Joel 2 - DIOSPA QHELQACHISQ

Phinki phinkikuna soldadokuna jina junt'aykunku

¹ Sión orqopi putututa waqachiychej. Noqaj ajllakusqay orqopitaj sinch'ita qhapariychej. Judá suyupi tiyakojkuna, tukuyniykichej kharkatitiychej, imaraykuchus Tata Diospa p'unchaynin chayamushanña.

² Chay p'unchayqa tutayaj, laqhayaj kanqa, yanayarishaj phuyuwan laqhayachisqa p'unchay kanqa. May atiyniyoj ashkha soldado jina orqo patamanta mast'alla junt'aykamunku, imaynatachus sut'iyayta inti k'anchay orqota wasaykamun, ajinata. Chayman rijch'akojqa mana jayk'ajpis karqachu, nitaj jayk'ajpis kanqachu.

³ Chaykuna, imaynatachus nina tukuy ima tarisqanta ruphaykun, ajinata ruwanku. Manaraj chay p'unchay chayamushajtin, jallp'aqa Edén huerta jina karqa. Ripojtinkurí, ch'in q'ara pampaman tukun. Paykunaj makinkumantaqa mana imapis llusp'inchu.

⁴ Caballokunaman rijch'akunku, caballopi purej jinataj t'ijurinku.

⁵ Orqonejpi phawasqankoqa maqanakupi carretakunaj takanakusqanman rijch'akun. Imaynatachus ch'aki laqhe ruphajtin sonarin, ajinata sonarinku. Ashkha atiyniyoj soldadokuna jina maqanakoj yaykunankupaj wakichisqa kanku.

⁶ Chayta rikuspa, runakuna kharkatitinku, uyankutaj q'elluman tukun.

⁷ Chay jamojkunaqa wapu soldadokuna jina llump'irispa, perqata wasaykunku, sapa ujpis ni mayman q'ewirispa cheqanta rinku.

⁸ Mana paykunapura ñit'inakunkuchu, manachayqa sapa ujpis ñannillanta rin. Flechakunaj chawpinta mana p'itikuspa cheqanta rillankupuni.

⁹ Llajtaman yaykuykunku, perqa patata, wasi patantapis wasaykunku. Suwakuna jina ventananta yaykuykunku.

¹⁰ Jallp'a kharkatitin paykunaj ñawpaqenkupi. Janajpis chujchurin. Intipis, killapis laqhayaykunku, ch'askakunataj ayphuyaykunku.

¹¹ Tata Diosqa soldadonkunaj ñawpaqenkupi purispa, qhon qhon jina kamachisqanta uyarichin. Soldadonkuna may ashkhapuni kanku, kamachisqanta junt'ajkunataj may atiyniyoj kanku. Tata Diospa p'unchaynenqa manchay t'ukuna, manchachikunataj. Manataj pipis ñawpaqenpi sayayta atej kanchu.

Tata Diospa khuyakuynin

¹² Chayrayku Tata Dios nin: Noqaman tukuy sonqo kutirikamuwaychej ayunaspa, waqaspa, llakikuspa ima.

¹³ Sinch'i llakisqa kasqaykichejmanta p'achaykichejta llik'inaykichejtaqa sonqoykichejta p'akikuychej, nispa. Tata Diosniykichejman kutirimpuychej, imaraykuchus Tata Diosqa may khuyakuyniyoj, jatun sonqoyojtaj. Jinallataj pay may pacienciayoj, tukuy munakuyniyojtaj. Jasut'inan kashajtinpis, payqa runaj juchanta pampachan.

¹⁴ Ichapis Tata Dios manaña nisqanman jina qankunata jasut'isonqachejchu. Aswanpis khuyarikuspa, chajrata poqochipusonqachej, vinotawan qosonqachej, Tata Diosniykichejman jaywanaykichejpaj.

¹⁵ Sión orqopi putututa waqachiychej. Tukuy runata tantaspa, ayunanankuta willaraychej.

¹⁶ Diospa ayllunta tantaykuspa, paykunata llimphuchaychej, Diospa ñawpaqenpi llimphupaj qhawasqa kanankupaj. Machu runakunata, wawakunata, ñuñushaj wawakunata ima tantaychej. Kunallanraj casarakojkunapis puñunanku wasimanta llojsimuchunku.

