Jonás 2 - DIOSPA QHELQACHISQ

Jonás Diosmanta mañakun

¹ 1 (2) Chaymanta Jonás challwaj wijsan ukhupi Tata Diosmanta

² 2 (3) ajinata mañakorqa: Tata Diosníy, may llakiyniypi qhaparikamorqayki, qantaj uyariwanki. Wañuy patapi kashaspa, qhaparikamorqayki, qantaj uyariwarqanki.

³ 3 (4) Mama qocha ukhuman wijch'uykuwarqanki, yakutaj ukhuman chinkaykuchiwarqa. Qhollchoqeyachisqayki yaku patayta pasaspa, p'ampaykuwarqa.

⁴ 4 (5) Jinapi noqa nerqani: Tata Dios, qan ñawpaqeykimanta wijch'uwarqayki. Kunantaj manaña Temploykita ujtawan rikusajchu, nispa.

⁵ 5 (6) Yakoqa p'ampaykuwarqa, mama qochaj sonqonmantaj chinkaykorqani. Laqhopis umayman mayt'uykukuwarqa.

⁶ 6 (7) Mama qochaj pampankama chinkaykorqani. Jallp'aj sonqonpi wiñaypaj wisq'asqa kanaypaj jina rikhurerqani. Qantajrí, Tata Diosníy, jallp'aj sonqonmanta orqhowarqanki.

⁷ 7 (8) Wañupushaspaña, qanmanta yuyarikorqani, mañakususqaytaj Temploykiman chayarqa.

⁸ 8 (9) Lantikunata yupaychajkuna qanta wasanchasunku.

⁹ 9 (10) Noqatajrí qanta yupaychaspa, q'olachinapaj uywa ñak'asqata jaywasqayki, imatachus ruwasaj nisusqaytapis junt'asajpuni. Qanllamin, Tata Dios, qhespichiwayta atinki, nispa.

¹⁰ 10 (11) Chaymanta Tata Dios chay jatun challwata kamacherqa mama qocha kantuman rispa, Jonasta ajturparinanta.