Josué 10 - DIOSPA QHELQACHISQ

Amorreokunata atipanku

¹ Jerusalenta kuraj kamachej Adonisedec Josuemanta uyarerqa imaynatachus Hai llajtata jap'isqanta, kuraj kamachejnintataj wañuchisqanta, chantá imaynatachus Jericó llajtata, kuraj kamachejnintawan chinkachisqanta. Uyarillarqataj Gabaón llajtayojkunapis israelitakunawan tratota ruwasqankuta, paykuna ukhupiñataj tiyakushasqankuta.

² Chayrayku maytapuni manchachikorqa, imaraykuchus Gabaón llajtaqa jatun llajta karqa, Hai llajtamantapis astawan jatun. Chaypi tiyakojkunaqa manchay kallpasapa runakuna karqanku.

³ Chayrayku Jerusalenmanta kuraj kamachej Adonisedecqa Hebronta kuraj kamachej Hoanman, Jarmut llajtata kuraj kamachej Piranman, Laquis llajtata kuraj kamachej Jafiaman, Eglonta kuraj kamachej Debirman ima willachimorqa, kay jinata nispa:

⁴ Jamuspa, Gabaonpa contranpi maqanakuyta yanapawaychej, imaraykuchus paykunaqa Josuewan, israelitakunawan ima uj tratota ruwaykusqanku, nispa.

⁵ Ajinamanta phishqantin amorreo kuraj kamachejkuna tantaykukorqanku Jerusalenmanta, Hebronmanta, Jarmutmanta, Laquismanta, Eglonmanta ima. Chantá paykunaqa tukuy soldadonkukunata tantaykuytawan, Gabaón llajtaj chimpanpi jarakuspa, llajtata jap'inankupaj wakichikorqanku.

⁶ Chantá Gabaón llajtayojkunaqa Josué Gilgalpi kashajtin willachimorqanku: Ama mana niwaykuchu, kay kamachiykikunata yanapaj jamuwayku. Usqhayllata jamuychej jark'akunawaykupaj, yanapanawaykupajtaj, imaraykuchus tukuy amorreokunaj kuraj kamachejninkukuna tantaykukuspa, noqaykuwan maqanakoj jamuykunku, nispa.

⁷ Chayrayku Josueqa, tukuy soldadonkunawan, chantá maqanakunapaj wapu kajkunawan ima Gilgalmanta rerqanku.

⁸ Tata Diostaj Josueta nerqa: Ama manchachikuychu, noqa paykunata atipaykuchisqaykichej, nitaj mayqenninkupis qanman sayaykuyta atenqankuchu, nispa.

⁹ Chantá Josueqa Gilgalmanta tukuy tutantin rispa, amorreokuna mana yuyashajtillanku paykunawan maqanakoj yaykorqa.

¹⁰ Tata Diostaj amorreokunata maytapuni musphacherqa, Israel soldadokunata rikusqankurayku. Ajinata Josueqa soldadonkunawan khuska Gabaonpi ashkha amorreo soldadokunata wañucherqanku. Chaymantaqa Bet Joronman wicharej ñannejta paykunata qhatiykorqanku, chantá Azecakama, Macedakama ima amorreokunata wañuchispa rillarqankupuni.

¹¹ Chantá amorreokuna Bet Jorón urayta israelitakunamanta ayqekushajtinku, Tata Diosqa paykunaj patankuman runtu chhikachajta chijchi parata parachimorqa. Chay chijchi para amorreokunata astawan ashkhata wañucherqa, israelitakuna espadawan wañuchisqankumanta nisqaqa.

¹² Maypachachus Tata Dios amorreokunata israelitakunawan atipaykucherqa chaypacha, Josueqa israelitakuna rikushajtinku, Tata Dioswan parlaspa, nerqa: Inti, Gabaonpi sayay. Qanpis killa, Ayalón vallepi sayallaytaj, nispa.

¹³ Intiwan, killawantaj sayarqanku, israelitakuna awqankuta tukuchinankukama. Chayqa Cheqan Runaj qhelqasqan qhelqapi kashan. Chantá inteqa uj p'unchayta jina, chawpi p'unchaypi sayarqa.

