Jeremías 38 - DIOSPA QHELQACHISQ

Jeremiasta ch'aki pujyuman wijch'uykunku

¹ Matanpa churin Sefatías, Pasjurpa churin Gedalías, Selemiaspa churin Jucal, chantá Malquiaspa churin Pasjur ima uyarerqanku Jeremías imatachus tukuy runaj uyarinanta willarasharqa, chayta. Jeremías nisqa:

² Tata Dios nin: Pichus llajtapi qhepakojqa maqanakupi, onqoywan, chayrí yarqhaywan wañonqa. Pichus caldeokunaman k'askapojrí mana wañuchisqachu kanqa, nispa.

³ Tata Dios nillantaj: Kay Jerusalén llajta Babiloniata kuraj kamachejpa soldadonkunaj makinkuman jaywaykusqa kanqa. Paytaj atipaspa, llajtata jap'enqa, nispa.

⁴ Chantá chay kurajkunaqa kuraj kamachejman willamorqanku: Jeremiasta wañuchina, imaraykuchus imatachus nisqanwan llajtanchejpi qhepakoj soldadokunata iskayrayachin, jinallataj tukuy runatapis. Kay runaqa mana kay llajtaj allinnintachu mask'an, aswanqa mana allinnillanta munan, nispa.

⁵ Jinapi kuraj kamachej Sedequías paykunaman kuticherqa: Jeremiasqa makiykichejpi kashan. Noqa mana imatapis ruwayta atinichu qankunamanta payta jark'akunaypaj, nispa.

⁶ Chantá paykuna Jeremiasta jap'iytawan, kuraj kamachejpa ayllunmanta kaj churin Malquiaspa pujyunman wijch'uykorqanku. Chay pujyoqa kuraj kamachejpa wasinta qhawajkunaj pation chawpipi karqa, chaymantaj Jeremiasta waskhawan wataykuspa urayk'ucherqanku. Chay pujyupi mana yaku kasqachu, manachayqa t'urulla, chaypitaj Jeremías t'uruman chinkaykorqa.

⁷ Chaypacha Etiopiamanta uj runa Ébed Mélec sutiyoj kuraj kamachejpa wasinpi kuraj kamachi karqa. Paytaj uyarisqa Jeremías pujyuman wijch'uykusqa kasqanta. Chaypachataj kuraj kamachejqa Benjaminpa Punkun nisqapi tiyasqa kasharqa.

⁸ Chantá Ébed Melec kuraj kamachejpa wasinmanta llojsispa, kuraj kamachejwan parlamoj rerqa. Paytaj nerqa:

⁹ Wiraqochíy, chay runakuna imatachus Diosmanta sut'inchaj Jeremiasta ruwasqankoqa mana walejchu. Paykunaqa uj pujyuman payta wijch'uykunku, chaypitaj yarqhaywan wañonqa, imaraykuchus llajtapi mikhuna mana kanñachu, nispa.

¹⁰ Chantá chaypachapacha kuraj kamachejqa Etiopía llajtayoj Ébed Melecllatataj kamacherqa kinsa chunka runakunata pusariykukuspa, Diosmanta sut'inchaj Jeremiasta orqhomoj rinanta, manaraj chay pujyupi wañushajtin.

¹¹ Chantá Ébed Melec runakunata pusariykukuspa, kuraj kamachejpa wasinman kutirerqa. P'acha jallch'ana cuartomantataj mawk'a p'achakunata orqhomuspa, pujyuman waskhapi Jeremiasman kachaykorqa, nerqataj:

¹² Chay thanta p'achata wallak'uykiman churaykukuy ama waskha nanachisunanpaj, nispa. Etiopía llajtayoj Ébed Melecpa nisqanta Jeremías ruwarqa.

¹³ Chantá chay runakuna Jeremiasta pujyumanta orqhorqanku. Chaymantataj Jeremías kuraj kamachejpa wasinta qhawajkunaj pationllapiña presochasqa qhepakorqa.

Sedequías Jeremiasta pakayllapi tapurikun

¹⁴ Chaymantataj kuraj kamachej Sedequiasqa Jeremiasta ñawpaqenman pusamunankuta kamacherqa, Tata Diospa Templonpa kinsa kaj punkunnejman. Chaypitaj kuraj kamachejqa payta nerqa: Ujta tapurikusqayki. Ama imatapis pakaspa, sut'inta willaway, nispa.

