Job 34 - DIOSPA QHELQACHISQ

Eliúj iskay kaj parlasqan

¹ Chantá Eliú ujtawan nillarqataj:

² Yachajkuna uyariwaychej, sumaj yachayniyojkuna kay nisqayta uyariwaychej.

³ Ninriwan uyarispa, imaynatachus pipis parlasqanta yachanchej. Jinallataj simiwan llamirispa, mikhuna misk'ichus manachus kasqanta reparanchej.

⁴ Ajinallatataj noqanchejpis imachus allin kajta qhawarinachej, chantá imachus sumaj kasqanta ninachej.

⁵ Job nin: Noqaqa mana juchayojchu kani, Diosrí mana noqapaj justiciata ruwayta munanchu.

⁶ Juchayoj kasqaytachus niyman chayqa, llullakuyman. Mana juchallishajtiypis, Diosqa sinch'ita ñak'arichiwaspa, wañuy pataman churawan, nispa.

⁷ Mana pipis Job jinaqa kanchu. Payqa yakutapis ujyashanman jina Diosmanta alqochakun.

⁸ Payqa millayta ruwaspa, purejkunawan tantakun, mana allinta ruwajkunawantaj purin.

⁹ Jobqa nin: Diospa munayninta ruwashaspapis, runaqa ni imata tarinchu, nispa.

¹⁰ Qankuna yachayniyojkuna uyariwaychej: Tukuy Atiyniyoj Diosqa manapuni mana allin kajta ruwanmanchu.

¹¹ Payqa sapa runaman ruwasqanman jina pagapun, sapa ujmantaj purisqanman jina qopun.

¹² Cheqapuni Diosqa nipuni mana allintaqa ruwanchu, Tukuy Atiyniyoj kajtaj justiciatapis manallataj q'ewinchu.

¹³ Tukuy kay pachata kamachinanpaj, mana pimantapis atiyta jap'erqachu.

¹⁴ Sichus Dios samayninta runamanta qhechuyta munanman, sitajchus kawsay qowasqanchejta qhechukapuyta munanman chayqa,

¹⁵ tukuy runakuna ujllapi wañupusunman, ujtawantaj jallp'aman tukupusunman.

¹⁶ Sichus qan yuyayniyoj kanki chayqa, uyariway, imatachus nisqayta allinta uyariway.

¹⁷ Sichus Dios cheqan kajta chejninman chayqa, mana kamachiyta atinmanchu. Qanrí chay jina mana juchayoj Diosta imaynatataj juchachayta atiwajri?

¹⁸ Sichus kuraj kamachejkuna, sumachaj runakuna ima millayta ruwaspa purinku chayqa, Tata Dios mana iskayrayaspa, sut'ita uyankupi nipun.

¹⁹ Payqa mana kamachejkunaman kutikunchu, nitaj qhapajkunaman, nillataj wajchakunamanpis uyata orqhonchu, imaraykuchus paymin tukuyninkuta ruwarqa.

²⁰ Runakunaqa uj ñawi ch'irmiyllapi wañunku. Chawpi tuta kashajtin, paykuna mayta ch'ajwanku, chantá chinkapunku. Atiyniyoj runapis ni pej imanasqallan chinkachisqa rikhurin.

²¹ Diosqa runaj purisqanta yachan, imaynatachus kawsasqanta qhawallantaj.

²² Mana kanchu manchay laqha, ni may jina tuti laqhapis millayta ruwaj runata pakananpajqa.

²³ Diosqa mana runaman willanchu mayk'ajchus ñawpaqenpi rikhurinanta, paypa ñawpaqenpi juzgasqa kananpaj.

²⁴ Atiyniyoj runakunata urmachinanpajqa mana watunanrajchu tiyan, nitaj chay runaj cuentanmanta wajta churananpajpis.

²⁵ Diosqa imatachus ruwasqankuta yachallan, tutantaj paykunata chinkachin.

²⁶ Diosqa runa wañuchejkunata jina paykunata jasut'in, tukuy runaj rikunanta,

²⁷ paykuna nisqanta mana kasusqankurayku, nitaj munayninman jina puriyta munasqankurayku.

²⁸ Paykunaqa wajchakunata, pisichikojkunata ima waqacherqanku, chay waqasqankutaj Diosman chayarqa, paytaj uyarerqa.

²⁹ Chaywanpis, sichus Dios ch'inlla kakun chayqa, pitaj payta juchachayta atinmanri? Sichus uyanta pakan chayqa, pitaj rikuyta atinmanri? Payqa tukuy suyuta qhawashan, jinallataj sapa uj runatapis.

³⁰ Ajinata qhawashan ama millayta ruwaj runa llajtanta kamachinanpaj, nillataj ch'awkiyananpaj.

³¹ Diosta nerqankichu: Juchallini, manaña ujtawan juchallisajñachu? nispa.

³² Nerqankitajchu: Imata ruwaspachus pantaykusqayta rikuchiway. Sichus mana allinta ruwarqani chayqa, manaña ujtawan ruwasajchu? nispa.

³³ Tata Dios munasqaykiman jina t'inkachisunantachu munashanki, payta qhesachashaspapis? Chaytaqa qan ninayki tiyan, mana noqachu. Ajinaqa imatachus yuyasqaykita parlariy.

³⁴ Noqata uyariwaj yachayniyojkuna, sumaj yuyayniyojkunapis niwanqanku:

³⁵ Jobqa mana yachaspalla imatapis parlashan, nisqanpis qhasi manakajlla, nispa.

³⁶ Jobta allinta qhawaychej, imaraykuchus imaynatachus kutichisqanqa millayta ruwaspa purej kutichisqanman jina rijch'akun.

³⁷ Jobqa mana juchasapallachu, payqa mana kasukojmin. Noqaykoj rikunaykuta Diosmanta alqochakun, Diospa contranta parlaspataj, payta phiñachin, nispa.