Job 27 - DIOSPA QHELQACHISQ

Job Bildadpa nisqanman kutichin

¹ Job parlaspallapuni, nerqa:

² Tukuy Atiyniyoj Diosrayku tiluni, pichus justiciata ruwawayta mana munanchu, astawanpis almayta llakichin, chayrayku:

³ Mayk'ajkamachus kawsanaykama, Diospa samaynin noqapi kanankamaqa,

⁴ simiy mana allin kajtaqa mana parlanqachu, nitaj llullakonqachu.

⁵ Kawsanaykamaqa mana juchayoj kasqayta nillasajpuni. Qankunaj nisqaykichej cheqan kasqanta mana nisqaykichejchu.

⁶ Noqaqa cheqanta ruwaj kasqayta nillasajpuni, imajtinchus kawsanaykamaqa sonqoy mana juchachawanqachu.

⁷ Tukuy awqaykuna, millayta ruwaspa purejkuna jina kachunku. Contraypi sayarejkunataj Diosta mana manchachikojkuna jina ñak'arichunku.

⁸ Dioswan churanakojkunaqa imapitaj suyanqanku, maypachachus Dios kawsayninkuta qhechonqa chaypachari?

⁹ Llakiykunapi rikhurejtinpis, Diosqa mañakusqanta mana uyarenqachu.

¹⁰ Payqa Tukuy Atiyniyoj Diospi mana kusikuyta tarinchu, nitaj mayk'ajllapis paymanta mañakunchu.

¹¹ Noqa Diospa jatun atiyninta rikuchisqaykichej, Tukuy Atiyniyoj Dios imatachus ruwananpaj wakichisqanta sut'inchasqaykichej.

¹² Sichus qankuna chaykunata rikorqankichej chayqa, imaraykutaj manakajta parlankichejri? nispa.

Sofarqa Jobpa nisqanman kutichin

¹³ Chantá Sofar kuticherqa: Tukuy Atiyniyoj Diosqa mana khuyakuyniyojkunata, chantá millayta ruwajkunata ima jasut'inanpaj kay jinata wakichinña:

¹⁴ Churinku ashkhapis kachunku, espadawan wañuchisqa kanqanku. Juch'uy wawankupis mikhunamanta jina wañonqanku.

¹⁵ Kawsashaj qhepakojkunaqa onqoywan wañonqanku, wañojtinkutaj, warminkupis mana paykunamanta waqallanqankupischu.

¹⁶ Millayta ruwajqa jallp'a chhikatapis qolqeta tantachun, p'achatapis may chhikata tantachun,

¹⁷ pichus cheqanta ruwajkuna chaywan p'achallikonqanku, qolqentapis mana juchayojkuna rak'inakonqanku.

¹⁸ Millayta ruwajpa wasenqa thutaj thapan jinalla, chajrata qhawajpa ch'ujllan jinallataj.

¹⁹ Chay runaqa manchay qhapaj puñukaponqa, q'ayantin rijch'arinanpajtaj mana imayoj rikhurenqa.

²⁰ Manchachikuna p'unchaypacha paypa patanman jamonqa, sinch'i para wayrataj tutallan payta apakaponqa.

²¹ Inti llojsimuynejmanta jamoj sinch'i muyoj wayra wasinmanta payta sik'enqa.

²² Chay runata Diosqa mana khuyarikuspa jasut'enqa. Ayqeyta munashaspapis, mana ayqeyta atenqachu.

²³ Wayraqa manchayta wayraspa, sonaspataj payta qhatiykachanqa, nispa.