Job 21 - DIOSPA QHELQACHISQJob ujtawan Sofarman kutichin 1 Chantá Jobñataj kutichispa, nerqa: 2 Qankunaqa sumajta sonqochayta atiwankichejman, imatachus nisqayta uyariwaspa. 3 Parlashajtiy, pacienciarikuwaychej, chaymanta munaspaqa, asikuwaychejpis. 4 Noqaqa mana pi runawanchu quejanakushani. Chayrayku mana pacienciay kanchu. 5 Sichus allinta uyariwankichej chayqa, manchariywan opayankichej. 6 Noqa kikiy chaypi yuyaspa, mancharikuni, ukhuypis mayta kharkatitin. 7 Imaraykutaj millayta ruwajkuna kawsallankupuniri, machuyanankukamataj qhapajyallankupuniri? 8 Paykunaqa wawankuta, allchhinkuta ima wiñajta rikunku, paykunaj qayllankupitaj ni imamanta manchachikuspa kawsanku. 9 Wasinkumanqa ni ima llakiy chayanchu. Diospis paykunata mana jasut'inchu. 10 Wakankoqa mirallanpuni, uñankupis mana wañunchu. 11 Wawankoqa kusisqa phinkiykachanku, uña ovejita jina mayta sink'uykacharispa. 12 Manchay kusiywan phinkirispa, tusunku, cajata, arpata, qenata ima tocarispa. 13 Tukuy kawsayninkupi qhapajyanku, chantá ni imamanta llakiyniyoj wañupunku. 14 Paykunaqa Diosta ninku: Noqaykumanta ithirikuy, imaraykuchus munasqaykiman jina kawsayta mana munaykuchu. 15 Pitaj kasqa Tukuy Atiyniyoj Dios payta kasunaykupajri? Imatá tarisqayku kasqa paymanta mañakuspari? nispa. 16 Chaywanpis millayta ruwaspa purejkunaj allin rinanqa mana makinkupichu kashan. Paykuna jina yuyanayqa noqamanta karupi kachun. 17 Mayk'ajtaj millayta ruwaspa purejkuna manaraj wañunankupi wañunkuri? Mayk'ajtaj llakiy paykunaman chayarqari? Mayk'ajtaj Dios mayta phiñakuspa, paykunata ñak'aricherqari? 18 Mayk'ajtaj ichhu jina qhallirparisqa karqankuri, muyoj wayraj apasqan jinari? 19 Qankuna ninkichej: Diosqa tatankoj juchankumanta wawakunata jasut'in, nispa. Chaywanpis millayta ruwajpuni wanananpaj jasut'isqa kanan. 20 Pay kikinpuni Tukuy Atiyniyoj Diospa makinmanta jasut'ita jap'inan tiyan. 21 Wañupojtinña, ayllunwan imachus kananmanta manaña phutikunan kanñachu. 22 Chantá, pitaj Diosman yuyayta qonmanri, janaj pachapi kajkunatapis juzgajmanri? 23 Wakenqa waynuchupachallaraj wañupunku, kallpankupi kashaspa, kusisqa, ni imamanta llakiyniyoj. 24 Tukuy imawan junt'asqa, qhali kashaspa, tukukapunku. 25 Wakinrí llakiykunaj ñit'isqan wañupunku, kusiy kawsay imachus kasqanta mana rejsispa. 26 Chay tukuywanpis jallp'aj sonqonpi uj rejlla kanku. Khurukunapis kikillantapuni iskayninkuta mikhukapunku. 27 Noqaqa qankuna imatachus noqamanta yuyasqaykichejta yachani, mana allin kajta ruwanawaykichejtapis. 28 Qankunaqa tapukunkichej: Maypitaj wiraqochej wasin kashanri? Millayta ruwaspa purejpa wasinwan imataj karqari? nispa. 29 Manachu purejkunata tapurikorqankichej? Imaraykutaj willasqankuta mana kasorqankichejchuri? 30 Paykuna ninku: Maypachachus Dios phiñakuspa llakiykunata apachimun chaypachaqa, millayta ruwaspa purejta mana imapis pasanchu, nispa. 31 Mana pipis millayta purisqanta uyanpi ninchu, nitaj pipis ruwasqanman jina kutichinchu. 32 P'ampaj apashajtinkoqa, qhepantataj ñawpaqentataj ashkha runakuna rinku. 33 Jallp'apis llamp'ulla payta qhataykonqa, p'ampaytawantaj aya p'ampanata qhawaj churakonqanku. 34 Qhasi manakaj qankuna sonqochayta munawasqaykichejqa. Tukuy parlasqaykichejqa llullalla, nispa. |
Revisión Biblia Quechua Boliviano © Sociedad Bíblica Boliviana, 2017.
Bolivian Bible Society