Job 26 - DIOSPA QHELQACHISQ

Jobqa Bildadpa nisqanman kutichin

¹ Chantá Job alqochakuspa jina nerqa:

² Qanqa manchay sumajta mana kallpayoj runata yanapayta yachasqanki. Qanqa pisi kallpayojkunaj yanapajnin kanki.

³ Qanqa sumajta yuyaychayta yachasqanki, mana yachajtapis yachachinki.

⁴ Ajinata parlanaykipaj, pitaj chhichiykusorqari? Chay jinata parlanaykipaj, pitaj yuyaychasorqari? nispa.

Bildadñataj kutichin

⁵ Chantá Bildad kutichispa, nerqa: Jallp'aj sonqonpi wañusqa kajkuna manchachikuywan chay ukhupi kharkatitinku.

⁶ Diosmantaqa mana pipis pakakuyta atinmanchu, ni wañuypis pakakuyta atinmanchu.

⁷ Diosqa ch'usaj patapi janajta aysarqa, kay pachatapis ch'usajllapitaj warkhuykorqa.

⁸ Payqa yakuta phuyupi jap'in, phuyutajrí llasa yakuwan mana phatanchu.

⁹ Payqa killata pakaykun, phuyuwan qhataykuspa.

¹⁰ Mama qochaman mojonta jina churarqa, jinallatataj k'anchayta laqhayaymanta t'aqan.

¹¹ Dios mancharichejtin, manchariywan kharkatitinku, may orqopichus janaj pacha atisqa kashan, chaykuna.

¹² Payqa mama qochata atiyninwan kuyuchin, mama qochapi Rajab nisqa sierpetapis yachayninwan atipan.

¹³ Ujta phukuspa, janaj pachata picharparin. Makinwan q'allpispataj, llusp'ej katarita wañuchin.

¹⁴ Chayqa ruwasqanmanta uj chhikallan, imatachus uyarisqanchejqa uj chhichiy jinalla. Pitaj chay jina atiyninta entiendeyta atinmanri? nispa.