Jeremías 49 - DIOSPA QHELQACHISQ

Jeremías amonitakunaj contranpi sut'inchan

¹ Amón suyoj contranpi Tata Dios kay jinata nerqa: Manachu Israelqa wawakunayoj? Israelpataqa manachu pininpis tiyanri? Imaraykutaj Milcón lanteqa Gadpa jallp'anta jap'ikapun? Imaraykutaj amonitakuna Gadpa llajtankunapi tiyakushankuri?

² Chayrayku noqa Tata Dios kayta nini: Uj p'unchay chayamonqa, chay p'unchaypitaj Amón suyupi Rabá llajtapi maqanakojkunaj qhaparisqankuta uyarichisaj, chay llajtataj raqayllamanña tukuchisqa kanqa. K'iski ranchonkunapis ninawan ruphaykuchisqa kanqanku. Chaypacha Israel chay llajtankunata watej jap'ikapullanqataj. Ajinata Tata Dios nini.

³ Jesbón llajta, waqay, imaraykuchus Hai llajta phirisqaña kashan. Rabamanta warmikuna, sinch'ita waqaychej. Llakiy p'achawan p'achallikuychej, qhasqoykichejtataj takakuychej. Uman t'ojpisqa runa jina kayman jaqayman phinkiykachaychej, ukhuykichejtataj k'irirakuychej, imaraykuchus Milcón diosniykichej waj suyuman apasqa kashan. Jinallataj tukuy sacerdotenkunapis, kurajkuna ima apasqallataj kashanku.

⁴ Imaraykutaj chay sumaj poqoj jallp'aykimanta runaykachankiri? Noqamanta karunchakoj suyu, kapuyniykipi atinikuspa, ninki: Pitaj contrayta maqanakoj jamunmanri? nispa.

⁵ Allinta yachakuy, noqamin tukuynejmanta sinch'i manchachikuyta pataykiman apachimusaj, nispa noqa Tukuy Atiyniyoj Tata Diosmin nini. Qankunamanta sapa ujniykichej kaynejman, jaqaynejman ch'eqerachisqa kankichej. Manañataj pipis watej tantaykunasuykichejpaj kanqachu.

⁶ Chaymanta qhepamanrí noqaqa amonitakunata apasqa kasqankumanta kutichimusaj. Noqa Tata Diosmin chayta nini.

Jeremías edomitakunaj contranpi sut'inchan

⁷ Tukuy Atiyniyoj Tata Diosqa Edommanta parlaspa, nin: Manañachu Temán llajtapi yachayniyojkuna tiyan? Yachaysapakunaj yuyaychasqanku chinkapunchu? Yachayninku phuyu jinachu chinkapun?

⁸ Dedanpi tiyakojkuna, kutirikuspa ayqeychej, sumajtataj pakakamuychej, imaraykuchus noqaqa Esaúj ayllunta chinkachisaj, jasut'inay p'unchay chayamojtin.

⁹ Uvata pallajkuna jamuspa, mana tukuynintachu pallanku. Ch'isinpi suwakuna jamojtinkupis, atisqallankuta apanku.

¹⁰ Noqarí Esaúj ayllunta mana imayojta saqesaj. Noqaqa pakakunan cheqata tarisaj, manañataj noqamanta pakakuyta atenqachu. Wawankuna, ayllunkuna, qayllapi tiyakojkuna ima, tukuyninku phirisqa kanqanku, Edomtaj manaña kanqachu.

¹¹ Chaywanpis wajcha wawaykikunata saqeway, noqa qhawapusqayki. Warmisapaykikunapis noqapi atinikuwanqanku, nispa.

¹² Tata Dios nin: Pikunatachus mana jasut'inaychu karqa, chay suyukunatapis jasut'erqani. Jina kajtenqa, qanpunichu llusp'inki jasut'inaymantaqa? Mana llusp'inkichu, manachayqa jasut'isqapuni kanki.

