Jeremías 32 - DIOSPA QHELQACHISQ

Jeremías jallp'ata rantin

¹ Tata Diosqa Jeremiasman parlarqa, Judapi Sedequías chunka watataña kamachishajtin, Nabucodonosortaj Babilonia suyupi chunka pusajniyoj watataña kamachishajtin.

² Chaypacha Jerusalenqa Babiloniaj soldadonkunawan muyuykusqa kasharqa. Diosmanta sut'inchaj Jeremiastaj Judata kuraj kamachejpa wasinta qhawajkunaj pationpi wisq'asqa kasharqa.

³ Judata kuraj kamachej Sedequías Jeremiasta wisq'aykuchisqa kay jinata sut'inchasqanrayku: Tata Dios nin: Babiloniamanta kuraj kamachej kay llajtata jap'enqa.

⁴ Judata kuraj kamachej Sedequiaspis caldeokunamanta mana llusp'enqachu, manachayqa Babiloniamanta kuraj kamachejpa makinman urmanqa, paywantaj uyapura parlanqa.

⁵ Nabucodonosortaj Sedequiasta Babiloniaman apachenqa, chaypitaj Sedequías qhepakonqa, paymanta noqa yuyarikunaykama. Sichus qankuna caldeokunawan maqanakoj churakunkichej chayqa, mana paykunata atipankichejchu. Noqa Tata Diosmin chayta nini.

⁶ Jinapi Jeremías nillarqataj: Tata Dios niwarqa:

⁷ Uyariway, tioyki Salunpa churin Janamel kay jinata parlapayasoj jamonqa: Anatotpi jallp'ayta rantikapuway, imaraykuchus qanmin aswan qaylla aylluy kanki, nispa.

⁸ Chantá Tata Dios niwasqanman jina tioypa churin Janamel kuraj kamachejpa wasinta qhawajkunaj pationman jamuwaspa, niwarqa: Rantikapuway Benjamín jap'iypi kaj Anatot llajtapi jallp'ayta. Qanllamin rantiyta atinki aswan qaylla aylluy kasqaykirayku. Chayrayku rantikapuway ari, nispa. Jinapi yacharqani chay jallp'ata rantinay Tata Diosmanta kasqanta.

⁹ Chantá tioypa churin Janamelmanta Anatotpi kaj jallp'anta ranterqani, parlasqaykuman jinataj chunka qanchisniyoj qolqeta pagarqani.

¹⁰ Chay tratotataj papelpi qhelqaspa, chantá sellaspa ima wakicherqayku. Papeltaqa testigokunaj rikunankuta ruwarqayku, jinaspataj mañakusqan qolqe metalta balanzapi tuporqani.

¹¹ Chaymanta trato ruwasqa iskaynin papelta jap'erqani. Ujnenqa sellasqa karqa imaynapichus rantisqa kasqanta, chay ujnintaj mana sellasqachu karqa.

¹² Chantá chay papelkunata Neriaspa churin Maseiaspa allchhin Barucman jaywarqani. Tioypa churin Janamelpa ñawpaqenpi, pikunachus testigo jina sutinkuta qhelqaykorqanku, chaykunaj ñawpaqenkupipis jaywarqani. Jinallataj pikunachus kuraj kamachejpa wasinta qhawajkunaj pationpi kasharqanku, chay judiokunaj ñawpaqenkupi ima jaywarqani.

¹³ Chantá paykunaj uyarinankuta Barucman nerqani:

¹⁴ Israelpa Tukuy Atiyniyoj Tata Diosnin kay jinata nin: Iskaynin trato ruwasqa papelkunata, chay sellasqa kajta, jinataj chay mana sellasqa kajtapis uj p'uñuman jallch'aykuy, chaypi unayta waqaychasqa kananpaj.

¹⁵ Israelpa Tukuy Atiyniyoj Tata Diosnin nin: Kay suyupi watej wasikunata, jallp'akunata, uva huertakunatapis rantikullanqankutaj, nispa.

Jeremías Tata Dioswan parlarikun

¹⁶ Neriaspa churin Barucman rantisqaymanta papelkunata jaywaytawankama, kay jinata Tata Diosta nerqani:

¹⁷ Tukuyta Kamachej Tata Diosníy, jatun atiyniykiwan janaj pachata, kay pachatapis ruwarqanki. Qanpajqa tukuy ima ruwana atikullan.

¹⁸ Qanmin may chhika runakunaman khuyakuyniykita rikuchinki, jinapis runakunata tatankoj mana allin ruwasqanmanta jasut'inki. Tata Dios, may Jatun Atiyniyoj kanki, sutiykeqa Tukuy Atiyniyoj Tata Diosmin.

¹⁹ Imatachus wakichisqayki jinataj ruwasqayki manchayta t'ukunapaj jina. Qanqa tukuy runaj ruwasqankuta rikunki, ruwasqankuman jinataj qopunki.

²⁰ Qanmin t'ukuna imakunata, jinataj runaj mana jayk'aj rikusqanta Egiptopi ruwarqanki. Kunanpis Israelpi chay jinata ruwashallankirajpuni, jinataj tukuy kay pachapipis. Ajinata ruwasqaykirayku kunankama sutiykeqa manchay uyarisqa.

²¹ Qanqa may jatun atiyniykiwan Israel aylluykita Egiptomanta orqhomorqanki. Runaj mana jayk'aj rikusqan t'ukunata ruwaspataj, tukuy runata mancharicherqanki.