¹⁴ Chay jina jatun p'unchayqa mana jayk'ajpis karqachu, ni qhepamanpis kanqachu, imaraykuchus Tata Diosqa uj runaj mañakusqanta uyarerqa. Ajinata ruwarqa, imajtinchus Tata Diosqa chaypacha israelitakunaman kutikuspa, paykunarayku maqanakorqa.

¹⁵ Chay qhepata Josué, tukuy israelitakuna ima Gilgalpi jarankuman kutiporqanku.

¹⁶ Chay phishqa amorreo kuraj kamachejkunataj ayqekuspa, Macedapi chhanka jusk'uman pakaykukorqanku.

¹⁷ Jinapi Josueman willarqanku chay phishqa kuraj kamachejkuna Maceda chhanka jusk'upi pakakushasqankuta.

¹⁸ Chantá Josué kamacherqa: Jatuchaj rumikunata tanqaykuspa, chay chhanka jusk'uta wisq'aykuychej, punkumantaj qhawajkunata churaychej.

¹⁹ Qankunatajrí ama chayllapi kaychejchu. Awqaykichejta qhatiykuychej, qhepapi kaj soldadokunatataj wañurachiychej. Ama saqeychejchu llajtankuman kutejta, imaraykuchus Tata Diosniykichej makiykichejman paykunata jaywaykusunkichej, nispa.

²⁰ Jinataj Josuewan, israelitakunawan ima amorreokunata yaqha tukuyninkuta wañuracherqanku. Wakin qhepakoj amorreokunarí sumaj perqawan muyurisqa llajtakunaman pakaykukorqanku.

²¹ Israelitakunatajrí Macedapi jarankuman, maypichus Josué kasharqa chayman, tukuyninku walejpacha kutimporqanku. Chaymantaqa ni pi israelitakunaj contranta parlarej karqachu.

²² Chantá Josué nerqa: Chhanka jusk'uta kicharispa, chay phishqa kuraj kamachejkunata orqhomuychej, nispa.

²³ Ajinata israelitakunaqa chay phishqa kuraj kamachejkunata chhanka jusk'umanta orqhomorqanku. Chay kuraj kamachejkuna karqanku Jerusalenmanta, Hebronmanta, Jarmutmanta, Laquismanta, chantá Eglonmanta ima.

²⁴ Josueman pusamojtinkutaj, Josué israelitakunamanta tukuy qharikunata wajyarqa, jinataj soldadokunata kamachejkunaman nerqa: Qayllamuychej, chantá kay kuraj kamachejkunaj kunkankuman chakiykichejta churaychej, nispa. Paykunataj qayllaykuytawan, kuraj kamachejkunaj kunkankuman chakinkuta churarqanku.

²⁵ Chantá Josué nillarqataj: Ama manchariychejchu, nitaj llawch'iyaychejchu, astawanqa kallpachakuychej, waputaj kaychej, imaraykuchus Tata Diosqa ajinatapuni ruwanqa qankunawan maqanakoj tukuy awqaykichejta, nispa.

²⁶ Chaymanta Josueqa chay kuraj kamachejkunata espadawan wañuracherqa, jinaspataj, sapa ujta uj sach'aman warkhuracherqa. Chaypitaj ayankoqa ch'isiyaykunankama warkhurayarqa.

²⁷ Inti chinkaykushajtintaj, Josueqa chay warkhusqa ayakunata urayk'uchichimorqa. Chaymantataj, may jusk'upichus pakakusqanku chayllamantaj wijch'uykamunankuta kamacherqa. Israelitakunataj jusk'uman chay ayakunata wijch'uykamuytawan, punkuta jatuchaj rumikunawan sumajta wisq'aykorqanku. Chaytaj kunankama ajina kashan.

Waj llajtakunatapis jap'illankutaj

²⁸ Chay kikin p'unchayllataj Josueqa Maceda llajtata jap'ispa, chay llajtayojkunata, chantá kuraj kamachejnintapis espadawan wañuracherqa. Ajinata mana uj puchuyojta wañurachispa, ch'inpachata chay llajtata saqerparerqa. Maceda llajtaj kuraj kamachejninta ruwarqa, imaynatachus Jericó llajtaj kuraj kamachejninta ruwarqa, kikillantataj.

