴ Wichaynejman mojonnenqa Janatonninta muyuykamorqa, chaymantataj Yeftajel valleman llojserqa.

¹⁵ Zabulón jatun aylloj jap'isqan jallp'api chunka iskayniyoj llajtakuna, chantá juch'uy llajtantinkuna ima karqanku. Chay llajtakunataj kaykuna karqanku: Catat, Nalal, Simerón, Idala, chantá Belén ima.

¹⁶ Chaymin Zabulón jatun aylloj jap'isqan jallp'a karqa, llajtantinkuna, chantá juch'uy llajtakunantin ima mashkhachus kasqankuman jina.

Isacar jatun aylloj jap'iynin

¹⁷ Tawa kaj suertepi choqasqa jallp'aqa mashkhachus kasqankuman jina Isacar jatun aylluman qosqa karqa.

¹⁸ Isacarpa jap'iyninpi llajtakuna karqanku: Jezrel, Quesulot, Sunén,

¹⁹ Jafarayin, Sijón, Anajarat,

²⁰ Rabit, Quisión, Abes,

²¹ Remet, Enganín, Enadá, chantá Bet Pasés ima.

²² Chay jallp'aj mojonnenqa Taborman, Sajazimaman, Bet Semesman ima chayarqa, tukukorqataj Jordán mayupi. Tukuyninpi chunka sojtayoj llajtakuna, chantá juch'uy llajtakunantin ima karqanku.

²³ Chaymin Isacar jatun aylluman chayasqan jallp'a karqa, llajtantinkuna, chantá juch'uy llajtakunantin ima mashkhachus kasqankuman jina.

Aser jatun aylloj jap'iynin

²⁴ Phishqa kaj suertepi choqasqa jallp'aqa mashkhachus kasqankuman jina Aser jatun ayllumanñataj chayarqa.

²⁵ Chay jap'iypi llajtakunataj karqanku: Jelcat, Jalí, Betén, Acsaf,

²⁶ Alamelec, Amad, chantá Misal ima. Aser jatun aylloj mojonnenqa inti yaykuynejman Carmelo orqokama, chantá Sijor Libnatkama chayarqa.

²⁷ Chaymantaqa inti llojsimuynejta Bet Dagonnejta muyuykamorqa, chayarqataj Zabulón jatun aylloj jap'iyninman, wichaynejpi Yeftajel valleman, chantá Bet Emecman, Neyelman ima. Wichaynejmantaj Cabulman llojserqa.

²⁸ Chaymanta mojonqa Hebronmanta Rejobman rillarqataj, Gamonman, Canaman ima, Sidón jatun llajtaman chayanankama.

²⁹ Chaymanta mojonnenqa Ramanejta muyuykamuspa, sumaj phatu perqawan muyuykuchisqa Tiro llajtakama chayarqa, chaymantataj Josanejta rerqa, Jatun Mama Qochamantaj llojserqa. Aser jatun aylloj jap'iynenqa Majaleb chantá Aczibkama karqa.

³⁰ Chaymanta Uma llajta, Afec, chantá Rejob llajta ima jap'iyninpi karqa. Tukuyninpi, iskay chunka iskayniyoj llajtakuna karqanku, muyuyninpi kaj juch'uy llajtakunantin ima.

³¹ Chaymin Aser jatun aylloj jap'iynin karqa, mashkhachus kasqankuman jina.

Neftalí jatun aylloj jap'iynin

³² Sojta kaj suertepi choqasqa jallp'aqa Neftalí jatun ayllumanñataj qosqa karqa, mashkhachus kasqankuman jina.

³³ Neftalí jatun aylloj jap'iyninkoj mojonnenqa Jelefmantapacha, Sananinpi encina sach'a qayllanta pasarqa, chaymantataj Adami Néqueb llajtanta, Jabnelninta, Lacunkama chayarqa, chantá Jordán mayupi tukukorqa.

³⁴ Inti yaykuynejpi mojonnenqa Aznot Tabornejta muyuykamorqa, chaymantataj Jucocnejta pasarqa, uranejtataj Zabulón jatun aylloj jap'iyninwan tinkuynejta muyuykamorqa. Inti chinkaykuynejmantaj mojonnenqa Aser jatun aylloj mojonninkama karqa. Inti llojsimuynejmantaj Neftalí jatun aylloj jap'iyninpa mojonnenqa Judá jatun aylloj Jordán mayukama chayarqa.

³⁵ Sumaj phatu perqawan muyuykuchisqa llajtakunataj kaykuna karqanku: Sidín, Ser, Jamat, Racat, Cineret,

³⁶ Adama, Ramá, Jazor,

³⁷ Cedes, Edrey, Enjazor,

³⁸ Irón, Migdal El, Jorén, Bet Anat, chantá Bet Semes ima. Tukuyninpi chay llajtakunaqa muyuyninpi juch'uy llajtakunantin ima chunka jisq'onniyoj karqanku.

³⁹ Chaymin Neftalí jatun aylloj jap'iynin karqa mashkhachus kasqankuman jina, llajtakunantin chantá juch'uy llajtakunantin ima.

Dan jatun aylloj jap'iynin

⁴⁰ Qanchis kaj suertepi choqasqa jallp'aqa Dan jatun ayllumanñataj chayarqa, mashkhachus kasqankuman jina.

⁴¹ Chay jap'iypi kay llajtakuna karqanku: Sorá, Estaol, Ir Semes,

⁴² Salbín, Ayalón, Jetla,

⁴³ Elón, Timnat, Ecrón,

⁴⁴ Elteque, Gibetón, Baalat,

⁴⁵ Jehúd, Bené Berac, Gat Rimón,

⁴⁶ Mejarcón, chantá Racón ima. Jinallataj Jopej chimpanpi kaj jap'iywan khuska kallarqataj.

⁴⁷ Chay jallp'a mana tukuyninkuman wakinanta qhawaspataj, Dan jatun ayllumanta kajkuna Lesén llajtaj contranta maqanakoj rerqanku. Chantá chay llajtata jap'ispa, chaypi tiyakojkunata tukuyninta wañuracherqanku. Ajinamanta paykunaqa chay jallp'api tiyakorqanku, chantá chay llajtata ñawpa tatanku Danpa sutinwan suticharqanku.

⁴⁸ Chaymin Dan jatun aylloj jap'iynin karqa, mashkhachus kasqankuman jina, llajtakunantin, chantá juch'uy llajtakunantin ima.

Josuéj jap'isqan jallp'a

⁴⁹ Tukuy Israel jatun ayllukunaman jallp'ata rak'irayta tukuytawantaj, israelitakunaqa jap'iyninku chawpipi Nunpa churin Josuemanñataj jallp'ata qorqanku.

⁵⁰ Tata Diospa kamachisqanman jina Josueman Timnat Seraj llajtata qoporqanku, Josué chayta mañakusqanman jina. Chay llajtaqa Efraín jatun aylloj jap'iynin orqorara cheqanejpi karqa. Josuetaj chay llajtata watej sayarichispa, chaypi tiyakorqa.

⁵¹ Nun churin Josuewan, sacerdote Eleazarwan chantá israelitakunaj kurajninkukunawan ima Silo llajtapi Dioswan Tinkukuna Toldoman yaykunapi tantakorqanku. Chantá Tata Diospa ñawpaqenpi suerteta choqaspa, sapa jatun aylluman jallp'ata rak'irarqanku. Ajinata jallp'a rak'inakuyta tukorqanku.