Job 8 - DIOSPA QHELQACHISQ

Bildadñataj Jobta k'amin

¹ Chantá Súaj cheqanejmanta Bildadñataj Jobta nerqa:

² Mayk'ajkamataj chay jinata parlankiri? Parlasqaykeqa sinch'i muyoj wayraman rijch'akun.

³ Tukuy Atiyniyoj Diosqa cheqan kajta mana q'ewinchu, nillataj justiciatapis.

⁴ Wawaykikunachari Diospa contranta juchallerqanku, Diostaj juchankuman jina paykunata jasut'erqa.

⁵ Tukuy Atiyniyoj Diosta mask'ay, qanmanta khuyarikusunanta mañarikuy.

⁶ Sichus qan cheqan sonqowan, cheqantataj purinki chayqa, Tata Dios qhawarisonqa, tukuy imaykitataj kutichipusonqa.

⁷ Ñawpajta imaykichus tiyapusorqa, chaykunaqa mana imachu kanqa, qhepaman tiyapusonqa chaykunamanta nisqaqa.

⁸ Ñawpa runakunata tapurikuy, ñawpa runakunaj yachasqankumantataj yachakuy.

⁹ Noqanchejqa qaynallamantaraj kanchej, manaraj imatapis yachanchejchu. Kay pachapi kawsayninchejqa llanthu jinalla ripun.

¹⁰ Ñawpa runakuna parlasuspa, tukuy imata yachachisonqanku.

¹¹ Qhochi mana kajtenqa, t'uturaman rijch'akoj papiro qhora wiñanmanchu? T'uturaqa maypichá mana yaku kanchu, chaypi wiñanmanchu?

¹² Chaywanpis q'omerlla kashaspa mana ruthusqalla, tukuy qhoramanta astawan ñawpajta ch'akipun.

¹³ Millayta ruwaspa purejkunawan jinallataj kashan, pikunachus Diosta qonqapunku, chaykunawan. Imatachus suyashanku, chayqa manakajman tukun.

¹⁴ Imatachus suyasqanku, imapichus atinikusqankoqa kusikusej llikhan jinalla kanku.

¹⁵ Kusikusej llikhanmanta jap'ikuyta munanqanku, chaytaj llik'irparikonqa. Kusikusej llikhanman ch'ipakonqanku, chaytaj mana awantanqachu.

¹⁶ Millayta ruwaspa purejkunaqa intej rikunanpi q'omer qhora jina kanku, mayqenchus wiñaspa, tukuy huertaman junt'aykun, ajina.

¹⁷ Saphinkoqa qaqa ukhuman chinkaykun, rumimantaj ch'ipaykukunku.

¹⁸ Pillapis chaymanta t'irajtinrí, chaypi wiñasqankuta mana pipis yachanmanchu.

¹⁹ Kusirikuspa kawsasqankoqa ajinata tukukaponqa, maypichus wiñarqanku chaynejpi waj qhorañataj wiñanqa.

²⁰ Diosqa cheqan runata mana saqerparinchu, nitaj millayta ruwaspa purejkunatapis yanapanqachu.

²¹ Payqa ujtawan asirichisonqa, kusiymantataj jatunmanta qhaparinki.

²² Awqaykikunaqa p'enqaymanta wañonqanku, millayta ruwaspa purejkunaj wasinkutaj thuñisqa kanqa, nispa.