Job 40 - DIOSPA QHELQACHISQ

¹ Tata Dios Jobta nillarqapuni:

² Tukuy Atiyniyoj Dioswan churanakoyqa yuyayniyoj kaychu kanman? Pichus Dioswan churanakoj kutichinan tiyan, nispa.

Job kutichin

³ Chantá Job Tata Diosman kuticherqa:

⁴ Mana imapis kashaspa, ima nispataj qanman kutichiykimanri? Noqapajqa ch'inlla kakunay aswan walej.

⁵ Noqaqa ashkha kutitaña parlani, manaña astawan imatapis niymanñachu, nispa.

Diosqa Tukuy Atiyniyoj kasqanta Jobman rikuchin

⁶ Chantá Tata Diosqa ujtawan Jobman sinch'i muyoj wayra chawpimanta parlamorqa:

⁷ Kunan may wapu kasqaykita rikuchiway, kayta tapususqaymantaj kutichiway:

⁸ Qanqa justicia ruwasqaytachu qhasi manakajpaj jap'inki? Qan mana juchayoj rikhurinaykipajchu juchachayta munawanki?

⁹ Qanqa noqa jina atiyniyojchu kanki? Qanpa sinch'i parlasqaykeqa noqaj parlasqay jinachu?

¹⁰ Jina kajtenqa, jatun kaywan, sumajpaj qhawasqa kaywan ima p'achallikuy. Yupaychasqa kaywan, jatunchasqa kaywantaj qhataykukuy.

¹¹ Qhawariy tukuy jatunchakojkunata, chantá sinch'i phiñakuyniykita kacharispa, paykunata k'umuykuchiy.

¹² Jatunchakojkunata qhawarispalla phiriy, millayta ruwaspa purejkunatataj maypichus kashanku, chaypi saruy.

¹³ Tukuyninkuta jallp'aman p'ampaykuy, wañusqakunaj carcelninkuman paykunata wisq'aykuy.

¹⁴ Chaymantaraj noqa kikiy nisaj, kallpayki tukuy imata atipachisusqanta.

¹⁵ Sierpe Behemotta qhawariy, chaypis qan jina noqaj ruwasqallaytaj kashan. Payqa waka jina qhorata mikhun.

¹⁶ Chay animalpa kallpanqa wasanpi kashan, sinch'i kasqanpis mat'anpi kashan.

¹⁷ Chupanqa cedropis kanman jina chuki, chaki ankunkunapis simp'asqa jina kanku.

¹⁸ Tullunpis broncemanta ruwasqa vara jina kanku, fierromanta varillapis kanman jinataj.

¹⁹ Chay sierpeqa tukuy imamanta aswan ñawpaj ruwasqay karqa. Chaytaqa noqalla ruwaj jina wañuchiyta atini.

²⁰ K'ita animalkuna pujllanku chay orqokunapi, pay mikhunanpaj qhora wiñan.

²¹ Behemot sierpeqa soqosu chawpipi winkun, qhochipi t'utura ukhupi pakakun.

²² Ch'awjra urapi llanthukun, mayukunapi saucekunataj muyuykunku.

²³ Mayu wiñaspa wasaykojtinpis, mana mancharinchu. Jordán mayu p'ampaykojtinpis, kakullan.

²⁴ Pitaj jap'ispa, ñawinta orqhoyta atinmanri? Pitaj payman qayllaspa, senqanman lazota churanmanri? nispa.