Jeremías 4 - DIOSPA QHELQACHISQ

Tata Dios nin israelitakuna payman kutirikunankuta

¹ Tukuyta Kamachej Dios nillantaj: Israel, sichus kutimpuyta munanki chayqa, noqaman kutimpuway. Chay millay lantiykikunata wijch'uy, noqamantataj amaña karunchakuychu.

² Chantá cheqan sonqowan cheqanta ruwaspa, jinallataj wajkunapaj allinta ruwaspa ima sutiypi tiluyta atinki. Ajinatachus ruwanki chayqa, tukuy suyukuna sutiynejta saminchasqa kanqanku, paykunataj yupaychawanqanku, nispa.

³ Tata Dios Judapi kaj runakunaman kayta nin, jinallataj Jerusalenpi kaj runakunamanpis: Nisqayta jap'ikunaykichejpaj sonqoykichejta wakichiychej, imaynatachus tarpoj runa mana jayk'aj llank'asqa jallp'ata llank'an, ajinata. Amataj khishka ukhuman tarpuychejchu.

⁴ Judá suyupi, Jerusalén llajtapipis runakuna, noqawan trato ruwasqaykichejta junt'aychej. Sumajta sonqoykichejta wakichiychej yachachisqayta jap'inaykichejpaj. Pajtataj millay ruwasqaykichejrayku phiñakuyniy nina jina k'ajarinman, jap'iykukojtintaj, ni pi thasnuyta atinmanchu, nispa.

Judá suyuta Asiriamanta kajkuna jap'inankuta nin

⁵ Judá suyupi kayta willamuychej, jinallataj Jerusalén llajtapipis uyarichimuychej. Trompetata waqachispa, kay tukuy suyupi qhapariychej, ajinata sinch'itapuni qhapariychej: Tantakuspa, ayqekunachej sumachaj jark'achasqa llajtakunaman, nispa.

⁶ Tata Dios nillarqataj: Wiphalata Sionnejman sayaykuchiychej. Sumaj jark'achasqa cheqaman ayqeychej, amataj qhepakuychejchu, imaraykuchus wichaynejmanta jatun ñak'ariyta, wañuytawan apachimusaj.

⁷ Leonqa jusk'umanta llojsimunña. Suyukunata chinkarachejqa puririmunña, tukuy llajtaykita ch'inyachinanpaj, raqaykunallataña saqenanpaj ima.

⁸ Chayrayku qhashqa p'achawan p'achallikuychej. Nanaywan qhaparqachaspa waqaychej, imaraykuchus Tata Diospa k'araj phiñakuynenqa manaraj noqanchejmanta t'aqakunchu, nispa.

⁹ Tata Dios nillantaj: Chay p'unchay chayamojtenqa, kuraj kamachej, kurajkunantin ima manchachikuywan kharkatitenqanku. Sacerdotekunapis mayta mancharikonqanku, Diosmanta sut'inchajkunapis t'ukushaj qhepakonqanku, nispa.

¹⁰ Chantá noqa Jeremías nerqani: Ay, Tukuyta Kamachej Tata Dios, imaraykutaj Jerusalenpi tiyakojkunata q'otiyankiri? Allin kawsayta qosqaykichej, nispa nerqanki. Kunantajrí kunkankupi espada churasqa kashan, nispa.

¹¹ Tata Diostaj kuticherqa: Chay p'unchay chayamojtin, Jerusalén llajtapi tiyakojkunaman nenqanku: Jerusalenman ch'innejmanta ch'aki wayra phukumushan. Chay wayraqa mana trigota wayrachinapaj jinachu.

¹² Chay wayrata noqa apachimusaj, chaytaj ancha nishu wayra kanqa. Kunanraj paykunaj contrankupi ñak'ariy wakichisqayta rimarisaj, nispa.

Israel suyuta Asiriamanta soldadokuna muyuykunku

¹³ Chantá israelitakuna nenqanku: Qhawariychej, awqanchejkuna phuyu jina jamurishanku. Carretankupis sinch'i muyoj wayraman rijch'akunku, caballonkutaj ankakunamantapis aswan usqhayta phawanku. Ay, noqanchejqa imallapichus tukukusunchejpis, nispa.

¹⁴ Tata Diostaj kutichenqa: Jerusalén, millay ruwasqaykimanta sonqoykita llimphuchakuy, jinamanta qhespichisqa kanaykipaj. Mayk'ajkamataj umaykipi chay millay yuyaykuna muyonqankuri?

