Jonás 1 - DIOSPA QHELQACHISQ

Jonás Diosmanta ayqeyta munan

¹ Uj p'unchay Tata Dios Amitaypa churin Jonasta nerqa:

² Kunanpacha Nínive llajtaman puririy, chaypitaj willamuy noqa chay llajtata chinkarparichinayta, imaraykuchus rikuni ruwasqanku may millay kasqanta, nispa.

³ Jonastajrí Diospa nisqanta kasunantaqa, Tata Diosmanta ayqeyta munarqa, jinataj Jatun Mama Qocha kantupi kaj Jope llajtaman urayk'orqa. Chaypi Jonás uj barcota Tarsisman puririshajtaña tarerqa. Pasajeta rantikuspataj, barcoman wicharerqa. Ajinamanta Jonasqa Tata Diosmanta ayqeyta munarqa.

⁴ Chaywanpis Tata Dios sinch'ita wayrachimorqa, jinataj mama qocha chawpitaña barco rishajtin, maytapuni para wayra yakuta qhollchoqeyachispa, barcota phirinanpaj jina kasharqa.

⁵ Jinapi barcota purichejkuna mayta manchachikuspa, sapa ujninku diosninkuman qhaparikorqanku. Chantá barco chhallayananpaj, cargata yakuman wijch'uykorqanku. Jonastajrí chaykama barcoj ukhunman yaykuspa, chaypi misk'ita puñusharqa.

⁶ Chantá barcopi kamachej chimpaykuspa, Jonasta nerqa: Puñuysiki, imaraykutaj puñushankiri? Jatariy, Diosniykiman qhaparikuy, ichapis pay khuyarikuwasunman ama wañunanchejpaj, nispa.

⁷ Chantá barcota purichejkuna ninakorqanku: Pichus juchayoj kasqanta yachananchejpaj suerteta choqanachej, ajinamanta yachananchejpaj pejpa juchanraykuchus kay jina llakiy qhatirishawasqanchejta, nispa. Jinataj suerteta choqajtinku, Jonás juchayoj rikhurerqa.

⁸ Chaymanta paykuna Jonasta taporqanku: Sut'inta niwayku: Imaraykutaj kay llakiy qhatirishawanchejri? Ima ruwanayojtaj kankiri? Maymantataj kanki? Maytaj llajtaykiri? Ima ayllumantataj kankiri? nispa.

⁹ Jonastaj kuticherqa: Hebreo kani, noqataj Tata Diosta yupaychani, janaj pachapi kaj Diosta. Paymin mama qochata, kay pachatapis ruwarqa, nispa.

¹⁰ Chayta uyarispa, barcota purichejkuna maytapuni manchachikorqanku, nerqankutaj: Imaraykutaj chayta ruwarqankiri? nispa. Paykuna yacharqanku Jonasqa Tata Diosmanta ayqeshasqanta, imaraykuchus chayta payllataj rimarerqa.

¹¹ Chantá Jonasta taporqanku: Mama qocha tiyaykunanpaj imatataj qanwan ruwasqaykuri? nispa. Chaykamataj yaku astawan astawan qhollchoqeyasharqa.

¹² Jonastaj paykunaman nerqa: Mama qochaman wijch'uykuwaychej, jinataj para wayra thañiponqapacha. Juchayoj kasqayta yachani, noqarayku kay sinch'i para wayra jatarin, nispa.

¹³ Barcota purichejkunatajrí may jinata kallpakorqanku qocha kantuman barcota chayachinankupaj, nitaj aterqankuchu, imaraykuchus mama qochapi yaku astawan astawan qhollchoqeyasharqa.

¹⁴ Chantá Tata Diosmanta mañakorqanku: Tata Dios, ama kay runarayku wañuchiwaykuchu. Sichus pay mana juchayoj chayqa, wañusqanmanta ama juchachawaykuchu, imaraykuchus qanqa munasqaykiman jina imatapis ruwanki, nispa.

¹⁵ Chantá barcota purichejkuna Jonasta oqhariytawan, mama qochaman wijch'uykorqanku, yakutaj chay jinata qhollchoqeyashaspapis, ujllata tiyaykorqapacha.

¹⁶ Chayta rikuspa, paykuna Tata Diosta maytapuni manchachikorqanku. Chayrayku uywa ñak'asqata jaywarqanku, nerqankutaj payllata yupaychanankuta.

¹⁷ 17 (2.1) Chaywanpis Tata Dios uj jatun challwata kacharqa Jonasta oqoykunanpaj. Jonastaj challwaj wijsanpi kinsa p'unchaytawan, kinsa tutatawan karqa.