Jonás 3 - DIOSPA QHELQACHISQ

Nínive llajtayojkuna Diosman kutirikunku

¹ Chantá Tata Dios ujtawan Jonasta parlapayaspa, kamacherqa:

² Nínive jatun llajtaman riy, chantá willamuy, imatachus noqa nisqayki, chayta, nispa.

³ Chantá Jonás sayariytawan, Tata Diospa kamachisqanman jina Niniveman purirerqa. Niniveqa jatun llajta karqa. Ujnin kantunmanta ujnin kantunkama kinsa p'unchay puriy karqa.

⁴ Chantá Jonás llajtaman uj p'unchay puriyta jina yaykuspa, Diospa nisqanta tukuyman willararqa: Kaymanta tawa chunka p'unchayman Diosqa kay Nínive llajtata chinkarparichenqa, nispa.

⁵ Jinamanta chay llajtapi tiyakojkuna Diospa nisqanta jap'ikorqanku. Chantá tukuy ayunanankuta nerqanku, jinallataj juchankumanta sinch'i llakisqa kashasqankuta rejsichinankupaj jatunpaj qhawasqa kajkunamanta mana kasu ruwana kajkunakama qhashqa p'achata churakorqanku.

⁶ Niniveta kuraj kamachejpis Jonaspa willasqanmanta yachaspa, kamachinan tiyanamanta urayk'orqa. Chantá kamachinan p'achata lluch'ukuspa, qhashqa p'achata churaykorqa, ushpha patapitaj tiyakorqa.

⁷ Chantá chay kuraj kamachej, jinataj yanapajninkuna ima tukuy Nínive llajtapi tiyakojkunata kamacherqanku: Ni pi runa, ni uywapis imatapis mikhuchunkuchu, nitaj yakutapis ujyachunkuchu.

⁸ Manachayqa qhashqa p'achata churakuspa, tukuyniykichej sinch'ita Diosmanta mañakuychej. Sapa ujniykichej millay purinata saqeychej, amañataj kallpaman atinikuspa, runata waqachiychejchu.

⁹ Ichapis Dios imatachus nisqanta manaña ruwanmanchu, k'araj phiñakuynintaj tiyaykunman, jinamanta mana wañunanchejpaj, nispa.

¹⁰ Chantá Dios Nínive llajtayojkuna millay puriyninkuta saqesqankuta rikuspa, imatachus nisqanta manaña ruwarqachu.