Jeremías 47 - DIOSPA QHELQACHISQ

Jeremías filisteokunaj contranpi sut'inchan

¹ Manaraj faraón Gaza llajtata jap'ishajtin, Tata Diosqa Jeremiasman filisteokunata imachus qhatirinanmanta kay jinata nerqa:

² Tata Dios kay jinata nin: Wichaynejmanta yaku jina junt'aykamonqa. Imaynatachus mayoqa wasaykuspa tukuynin jallp'ata, chaypi kaj llajtakunata, runantinta ima p'ampaykun, ajinata p'ampaykonqa. Tukuy chaynejpi tiyakojkunaqa qhaparenqanku. Tukuy runapis nanaywan waqanqanku.

³ Jinallataj caballokunaj t'ijurisqanta, carretakunaj sonasqanta, jinataj ruedakunaj purisqantapis uyarispa, tatakuna wawankukunata saqerqarenqanku kallpanku pisiyasqanrayku.

⁴ Filisteokunata yanaparej llajtakunapis Tirotawan, jinataj Sidontawan Tata Dios chinkarparichillanqataj. Arí, Tata Diosqa Creta churupi llajtamanta yaykumoj filisteokunata chinkachenqa.

⁵ Chantá Gaza llajtayojkunaqa p'enqachisqa kaspa, chujchankuta ruthukonqanku. Ascalón llajtapis ch'inpacha qhepakonqa. Qankuna jatunkaray ñawpa runakunamanta puchojkuna, mayk'ajkamataj llakisqa kasqaykichejta rikuchispa ukhuykichejta q'allurakunkichejri? nispa.

⁶ Ay, Tata Diospa espadan, mayk'ajllañataj samarikunkiri? Jallch'anaykiman kutiykapuspa, samarillayña.

⁷ Chaywanpis imaynatataj Diospa espadan mana kuyuspa kakunmanri? Tata Diospuni Ascalonpa contranta, mama qocha kantupi kajkunaj contrankutapis kacharqa paykunata chinkachinanpaj.