Job 13 - DIOSPA QHELQACHISQ

Job allin runa kasqanta nin

¹ Chantá Job nillarqapuni: Kay tukuy imata kikin ñawiywan rikorqani, nisqaykichejtataj kikin ninriywan uyarerqani.

² Imatachus yachasqaykichejta noqapis yachallanitaj, qankunamantaqa ni imapi pisichu kani.

³ Chaywanpis Tukuy Atiyniyoj Dioswan parlayta munani, Tata Dioswan noqamanta parlariyta munani.

⁴ Qankunaqa llullakuspa, cheqa kajta pakankichej, qhasi manakaj jampikamayoj jina kankichej.

⁵ Sichus ch'inlla kakuwajchej karqa chayqa, yachayniyoj runapaj qhawasqa kawajchej karqa.

⁶ Ama jinachu kaychej, imatachus nisqayta uyariwaychej, imatachus parlasqayta allinta uyariwaychej.

⁷ Llullakuspa Diosman kutikusqaykichejtachu yuyankichej? Q'otiriyuykichejwan Diosta yanapashasqaykichejtachu yuyankichej?

⁸ Diosman kutikusqaykichejtachu yuyankichej? Qankunaqa Diosman kutikuyta atiwajchejchu?

⁹ Imataj kanman sichus Dios kawsayniykichejta waturinman chaypachari? Paytaqa runata jina q'otiyaykuwajchejchu?

¹⁰ Chaywanpis sichus llullakuspa Diosman kutikunkichej chayqa, payqa k'amisonqachej.

¹¹ Diospa jatun kaynenqa mancharichisonqachej, kharkatichisonqachejtaj.

¹² Chay jinata nisqaykichejqa ushpha jinalla, kutichikusqaykichejqa t'urumanta perqa jinalla.

¹³ Ch'inyarikuychej, noqañataj parlarisaj, chaymantataj imapis noqaman jamuwachun.

¹⁴ Wañojpis yaykusaj, kawsayniytapis wañuy pataman churasaj.

¹⁵ Dios wañuchinawan kashajtinpis, paypi atinikullasajpuni. Noqa imaynachus kasqayta paywan sut'inta parlasaj.

¹⁶ Ichapis chayrayku qhespichisqa kasaj, imaraykuchus paypa ñawpaqenman millayta ruwaj runaqa mana yaykuyta atinchu.

¹⁷ Imatachus parlarisqayta uyariwaychej, imatachus nisqayta sumajta uyariychej.

¹⁸ Noqaqa llakiyniymanta kutichikuspa parlarisaj, imajtinchus mana juchayoj llojsinayta yachani.

¹⁹ Sichus pipis imamanta ch'ataykuwanman chayqa, ch'inyakuyman, wañupuymantaj.

Job Diosmanta mañakun

²⁰ Diosníy, iskay imallata qonawaykita mañarikuyki, manataj qanmanta pakakusqaykichu.

²¹ Amaña jasut'iwaychu ari, amaña kay jinatapuni manchachiwaychu.

²² Wajyaway, noqataj uyarisqayki, chayrí noqa ñawpajta parlarisaj, qantaj kutichiwanki.

²³ Niway: Mayqentaj juchay pantasqaypis kashanri? Rikuchiway ari, imata ruwaspachus phiñachisusqayta.

²⁴ Imaraykutaj noqamanta pakakuwankiri? Imajtintaj awqaykita jina qhawawankiri?

²⁵ Noqaqa wayraj apaykachasqan laqhe jinalla kani. Imaraykutaj chinkachiyta munawankiri? Noqaqa ch'aki ichhu jinalla kani. Imaraykutaj qhatiykachawankiri?

²⁶ Imajtintaj sinch'ita ñak'arichishawankiri? Wayna kashaspa, juchallisqaymanta jasut'ishawanki.

²⁷ Chakiyta cadenawan watawanki. Ñawillaykipitaj purichiwanki, maymanchus risqaytapis qhawallankitaj.

²⁸ Ukhoyqa mawk'a qara bota jina tukukushan, thutaj k'utusqan p'acha jina, nispa.