¹⁵ Jeremiastaj kuticherqa: Cheqantachus kutichisqayki chayqa, wañuchinawankuta kamachinki. Sitajchus imatapis yuyaychaykiman chayqa, manallataj kasuwankimanchu, nispa.

¹⁶ Chantá kuraj kamachej Sedequías pakayllapi tiluspa, Jeremiasta kay jinata nerqa: Pichus kawsayta qowanchej, chay Tata Diospa sutinrayku tiluyki: Mana wañuchichisqaykichu nitaj kunanpis wañuchiyta munajkunaman jaywaykusqaykichu, nispa.

¹⁷ Chantá Jeremías Sedequiasta nerqa: Israelpa Tukuy Atiyniyoj Tata Diosnin nisunki: Sichus Babiloniata kuraj kamachejpa soldadonkunata kamachejkunaman chimpaykapuwaj chayqa, qan, jinataj aylluykiwan mana wañuchisqachu kankichej. Kay llajtapis nillataj ruphachisqachu kanqa.

¹⁸ Manatajchus paykunaman k'askapuwaj chayrí, Caldeamanta soldadokuna jamuspa, kay llajtata jap'enqanku, ruphaykuchenqankutaj. Qanpis makinkumanta mana llusp'iyta atinkichu, nispa.

¹⁹ Jinapi Sedequías kuticherqa: Caldeokunaman chimpapunkuña, chay judiokunata manchachikuni, imaraykuchus caldeokunaqa chay judiokunaj makinkuman jaywaykuwankuman, paykunataj imaymanata ruwawankuman, nispa.

²⁰ Jeremiasrí kuticherqa: Mana judiokunaj makinman chayankichu. Tata Diospa nisqanta willasusqayta kasuy. Ajinamanta allinmin risonqa, manataj wañunkichu.

²¹ Sichus caldeokunaman k'askapuyta manapuni munankichu chayrí, Tata Dios niwanña imachus qhatirisunanta:

²² Caldeamanta soldadokunaqa Judá suyuta kuraj kamachejpa wasinpi tukuy qhepakoj warmikunata orqhospa, Babiloniaj soldadonkunaj kurajninkunaman jaywaykonqanku. Chay warmikunataj kay jinata qanmanta nenqanku: Qanpa kawsaqeykikunallataj wasanchasorqanku, atipaykusorqankutaj. Chakiyki t'uruman chinkaykushajtinpis, paykuna saqerparisorqanku, nispa.

²³ Chantá Jeremías kuraj kamachejta nillarqataj: Tukuynin warmiykikuna, wawaykikunapis caldeokunaman jaywaykusqa kanqanku. Qanpis mana paykunamanta llusp'iyta atinkichu. Manachayqa chay soldadokuna Babiloniata kuraj kamachejman jaywaykusonqanku, chaymantataj kay llajtata ninawan kanaykonqanku, nispa.

²⁴ Chantá kuraj kamachej Sedequías Jeremiasta nerqa: Ama pimanpis chaymanta parlaychu, ama wañuchisqa kanaykipaj.

²⁵ Sichus kurajkuna qanwan parlasqayta yachanqanku chayqa, jamuspa tapusonqanku imatachus qan niwasqaykita, noqapis imatachus qanman nisusqayta. Manachus willawayku chayqa, noqayku qanta wañuchisqayki, nispa, tukuy imata willanaykita munanqanku.

²⁶ Jinapis qan kutichinki: Noqa kuraj kamachejta nikorqani ama Jonatanpa wasinman kutichinawanta, chaypi ama wañunaypaj, nispa.

²⁷ Jinataj ari, tukuy kurajkuna Jeremiasman rispa, chaymanta taporqanku. Paytaj kuraj kamachejpa kamachisqanman jina kuticherqa. Chaypacha paykunaqa mana imanaspalla Jeremiasta saqeporqanku, imaraykuchus mana pipis uyarisqachu imatachus kuraj kamachejwan, Jeremiaswan parlasqanku, chayta.

²⁸ Jeremiastaj kuraj kamachejpa wasinta qhawajkunaj pationpi qhepakorqa, Caldeamanta soldadokuna Jerusalenta jap'erqanku, chay p'unchaykama.