Job 22 - DIOSPA QHELQACHISQ

Elifaz Jobta kinsa kaj k'amisqan

¹ Chantá Temán llajtayoj Elifazñataj kutichispa, nerqa:

² Qanqa sumaj yachayniyoj kawaj. Chaywanpis chayqa Diosta ni imapi yanapanchu.

³ Tukuy Atiyniyoj Dios imatapunitaj tarisqa cheqan runa mana k'amina kasqaykimantari?

⁴ Sichus pay cheqan ñanman churasuyta munaspa k'amisunki, juzgasunanpajtaj wajyasunki chayqa, chayta ruwan mana payta tukuy imapi kasusqaykiraykuchu.

⁵ Manachayqa millayta ruwasqayki ancha ashkha kasqanrayku, juchaykitaj mana yupay atina kasqanrayku chayta ruwan.

⁶ Ichapis qanqa mana imallamanta wawqeykimanta prendata orqhoj kanki, p'achankuta qhechuspataj, q'alallata saqej kanki.

⁷ Pichus ch'akichikojmanqa yakuta mana jaywarejchu kanki, pichus yarqhachikojmanrí nillataj mikhunata qorejchu kanki.

⁸ Qanqa atiyniyoj kaspa, respetanapaj jina kaspataj, jallp'amanta dueño kasqaykita yuyaj kanki.

⁹ Warmisapakunata ch'usaj makillata kachapoj kanki. Wajcha wawakunamantapis tukuy imankuta qhechuraj kanki.

¹⁰ Chayrayku kunanqa tukuy imaymana llakiywan muyuykusqa kashanki, kaymanta jinalla jatun manchachikuy jap'iykusunki.

¹¹ Qanpajqa tukuy imapis laqhalla, mana imatapis rikuyta atinkichu. May chhika yaku jina p'ampaykusunki.

¹² Diosqa janajmantapis aswan patapi kashan, aswan patapi kaj ch'askakunapis paypa chakin urapi rikhurin.

¹³ Qanqa imaynatataj niwaj Dios mana reparasqanta, laqha phuyutaj juzgananmanta jark'asqantari?

¹⁴ Imaynatataj niwaj: Diosqa mana rikunchu, imaraykuchus janaj pachapi kayman jaqayman purishan? nispa.

¹⁵ Millayta ruwaspa purejkunaj ñawpa kawsasqankuta jinachu kawsayta munanki?

¹⁶ Paykunaqa manaraj imapi wañorqanku, ashkha yakuyoj mayoj apasqan jina.

¹⁷ Paykuna Diosta nerqanku: Munasqaykuman jina kawsakojta saqellawayku. Tukuy Atiyniyoj Dios noqaykurayku imatataj ruwayta atinman kasqari? nispa.

¹⁸ Chaywanpis Diosqa tukuy imawan wasinkuta junt'acherqa. Millayta purejkuna jina yuyanaqa noqamanta karupi kachun.

¹⁹ Cheqan kaj runakunaqa chayta rikuspa kusikunku, mana juchayojkunarí kay jinata asipayanqanku:

²⁰ Awqanchejkunaqa chinkachisqa kanku, tukuy kapuyninkutataj nina ruphaykun, nispa.

²¹ Dioswan allinyakuy, paywantaj allinpi kawsakuy, paytaj watej qhapajyachisonqa.

²² Pay yachachisunanta saqellay, imatachus nisqantataj sumajta jap'ikuy.

²³ Sichus k'umuykuspa Tukuy Atiyniyoj Diosman kutirikunki chayqa, pay aysarisonqa. Ajinata ruwaspataj, wasiykimanta llakiykunata karunchanki.

²⁴ Sichus Ofir qorita qhawawaj, jallp'allapis, chayrí wayq'opi rumillapis kanman jina chayqa,

²⁵ chaypacha Tukuy Atiyniyoj Diosqa qanpaj kanqa, manchay ashkha qori jina, manchay ashkha qolqe jinataj.

²⁶ Tukuy Atiyniyoj Diosqa kusiyniyki kanqa, chantá mana p'enqakuspa payta qhawanki.

²⁷ Sichus paymanta imatapis mañakunki chayqa, pay uyarisonqa. Qantaj imatachus payman nisqaykita junt'anki.

²⁸ Imatachus ruwasqaykipi allinpuni risonqa, ñanniykitataj k'anchay k'ancharenqa.

²⁹ Diosqa may kasqanta yuyakoj runata k'umuykuchin, llamp'u sonqoyoj runatatajrí qhespichin.

³⁰ Mana juchayojtaqa paymin kacharichenqa. Sichus qan mana juchayojchu kanki chayqa, qantapis kacharichillasonqataj, nispa.