Jeremías 7 - DIOSPA QHELQACHISQ

Jeremías Temploj punkunpi yachachin

¹ Tata Diosqa Jeremiasta nerqa:

² Temploypa pationman yaykuna punkupi sayaspa, kayta willamuy: Judá suyupi tiyakojkuna, qankuna pikunachus kay punkunejta Tata Diosta yupaychanaykichejpaj yaykushankichej chaykuna, kayta uyariychej:

³ Israelpa Diosnin Tukuy Atiyniyoj Tata Dios kayta nisunkichej: Allinta purispa, cheqanta ruwaychej, noqataj kay suyupi tiyakunaykichejta saqellasqaykichejpuni.

⁴ Ama atinikuychejchu q'otiyajkunaj nisqankupi. Paykuna nisunkichej: Tata Diospa Templon kaypi kasqanrayku, Dios kay llajtata mana chinkachenqachu, nispa.

⁵ Chayrayku allinta puriyta qallariychej, maychus kajtataj ujkuna ujkunawan ruwaychej.

⁶ Amallataj chawpiykichejpi tiyakoj waj llajtayojkunata, nillataj wajcha wawakunata, warmisapata ima ñak'arichiychejchu. Jinallataj kay cheqapi mana juchayoj runakunata ama wañuchiychejchu. Amallataj waj dioskunata yupaychaychejchu, imaraykuchus imatachus ruwasqaykichejqa qankunallapajtaj mana allinchu kanqa.

⁷ Ajinata ruwajtiykichej, noqa saqesqaykichej kay jallp'api tiyakojta, mayqentachus ñawpa tataykichejman wiñaypaj qorqani, chay jallp'api.

⁸ Qankunatajrí qhasi manakaj llulla parlaykunapi atinikushankichej.

⁹ Chantá qankuna suwankichej, runatataj wañuchinkichej, khuchichakunkichej, qhasillata tilunkichej, Baal lantiman inciensota q'oshñichinkichej, mana rejsisqa lantikunatapis yupaychallankichejtaj.

¹⁰ Ajinata ruwashaspapis, qankunaqa kay Temployman yupaychawaj jamunkichejraj, mayqenchus noqapaj t'aqasqa kashan chayman, ninkichejtaj: Kaypi allillan kashayku, nispa. Qankunaqa yuyankichej chay millachikusqay imakunata ruwayta atillasqaykichejta.

¹¹ Yuyankichejchu noqapaj t'aqasqa Templo suwakunaj pakakunan t'oqo kasqanta? Noqaqa tukuy imatachus ruwasqaykichejta rikushanipuni. Noqa Tata Diosmin chayta nini.

¹² Siloman riychej. Noqa chay cheqata ñawpajta ajllarqani, sutiy chaypi yupaychasqa kananpaj. Chantá Israel aylluy mana allin ruwasqanmanta, imatachus Silo llajtawan ruwasqayta rikuychej.

¹³ Mashkha kutita parlapayarqaykichej, qankunatajrí mana kasuwayta munarqankichejchu, nitaj uyarillawaytapis munarqankichejchu.

¹⁴ Chayrayku Silo llajtapi yupaychana wasiywan imatachus ruwarqani, ajinallatataj sutiywan sutichasqa kashan, kay Templowanpis ruwasaj. Kay Templota qankunaman chantá tataykichejkuna ima qorqani, qankunataj chaypi atinikushankichej.

¹⁵ Noqarí qankunata ñawpaqeymanta wijch'usqaykichej, imaynatachus ñawpajpi wawqeykichej Efrainpa mirayninmanta kajkunata wijch'orqani, ajinata, nispa.

Israelqa Diosta wasanchan

¹⁶ Tata Dios nillawarqataj: Qan, Jeremías, ama kay runakunarayku mañakuwaychu, nitaj majakuwaychu. Amapuni paykunapaj mañapuychu. Amallataj kutin kutinta paykunarayku mañawaychu, imaraykuchus mana uyarisqaykichu.

¹⁷ Judá suyupi, jinataj Jerusalén llajtapipis imatachus ruwasqankuta manachu rikunki?

¹⁸ Wawakunaqa llant'ata pallanku, tatakunataj ninata jap'ichinku. Warmikunatajrí masata puñanku tortillata ruwanankupaj. Chantá Janajpi Qoya, nisqa lantiman chayta jaywanku. Jinallataj mana rejsisqa dioskunaman vinotapis jaywanku, chayta ruwaspataj, noqata phiñachiwanku.

