Jonás 4 - DIOSPA QHELQACHISQ

Jonás Tata Dioswan siminakun

¹ Chaywanpis Tata Dios Nínive llajtayojkunata mana jasut'isqanqa Jonasman mana allinchu rijch'arqa. Chayrayku Jonás mayta phiñarikorqa.

² Chantá Tata Dioswan parlarikuspa, kay jinata nerqa: Ay, Tata Dios, kaytamá nerqani llajtaypi kashaspallaraj. Chayrayku Tarsisman ayqerqani. Yachani ari, khuyakuyniyoj, jatun sonqoyoj, mana usqhayllata phiñakoj, chhikatapuni munakoj Dios ima kasqaykita. Yachallarqanitaj qan: Chay runakunata millayta ruwasqankumanta jasut'isaj, nishaspapis, mana jasut'inaykita.

³ Chayrayku kunanqa, Tata Dios, mañakuyki wañuchinawaykita. Astawan allin kanman wañupunay kawsanaymantaqa, nispa.

⁴ Tata Diostajrí kuticherqa: Ajinata phiñakuspa, yuyankichu allinta ruwashasqaykita? nispa.

⁵ Chantá Jonás llajtamanta inti llojsimuynejman rerqa. Chaynejpitaj ch'ujllata ruwaspa, llanthunpi tiyaykukorqa, chay llajtawan imachus kananta rikunanpaj.

⁶ Jinapi Tata Dios uj mathi yurata wiñacherqa, chaytaj ch'ujllaman ch'ipakuspa wiñaykusqanmanta, Jonaspa umanta llanthunanpaj, jinamanta Jonás aswan allinpi kananpaj. Jonastaj chay yura ch'ujllaman ch'ipakuspa winaykusqanmanta mayta kusikorqa.

⁷ Q'ayantin paqarintajrí Tata Dios chay mathi yurata khuruwan k'utuykucherqa, jinataj mathi yuraqa ch'akiporqa.

⁸ Inti llojsimuytataj Tata Dios sinch'i q'oñi wayrata inti llojsimuynejmanta wayrachimorqa. Jinapi intej ruphaynin Jonaspa umanta sinch'ita k'ajaykorqa, chayraykutaj Jonaspa yuyaynin chinkanayarqa. Paytaj wañuyta munaspa, nerqa: Astawan allin kanman wañupunay, kawsanaymanta nisqaqa, nispa.

⁹ Chantá Tata Diosqa Jonasta nerqa: Chay jinatapunichu phiñakunki, mathi yura ch'akirpayasqanmanta? nispa. Jonastaj kuticherqa: Arí, rabiawan wañushaniña, nispa.

¹⁰ Tata Diostaj kuticherqa: Mathi yurataqa mana qanchu tarporqanki, nitaj qanchu wiñacherqanki. Manachayqa p'utuytawan, uj tutalla wiñarqa, q'ayantin tutataj ch'akiporqa. Chayllamantaraj sonqoyki nanasunki.

¹¹ Noqarí Nínive llajtamanta manachu astawanraj khuyakunay karqa? Chay llajtapi tiyan 120.000 wawakuna, pikunachus mana yachankuchu allin kajta, mana allin kajta. Jinallataj ashkha uywakunapis kallantaj, nispa.