¹⁷ Templopi altar qayllapi Tata Diospaj ruwanayoj sacerdotekunapis waqaspa kay jinata mañachunku: Tata Diosniyku, kay tukuy runaj juchankuta pampachay ari. Ama saqeychu qanpata kajkunamanta pipis alqochakunanta. Amallataj saqeychu waj suyumanta runakuna suyuykita kamachinankuta. Amallataj saqeychu qanta mana manchachikojkuna ninankuta: Maypitaj kashan israelitakunaj Diosninkuri? nispa.

¹⁸ Chaypacha Tata Dios ayllunman munakuyninta rikuchenqa, suyunpi kajkunamantataj khuyakonqa.

¹⁹ Chantá paykunata nenqa: Noqa sajsanaykichejkama mikhunaykichejpaj qosqaykichej trigota, vinota, aceiteta ima, manataj saqesajchu noqata mana manchachikojkuna qankunamanta alqochakunankuta.

²⁰ Jinallataj wichaynejmanta jamoj phinki phinki khurukunata qankunamanta karunchachisaj, paykunatataj ch'innejman wijch'usaj. Ñawpajpi kajkunata Wañusqa Qochapi jeq'eqachisaj, qhepapi kajkunatataj mama qochapi p'ultiykuchisaj. Wañusqa phinki phinkikunaqa asnaykonqanku, imaraykuchus noqa Tata Diosqa t'ukuna imakunata ruwasaj, nispa.

²¹ Kay pacha, mayta kusikuy, amataj manchachikuychu, imaraykuchus Tata Dios t'ukunata ruwanqa.

²² K'ita animalkuna, ama manchachikuychejchu, imaraykuchus pasto watej q'omeryanqa. Sach'akunapis poqonqanku, jinataj higopis, uvapis atipasunaykichejpaj jina poqonqa.

²³ Sionpi tiyakojkuna, mayta kusikuychej. Kusikuychej Tata Diosniykichejpi. Paymin maychus tiemponpi parachimusonqachej. Paymin ñawpaj kaj parata, qhepa kaj paratapis parachimusonqachej, ñawpaj tiempopi jina.

²⁴ Chayrayku trigo oqharina may chhika kanqa. Vinopis, aceitepis ashkhallataj kanqa.

²⁵ Tata Dios nin: Noqa qankunaj contraykichejpi chajraykichejta tukuykunankupaj kachamorqaykichej soldadokunata jina may chhika phinki phinkikunata. Chaywanpis imatachus mikhukapusqankuta kutichipusqaykichej.

²⁶ Chantá qankuna sumajta sajsakunaykichejkama mikhunkichej, Tata Diosniykichejtataj yupaychawankichej. Noqamin chay t'ukunata qankunarayku ruwasaj. Chayrayku qankuna aylluy manaña jayk'ajpis p'enqachisqachu kankichej.

²⁷ Ajinata yachankichej noqa Tata Diosqa qankuna ukhupi kashasqayta. Noqamin Tata Diosniykichej kani, manataj waj Dios kanchu. Aylloyqa mana jayk'ajpis ujtawan p'enqaypi rikhurenqañachu.

Diospa Espíritun jamonqa

²⁸ 28 (3.1) Kay tukuymanta qhepaman, tukuy runaman Espirituyta kachaykamusaj. Churiykichejkuna, jinataj ususiykichejkunapis noqaj sutiypi sut'inchanqanku. Unayniyoj runakunapis mosqokullanqankutaj. Waynakunapis mosqoypi jina imakunata rikullanqankutaj.

²⁹ 29 (3.2) Jinallataj wata runakunaman, qhari kajman, warmi kajmanpis chay p'unchaypi Espirituywan junt'achisaj.

³⁰ 30 (3.3) Janajpi t'ukunata ruwasaj, kay pachapitaj yawarta, ninata, phuyu jina q'oshñitawan rikuchisaj.

³¹ 31 (3.4) Inteqa laqhaman tukonqa, killataj yawar jina puka kanqa, Tata Diospa manchachikuna p'unchaynin manaraj chayamushajtin.

³² 32 (3.5) Chaywanpis pikunachus noqa Tata Diospa sutiyta oqharispa Diosninkupaj rejsikapuwajkunaqa wañunamanta qhespichisqa kanqanku. Noqa Tata Dios nisqayman jina Sión orqopi, Jerusalenpi ima paykunata qhespichisaj. Pikunatachá noqa ajllasaj, chaykunamin kawsanqanku.