Josué 1 - DIOSPA QHELQACHISQ

Diosqa Josueta churan

¹ Tata Diospa kamachin Moisés wañupusqanmanta qhepata, Tata Diosqa Moisesta yanapaj Nunpata churin Josueman kay jinata nerqa:

² Kamachiy Moisés wañupunña. Kunanqa, qan tukuynin israelitakunata Jordán mayuta chimpachinayki tiyan, noqa qosqaykichej, chay jallp'aman rinaykichejpaj.

³ Imaynatachus Moisesman nerqani jina, maymanchá chakiykichej saruykonqa, noqa chay tukuy jallp'ata qankunaman qosqaykichej.

⁴ Jallp'aykichejqa ch'innejmantapacha Libanokama, jinataj Éufrates jatun mayukama kanqa. Chantá tukuynin jititakunaj jallp'anku Jatun Mama Qochakama qankunajta kallanqataj.

⁵ Kawsanaykikamaqa, mana pipis atipasonqachu, imaraykuchus noqa qanwan kasaj, imaynatachus Moiseswan karqani, ajinata. Mana jayk'ajpis saqesqaykichu, nitaj wijch'urpasqaykichu.

⁶ Chayrayku kallpachakuy, waputaj kay. Qanmin chay jallp'ata israelitakunaman chayaqenkupaj rak'iranki, ñawpa tataykichejkunaman qonayta nerqani, chayta.

⁷ Chayrayku kallpachakuy, waputaj kay, kamachiy Moisés kamachisusqanman jina tukuyninta junt'anaykipaj. Chaytaqa junt'aypuni ari, ama ni uj chhikanta karunchakuspa, imatachus nisqanta kikinta ruwaspa, tukuy ima ruwasqaykipi allin risunanpaj.

⁸ Diospa kamachisqan qhelqamanta k'iskimanta parlay. Tuta p'unchay unanchay, imatachus nisqanta ruwanaykipaj, ajinamanta tukuy ima ruwasqaykipi allin risunanpaj.

⁹ Noqamin kamachiyki: Sumajta kallpachakuy, waputaj kay. Ama manchachikuychu, nitaj q'ewakuychu. Noqa Tata Diosniyki qanwanpuni kasaj, maymanchá rinki, chaypi, nispa.

Josué israelitakunawan ima wakichikunku

¹⁰ Chantá Josueqa israelitakunaj kurajninkukunata kamacherqa:

¹¹ Tukuynin jaraman rispa, runata kamachiychej qoqawita wakichikunankuta, imaraykuchus kaymanta kinsa p'unchayman Jordán mayuta chimpasunchej, Tata Diosninchej qowasunchej, chay jallp'ata jap'ikapunanchejpaj, nispa.

¹² Chantá Josueqa Rubén jatun aylluman, Gad jatun aylluman, Manasés khuskan jatun aylluman ima nillarqataj:

¹³ Yuyarikuychej Tata Diospa kamachin Moisés imatachus nisorqachej, chayta. Chaypacha nerqasunkichej: Tata Diosniykichej qankunaman kay jallp'ata qosunkichej chaypi tiyakunaykichejpaj, nispa.

¹⁴ Chayrayku Jordán mayumanta inti llojsimuynejpi, maypichus Moisés jallp'ata qosorqachej, chaypi warmiykichejta, wawaykichejta, uywaykichejtapis saqenkichej. Tukuy qhari maqanakupaj jina kajkunataj armaykichejta oqharikuspa, wawqeykichejkunata yanapanaykichejpaj Jordán mayuta chimpanaykichej tiyan.

¹⁵ Ajinata Tata Dios paykunamanpis qankunaman jina tiyakunankupaj jallp'ata qonankama ruwankichej, imaynatachus qankunaman qosorqachej, ajinata. Ajinamanta paykunapis Tata Diosniykichej jallp'a qosqanmanta dueño kanqanku. Chaymantataj Tata Diospa kamachin Moisés Jordán mayumanta inti llojsimuynejpi jallp'ata qorqasunkichej, chayman kutimpuyta atinkichej, jap'isqaykichej jallp'api tiyakunaykichejpaj, nispa.

¹⁶ Chantá paykuna Josueman kuticherqanku: Tukuy nisqaykita ruwasqayku, risqaykutaj, maymanchá kachawasqayku, chayman.

¹⁷ Imaynatachus Moisesta kasorqayku, ajinallatataj qantapis kasusqaykupuni. Tata Diosniykitaj qanwanpuni kachun, imaynatachus Moiseswan karqa, ajinata.

¹⁸ Pillapis kamachisqaykita mana kasukuyta munajqa, chayrí churanakojqa, wañuchisqa kachun. Qanqa sinch'ita kallpachakuy, waputaj kay, nispa.