Job 19 - DIOSPA QHELQACHISQ

Job Bildadpa nisqanman kutichin

¹ Chantá Job Bildadman kutichispa, nerqa:

² Mayk'ajkamataj ñak'arichiwankichej. Mayk'ajkamataj parlasqaykichejwan sonqoyta nanachiwankichejri?

³ Sapa kuti anchatañapuni turiyawankichej. Manachu chay jinata ruwawaspa, p'enqakunkichej?

⁴ Noqa juchayoj kayman chaypis, juchaymantaqa noqallamin ñak'arisaj.

⁵ Qankunaqa noqamanta aswan sumaj kasqaykichejta yuyakunkichej, kay jina llakiypi rikhurisqaytataj uyaypi niwankichej.

⁶ Kayta allinta yachaychej: Diospuni noqataqa ñak'arichiwan, paymin tojllaman urmachiwan.

⁷ Noqa qhaparikuni: Wañuchishawanku, nispa, nitaj pipis uyariwanchu. Yanapanawankuta mañakuni, nitaj pipis justiciata ruwawaj kanchu.

⁸ Diosqa noqa ama pasanaypaj purinayta wisq'aykuwan, paymin ñanniyta laqhaman tukuchin.

⁹ Tukuy kapuyniymanta ch'usajta saqewan. Umaymanta pilluytapis qhechuwan.

¹⁰ Payqa mana ni imayojta saqerpariwan. Thansarara sach'a saphinmanta sik'isqa jina kani.

¹¹ Phiñakuyninta noqaj patayman kachaykamuwan, awqanpis kayman jina qhawawan.

¹² Soldadonkunaqa noqaj contrayta jamunku, wasiypa muyuyninpi jaraykukuspataj, maqanakoj yaykumunankupaj wakichikunku.

¹³ Diosqa noqamanta wawqeykunata, kawsaqeykunatapis karunchachin, paykunataj mana rejsisqata jina qhawawanku.

¹⁴ Aylluykunaqa karullamanta qhawawanku, rejsisqaykunapis qonqakapuwanku.

¹⁵ Waturikoj jamuwajkunaqa qonqakapuwanku. Warmi kamachiykunapis waj runata jinallaña qhawawanku, manaña rejsikapuwankuchu.

¹⁶ Uywasqay kamachiykunata wajyarikuni chaypis, mana uyariwankuchu. May jinata wajyakushajtiypis, ni kasuwankuchu.

¹⁷ Warmiypis qayllajtiy, millachikuwan. Wawqeykunapis millachikuwaspa, ayqenku.

¹⁸ Wawakunapis pisipaj qhawawanku. Jatarejtiykama, ñapis contrayta parlashankuña.

¹⁹ Aswan sumaj kawsaqeykunapis chejnikuwanku, pikunatachus astawan q'ayachakoj kani, chaykunapis contraypi kanku.

²⁰ Aycha qarayqa tulluyman k'askaykushan, kiruypis simiymanta t'akakapushanña.

²¹ Kawsaqeykuna, khuyarikuwaychej ari, imaraykuchus Diospuni noqaman makinta churaykuwan.

²² Imaraykutaj qankuna Dios jina qhatiykachawankichejri? Manachu khaniwaspa sajsakunkichej?

²³ Allin kanman pillapis kay parlasqayta qhelqanan, uj p'anqapi qhelqasqa qhepakunan.

²⁴ Allin kanman pillapis uj cincelwan titipi chayrí rumipi ch'eqospa, nisqayta wiñaypaj qhelqanan.

²⁵ Noqarí yachani kutikuwajniy kawsashasqanta, kay pachapi pay noqaman kutikunawanta yachallanitaj.

²⁶ Ukhuy q'etayaspa tukukushajtinpis, noqa kikiy Diosta rikusajpuni.

²⁷ Kikin ñawiywan payta rikusaj, mana waj runachu, manachayqa noqapuni rikusaj. Maytapuni rikuyta suyashani.

²⁸ Qankunarí ninkichej: Payta qhatiykachaykuna, imajtinchus mana allin kajqa paypi kashan, nispa.

²⁹ Chaywanpis qankunaqa espadata manchachikuychej, ima espadawanchus Diosqa mana allin ruwajta jasut'in, chayta. Chaypacha Diosqa cheqan justiciata ruwaj juez kasqanta yachankichej, nispa.