¹³ Noqa Tata Dios sutiyrayku tiluni: Bosra llajtaqa thuñisqa, ch'inpacha qhepakonqa, k'umuykachachisqataj, maldicisqataj kanqa. Wajkuna chayta rikuspa, manchachikonqanku. Chay waj llajtankunataj wiñaypaj raqayllaña kanqanku, nispa.

¹⁴ Tata Diosmanta uj willay chayamuwan. Waj suyukuna ukhupi uj kacha kay jinata qhaparishan: Tantaykukuspa, Edompa contranpi puririychej, maqanakupi tinkumunapaj wakichikuychej, nispa.

¹⁵ Tata Diosqa Edomta nin: Noqa tukuy suyumanta aswan juch'uy kanaykipaj ruwasqayki, jinallataj runakuna ukhupi pisipaj qhawasqa kanki.

¹⁶ Qan mayta runaykachasqaykiwan q'otiyachikorqanki, imaraykuchus tukuyta manchachej kanki. Qanqa chhanka k'ajllukunallapi tiyakoj kanki, orqokunamanta ch'ipasqa. Anka jina may altopi thapachakunki chaypis, chaymantapacha urmaykuchimusqayki. Noqa Tata Diosmin chayta nini.

¹⁷ Tata Dios nillantaj: Edom suyoqa raqayman tukuchisqa kanqa. Tukuy chayninta purejkuna t'ukonqanku, chay jinata rikuspataj, asikonqanku.

¹⁸ Imaynatachus Sodomawan, Gomorrawan, muyuyninpi waj llajtakunawan ima chinkachisqa karqanku, ajinallataj Edompis chinkachisqa kanqa. Manataj pipis chaypi watej tiyakonqañachu, nitaj wasichakonqañachu. Noqa Tata Diosmin chayta nini.

¹⁹ Mana yuyasqaykichej p'unchaypi noqaqa jamusaj, imaynatachus Jordán mayu kantupi ch'umimanta león imata jina llojsimun sumaj wira uywakunata jap'inanpaj, ajinata. Edommanta kajkunatataj chaymanta ayqechisaj. Chantá pitachus noqa ajllasaj, chayta kamachinanpaj churasaj. Pitaj noqa jina kanmanri? Pitaj noqaman sayaykuwayta atinmanri? Mayqen michejtaj ñawpaqeyman churanakoj jamuwanmanri?

²⁰ Ajinaqa uyariychej, noqa Tata Dios imatachus wakichisqayta Edompa contranpi. Jinallataj Temanpi tiyakojkunaj contrankuta wakichisqayta uyariychej: Tukuy oveja, juch'uy corderokuna jina waj suyuman apasqa kanqanku, uywa michina pampankupis q'ara pampaman tukuchisqa kanqa.

²¹ Edompa urmasqanwan kay pachapuni kuyurenqa. Yanapata mañakuspa qhaparikonqa, qhaparikusqantaj Puka Mama Qochakama uyarikonqa.

²² Bosraj contranpi awqanqa oqharikonqa, imaynatachus uj anka oqharikuspa phawan, ajinata. Chay p'unchaypi Edompa soldadonkunaqa kharkatitenqanku, imaynatachus paqarichikoj warmi kharkatitin, ajinata, nispa.

Jeremías Damasco llajtaj contranpi sut'inchan

²³ Damascomanta parlaspataj, Tata Dios nerqa: Jamat llajta, Arfad llajta ima may p'enqachisqa kashanku, willajkuna llakiyta uyarichisqankurayku. Llakiywan junt'a kashanku, mana imatapis ruwayta atispa.

²⁴ Damascomanta runakunaqa manaña kallpayoj kaspa, ayqej churakunku. Sinch'i manchariywan atipachikunku ñak'ariywan, nanaywantaj, paqarichikoj warmej nanayninwan jina.

²⁵ Ancha rejsisqa llajta, chay kusikoj llajta qonqasqa rikhurin.