¹⁹ Ajinata ruwaspa, noqatachu phiñachiwanku? Mana, astawanqa paykunalla p'enqaypi rikhurinankupaj ruwanku. Ajinata Tata Dios nin.

²⁰ Chayrayku Tukuyta Kamachej Tata Dios kayta nin: Tukuy phiñakuyniyta kay suyoj contranpi jich'aykamusaj, jinallataj chaypi tiyakojkunaj contranpi, uywankukunaj contranpi, sach'akunaj contranpi, chantá chajra poqoykunaj contranpi ima. Chay phiñakuyniytaj nina jina mana thasnuy atina kanqa, nispa.

²¹ Israelpa Diosnin Tukuy Atiyniyoj Tata Dios ayllunman nillantaj: Uywa ñak'asqa q'olachinakunata, waj jaywasqaykichej imakunatawan tantakuspa, qankunalla chay aychata mikhukapuychej.

²² Maypachachus qankunaj ñawpa tataykichejkunata Egiptomanta orqhomorqani chaypacha, mana paykunaman kamacherqanichu uywa ñak'asqa q'olachinata qonawankuta, nillataj waj jaywanakunata jaywanawankuta munarqanichu.

²³ Manachayqa kayta paykunaman kamacherqani: Noqata kasuwaychej. Sichus kasuwankichej chayqa, noqa Diosniykichej kasaj, qankunataj aylluy kankichej. Qankuna kamachisqayman jinapuni puriychej allin risunaykichejpaj, nispa.

²⁴ Chaywanpis paykuna mana kasuwarqankuchu, nitaj uyariwarqankuchu. Manachayqa rumi sonqo kayninkuwan apachikorqanku, jinallataj sonqonkoj millay ruwayta munasqanwan ima. Noqaman kutirikamunawankutaqa wasanchawarqanku.

²⁵ Ñawpa tataykichejkuna Egiptomanta llojsimusqankumantapacha kunankama, qankunaman sapa kuti noqamanta sut'inchajkunata kachamullarqanipuni.

²⁶ Chaywanpis qankunaqa manapuni kasuwarqankichejchu, manachayqa ñawpa tataykichejkunamantapis astawanraj rumi sonqo karqankichej.

²⁷ Qan, Jeremías, kay tukuy imata paykunaman willay, amapis kasuchusunkuchu. Jatunmanta qhaparispa parlay, amapis uyarisuchunkuchu.

²⁸ Chayrayku paykunaman niy: Qankunamin Diosniykichej Tata Diosta mana uyarej suyu kankichej, nitaj k'amisqanta kasunkichejchu. Cheqanta parlanaqa simiykichejpi manaña kanchu, nispa.

Jerusalenpi lantita yupaychanku

²⁹ Jerusalenpi tiyakojkuna, chujchaykichejta k'utuspa, wijch'uychej. Llakiy yarawita ch'in lomakunapi takiychej, imaraykuchus Tata Dios may phiñasqa contraykichejpi kaspa, qankunata qhesachasunkichej, wijch'usunkichejtaj.

³⁰ Tata Dios nillantaj: Judá suyupi tiyakojkuna mana walejtachu ñawpaqeypi ruwanku. Chay millachikuna lantikunata sutiywan sutichasqa Temploman churarqanku, chaywan Temployta ch'ichichaspa.

³¹ Ben Jinón Vallepi Tofetpa altarninta jataricherqanku, chaypi qhari wawankukunata, jinataj warmi wawankukunatapis q'olachinankupaj. Chaytaqa ni jayk'aj paykunaman kamacherqanichu, nitaj yuyallarqanipischu.

³² Chayrayku noqa Tata Dios nini: Uj p'unchay chayamonqa, chay p'unchaypitaj kay cheqata manaña Tofet nenqankuchu, nitaj Ben Jinón nispapis, manachayqa Runa Wañuchina Valle nenqanku. Tofetpitaj runa wañusqata p'ampanqanku, manaña maypipis p'ampanapaj kasqanrayku.

³³ Chay runakunaj ayankuta suwintukuna, k'ita animalkuna ima mikhonqanku, nitaj pipis chaykunata mancharichej kanqachu.

³⁴ Chantá Judá suyupi, jinallataj Jerusalén llajtapipis raymikunata, tusuykunata, takiykunata, jinallataj casarakupi takiykunatapis ch'inyachisaj. Tukuy suyutaj ch'inman tukuchisqa kanqa, nispa.