Job 23 - DIOSPA QHELQACHISQ

Jobqa Elifazpa nisqanman kutichin

¹ Chantá Job kutichispa, ajinata nerqa:

² Kunan ujtawan sonqo nanasqa parlarisaj, nanayneyqa, waqayniymantapis aswanrajmin.

³ Allin kanman yachanay maypichus Dios tiyakushasqanta, yachaspa, tiyakushan chayman rinaypaj.

⁴ Payman imaynachus kasqayta rikuchiyman, imaraykuchus parlanayqa may chhika kashan.

⁵ Noqataj imatachus kutichinawanta yachayta munayman, yachaymantaj imatachus pay niwasqanta.

⁶ Diosqa mana atiyninpi atinikuspachu kutichiwanman, manachayqa llakiyniymanta parlarikusqayta uyaririwanman.

⁷ Payqa noqa cheqanpi kashasqayta niwanman, mana juchayoj kasqaytapis nillawanmantaj. Ajinamanta wiñaypaj kacharipuwanman.

⁸ Inti llojsimuynejpi Diosta mask'amuni, manataj tarinichu. Inti yaykuynejpi mask'amullanitaj, manallataj chaypichu kasqa.

⁹ Wichaynejpi mask'amuni, chaypipis mana payta rikunichu, uranejpipis mask'amullanitaj, paytaj noqamanta pakakuwan.

¹⁰ Chaywanpis sapa thaskisqayta pay yachan. Payqa imaynatachus kasqayta yachariyta munaspa, tukuy imata ñak'arichiwan, chaymantataj ch'uwa qori jina llojsimusaj.

¹¹ Noqaqa Diospa sarusqanta sarorqani, ñannintapis mana pantaykuspa purerqani.

¹² Noqaqa kamachisqankunata junt'arqanipuni, manataj noqaj munasqaytachu ruwarqani.

¹³ Chaywanpis payqa imatachus ruwayta yuyasqanta ruwanpuni, nillataj paytaqa ni imapis yuyasqanmanta kuyurichinchu.

¹⁴ Imatachus noqawan ruwananta nin, chayta ruwanqapuni. Imatachus ruwananta nisqanqa ashkhapuni.

¹⁵ Chayrayku sichus kay tukuy imapi yuyani chayqa, paypa ñawpaqenman riyta manchachikuni.

¹⁶ Tukuy Atiyniyoj Diosqa manchachikuywan kharkatitichiwan.

¹⁷ Imaraykutaj paqarerqani, chay tuta mana wañuchiwarqankuchuri? Imaraykutaj laqhayaypi uyayta mana qhataykuwarqankuchuri? nispa.