¹⁵ Dan llajtamantapacha mana allin willaykuna uyarikun, Efraín orqonmantataj llakiy willaykuna uyarikullantaj.

¹⁶ Suyukunaman, chantá Jerusalenmanpis willaychej karu llajtamanta awqankuna kachaykakamusqankuta. Tukuy Judá suyupi llajtakunaj contranta maqanakunapaj qhaparishanku.

¹⁷ Imaynatachus chajrata qhawajkuna muyuykunku, ajinata Judá suyuta muyuykonqanku, contraypi oqharikusqanrayku. Noqa Tata Diosmin chayta nini.

¹⁸ Millayta purisqaykirayku, ruwasqaykiraykutaj, kay jina llakiyta ñak'arinayki qhatirisunki. Juchallisqaykiraykutaj kay jatun llakiykuna jamun, chaytaj sonqoykita mayta nanachisunki, nispa.

Jeremiasqa Israel suyuta jap'inankumanta llakikun

¹⁹ Nanaywan q'ewiykachakuni, sonqoytaj llakiywan phatashanña. Mana kakuyta atinichu, manataj ch'inlla kaymanchu. Trompetaj waqasqanta uyarini, maqanakuman yaykunapaj qhaparejtawan.

²⁰ Patanpi patanpi llakiy willay chayamun. Tukuy Judá suyu ch'inyachisqa kashan. Kaymanta jinalla toldoykuna phirisqa rikhurerqanku, jarakunaytaj phirisqa karqanku.

²¹ Mashkha unaytawanraj wiphala sayachisqata rikusajri? Mashkhatawanrajtaj trompetaj waqasqanta uyarisajri?

²² Tata Dios nin: Israel aylloyqa ancha wampu kanku, mana rejsikapuwanchu. Mana yuyayniyoj wawakuna kanku, mana allintachu unanchakunku. Juchallinankupajqa churasqa kanku, allin kajtatajrí mana ruwayta yachankuchu, nispa.

Jeremías Judá suyuman ñak'ariy chayamunanta rikun

²³ Kay pachata qhawarqani, ch'inpachatataj rikorqani, mana allin rijch'ayniyojtataj. Janajta qhawarerqani, manataj k'anchayta rikorqanichu.

²⁴ Orqokunata qhawarejtiy, manchayta ikharikusharqanku. Tukuy juch'uy orqokunapis kharkatitishallarqankutaj.

²⁵ Qhawarerqani, manataj ni uj runallatapis rikorqanichu. Tukuy p'isqokunapis ayqespa, phawarikapusqanku.

²⁶ Qhawarispa, sumaj poqoj jallp'akunapis ch'inman tukuchisqa kasqankuta rikorqani, tukuy llajtankunataj raqayllaña kasqankuta. Tata Diosmin k'araj phiñakuyninpi chay tukuyta ruwarqa.

²⁷ Tata Dios nin: Tukuy jallp'a ch'inman tukuchisqa kanqa. Chaywanpis mana tukuynintapunichu tukuchisaj.

²⁸ Tukuy jallp'aman llakiylla junt'aykonqa, janajpis llakiy p'achata churakonqa. Chayta nini, manataj imatachus nisqaymanta kutirisajchu. Chayta niniña, manataj kutiriymanchu, nispa.

²⁹ Caballokunapi jamojkunaj, jinallataj arcowan flechajkunaj ch'ajwasqankuta uyarispa, runakuna usqhay usqhayta ayqenku, ch'umi ukhuman pakakamunankupaj, chayrí qaqa k'ajllukunaman. Tukuy llajtakuna ch'usaj wasilla qhepakunku. Manaña pipis chaypi tiyakoj kanñachu.

³⁰ Qanrí, thuñisqa llajta, imapajtaj yana kulliraw p'achawan p'achallikunkiri? Imapajtaj qori jaluchuwan k'achanchakunkiri? Imapajtaj ñawiykita yanawan pintakunkiri? Chay jinata k'achanchakusqaykeqa qhasi manakajlla kanqa. Munapayasojkuna saqerpayasunku, aswanpis wañuchinasunkupaj mask'ashasunku.

³¹ Nanaywan qhaparisqankuta uyarini, imaynatachus uj warmi kuraj kaj wawanta paqarichikushaspa qhaparin, ajinata. Chayqa Sionpa nanaywan qhaparikusqan, makinta jaywarakuspataj, nin: Ay, noqamanta, kay runa wañuchejkuna wañuchiwanqankuña, nispa.