²⁶ Chay p'unchaypi waynakunaqa callenkunapi mast'alla wijch'urayanqanku, tukuy soldadonkunataj ch'ajwa tinkuypi wañuchisqa kanqanku. Noqa Tukuy Atiyniyoj Tata Dios chayta nini.

²⁷ Damasco llajtaj perqanman ninata jap'iykuchisaj, chay ninataj Ben Adadpa jark'achasqa kamachinan wasitapis ruphaykuspa, tukuchenqa, nispa.

Jeremías Cedar llajta, Jazor llajtaj contrankupi sut'inchan

²⁸ Cedar llajtamanta, Jazor llajtamantawan, mayqenkunatachus Babiloniata kuraj kamachej Nabucodonosor atiparqa, chaykunamanta Tata Dios nin: Oqharikuychej, Cedar llajtaj contranta maqanakoj riychej. Inti llojsimuynejmanta kaj runakunata wañuchispa, tukuchiychej.

²⁹ Toldonkukunata, uywankukunata ima jap'ikapuychej, jinataj qhatanankuta, tukuy imanku kajta apakapuychej. Camellonkukunatapis qhechuychej, qhapariychejtaj: Tukuynejpi manchachikuy tiyan, nispa.

³⁰ Jazorpi tiyakojkuna, usqhayta ayqeychej, jusk'upi pakakamuychej. Babiloniata kuraj kamachej Nabucodonosorqa qankunaj contraykichejpi imatachus ruwananta wakichikunña. Noqa Tata Diosmin chayta nini.

³¹ Noqa Tata Dios kamachini: Chay suyoj contranta maqanakoj riychej. Chay llajtayojkunaqa ni imata manchachikuspa tiyakushanku, mana punkuyoj, mana wisq'anayojtaj llajtankupi sapallanku tiyakushanku.

³² Camellonkukunata, tukuy uywankukunatapis apakapuychej. Noqamin paykunata tukuynejman ch'eqerachisaj kay pachaj k'uchunkama. Tukuynejmanta jatun ñak'ariyta paykunaman kachaykusaj. Noqa Tata Diosmin chayta nini.

³³ Jazor suyu wiñaypaj ch'inman tukuchisqa kanqa, k'ita alqokunaj tiyakunankullanña kanqa. Mana pipis chaypi tiyakonqañachu, ni ñan purejkunallapis chayninta renqankuchu, nispa.

Jeremías Elam suyoj contranpi sut'inchan

³⁴ Maypachachus Judá suyuta Sedequías kamachiyta qallarisharqa chaypacha, Tata Diosqa Jeremiasman Elam suyu imaynachus kananmanta willarqa:

³⁵ Noqa Tukuy Atiyniyoj Tata Dios nini: Elammanta arcowan flechajkunata noqa tukuchisaj, imaraykuchus chaypimin paykuna astawan atinikunku.

³⁶ Kay llajtaman tawantin cheqanejmanta sinch'i wayrata apachimusaj, tukuynejman paykunata ch'eqerachinanpaj. Mana uj suyullapis kanqachu maymanchus mana elamitakuna ayqekusqankoqa.

³⁷ Noqaqa Elammanta kaj runakunata awqankoj ñawpaqenkupi phirisaj, pikunachus paykunata wañuchiyta munajkunaj ñawpaqenkupi. May ñak'ariykunata, may k'araj phiñakuyniytawan paykunaj patankuman kachaykusaj. Maqanakuta kachaykullasajtaj tukuy paykunata chinkachinaykama. Noqa Tata Diosmin chayta nini.

³⁸ Kamachinay tiyanata Elam suyupi churasaj. Chantá kuraj kamachejninkuta, kurajninkukunata ima wañuchisaj. Noqa Tata Diosmin chayta nini.

³⁹ Chaywanpis aswan qhepaman noqaqa ñawpa tiempopi kasqankuman jina paykunata Elamman kutichisaj. Noqa Tata Diosmin chayta nini.