²⁹ Chantá Josueqa Macedamanta israelitakunata pusariykukuspa, Libna llajtatañataj muyuykuspa, maqanakorqa.

³⁰ Tata Diosqa chay llajtatapis, kuraj kamachejnintawan khuska israelitakunawan atipaykuchillarqataj. Chantá paykunaqa chay llajtapi tukuy tiyakojkunata ni ujta saqespa wañuracherqanku. Libna llajtaj kuraj kamachejnintapis, imaynatachus Jericó llajtaj kuraj kamachejninta ruwarqa, kikillantataj ruwarqa.

³¹ Chaymantataj Josuewan israelitakunawanqa Libna llajtata jap'iytawan, Laquis llajtamanñataj rerqanku. Chayman chayaspataj, llajtata muyuykuytawan maqanakorqankupacha.

³² Q'ayantintaj Tata Diosqa Laquis llajtayojkunata israelitakunawan atipaykucherqa. Paykunaqa chay llajtapi tukuy tiyakojkunata wañuracherqanku, imaynatachus Libna llajtapi ruwarqanku, kikinta.

³³ Chantá Guezermanta Horán sutiyoj kuraj kamachejñataj Laquis llajtayojkunaman kutikuspa, israelitakunawan maqanakoj tukuy soldadonkunawan jamorqa. Chaywanpis Josueqa paytapis, jinataj tukuy soldadonkunatawan ima, tukuyninta wañuracherqa.

³⁴ Chantá Josueqa tukuy israelitakunawan ima Laquis llajtamanta Eglón llajtamanñataj rerqanku. Eglón llajtaman chayaspataj, maqanakorqankupacha.

³⁵ Chantá chay p'unchaypacha chay llajtata jap'ispa, chay llajtapi tukuy tiyakojkunata espadawan wañuracherqanku, imaynatachus Laquispi ruwarqanku, jinallatataj.

³⁶ Eglón llajtamanta Hebrón llajtamanñataj Josuewan, tukuynin israelitakunawan rispa, maqanakullarqankutaj.

³⁷ Chay llajtaman yaykuytawan, kuraj kamachejninta, jinallataj tukuy chay llajtapi tiyakojkunata espadawan wañuracherqanku. Jinallataj qayllanpi llajtakunapipis, imaynatachus Eglonpi ruwarqanku, kikinta ruwallarqankutaj.

³⁸ Chantá Josueqa, tukuy israelitakunawan ima Debir llajtamanñataj kutirimuspa, chay llajtayojkunawan maqanakullarqankutaj.

³⁹ Chay Debir llajtaman yaykuykuspataj, kuraj kamachejninta, chay llajtapi tukuy tiyakojkunatawan ima ni uj puchuyojta espadawan wañuracherqanku. Jinallataj qayllanpi llajtakunapipis tukuynin runakunata wañuracherqanku, imaynatachus Hebronta, Libnata, kuraj kamachejninta ima ruwarqanku, ajinata.

⁴⁰ Ajinata Josueqa chay tukuynin llajtata jap'erqa, orqo kinraykunapi tiyakoj kuraj kamachejkunata wañurachispa. Néguev orqokunapi, wichay pampakunapi, wichaynejpi tiyakojkunata ima tukuynintapuni wañuracherqa, Israelpa Tata Diosnin kamachisqanman jina.

⁴¹ Chay kuraj kamachejkunata wañurachispa, Josueqa Cadés Barneamantapacha Gazakama, chantá tukuy Gosén jap'iyta Gabaonkama jap'ikaporqa.

⁴² Ajinata Josueqa ujllapi jallp'ankuta jap'ikaporqa, imaraykuchus Israelpa Tata Diosnin israelitakunaman kutikuspa, paykunarayku maqanakorqa.

⁴³ Chaymanta Josueqa tukuy israelitakunawan ima Gilgalpi jarankuman kutiporqanku.