²² Israel aylluykiman, maypichus lechewan, abeja misk'iwan yaku jina puririshan, chay jallp'ata qorqanki, ñawpa tatankuman nisqaykiman jina.

²³ Paykunataj qosqayki jallp'aman yaykuspa, dueñochakorqanku. Chaywanpis mana kasusorqankuchu nitaj kamachisqaykita junt'arqankuchu. Manallataj paykuna kamachisqaykita ruwarqankuchu. Chayraykumin kay tukuy ñak'ariykunata paykunaman kachaykamorqanki.

²⁴ Kunan Caldeamanta runakuna jallp'amanta moqota ruwankuña kay llajtaman phawaykamunankupaj. Jinataj maqanaku, yarqhay, onqoy ima kay llajtata jap'enqanku. Tata Dios, nisqayki imaynatachus junt'akushasqanta rikushanki.

²⁵ Chaywanpis, Tukuyta Kamachej Tata Dios, qanqa kamachiwarqanki testigokunaj rikunanta uj jallp'ata rantikunayta, kay llajtata Caldeamanta runakuna jap'inanku kashajtinpis, nispa.

²⁶ Chaypacha Tata Dios Jeremiasman kuticherqa:

²⁷ Noqa Tata Diosmin tukuy kawsajpa Diosninku kani. Noqapajqa mana imapis mana atikojqa kanchu.

²⁸ Chayrayku noqa niyki: Noqaqa Babiloniaj kuraj kamachej Nabucodonosorman, caldeokunaman ima kay llajtata jap'inankupaj jaywaykusaj.

²⁹ Caldeokuna kay llajtaman yaykuspa, ninawan jap'iykuchenqanku. Maypichus israelitakuna noqata mayta phiñachiwaspa, Baalman inciensota q'oshñichej kanku, jinataj mana rejsisqa dioskunaman vinota jaywaj kanku, chay wasikunatapis ruphaykuchillanqankutaj.

³⁰ Qallariymantapacha Israel ayllu, chantá Judá ayllupis ñawpaqeypi millayta ruwarqanku. Israelitakunaqa paykunaj ruwasqanku lantikunata yupaychaspa, phiñachillawajpuni kanku. Noqa Tata Diosmin chayta nini.

³¹ Noqa nillanipuni: Kay llajtaqa sayarichisqa kasqanmantapacha kunan p'unchaykama k'arajta phiñachillawan. Chayraykumin kay llajtata ñawpaqeymanta chinkarparichisaj.

³² Tukuy mana allin ruwasqankuwan phiñachiwasqankurayku, Israel aylluta, Judá ayllutapis, jinallataj kuraj kamachejninkuta chinkarparichisaj. Jinallataj sacerdotenkunata, Diosmanta sut'inchaj kasqankuta nejkunata, Judapi, Jerusalenpiwan tukuy tiyakojkunatapis chinkarparichillasaj.

³³ Paykunaqa wasanchawarqanku, manataj kutirikamuwayta munarqankuchu. Noqa paykunata kutin kutinta yachachispa k'amerqani chaypis, mana kasuwarqankuchu, nitaj jasut'isqaywan wanaytapis munarqankuchu.

³⁴ Astawanpis noqapaj t'aqasqa Temployta ch'ichicharqanku millay lantinkuta chaypi sayachispa.

³⁵ Jinallataj Ben Jinón vallepipis Baalpaj altarkunata ruwarqanku chaypi churinkunata, ususinkunata ima uywa ñak'asqata jina Molocman q'olachinankupaj. Noqatajrí chay jina millayta ruwanankuta ni jayk'aj kamacherqanichu, nitaj yuyallarqanipischu. Jinata ruwaspa, chay kurajkunaqa Judá suyupi tiyakoj runakunata juchallicherqanku, nispa.

Qhepanejman Dios imatachus ruwananta nin

³⁶ Qankuna kay llajtamanta ninkichej: Maqanaku, yarqhay, onqoy ima kasqanrayku, kay llajtaqa Babiloniamanta kuraj kamachejpa makinman urmanqa, nispa. Israelpa Tata Diosninrí kay jinata nin:

³⁷ Kay llajtayojkunata tantaykusaj, maykunamanchus may sinch'i phiñakuyniypi paykunata ch'eqeracherqani, chay suyukunamanta. Chantá paykunata watej kay cheqaman kutirichimusaj, mana imamanta manchachikuspa kaypi tiyarikunankupaj

³⁸ Paykuna aylluy kanqanku, noqataj Diosninku kasaj.

³⁹ Chantá uj sonqolla, uj yuyayniyojllataj kanankuta ruwasaj, noqata wiñaypaj yupaychanawankupaj. Ajinata ruwasqankoqa paykunapaj, chantá wawankupaj ima allin kanqa.

⁴⁰ Jinallataj paykunawan uj tratota wiñaypaj ruwasaj: Noqa paykunawan tukuy tiempo kasaj, yanapasajtaj. Chantá paykunaman noqata may jatun respetowan qhawanawankuta yachachisaj, ama noqamanta karunchakunawankupaj.

⁴¹ Noqaqa paykunapaj allin kajta ruwaspa, kusikusaj. Chantá tukuy sonqo, tukuy alma paykunata kay suyupi kawsachisaj, nispa.

⁴² Tata Dios nillarqataj: Imaynatachus kay suyuman jatun ñak'ariyta kachaykamorqani, ajinallatataj aswan jaqayman nisqayman jina tukuy allin kajta paykunapaj ruwasaj.

⁴³ Qankuna ninkichej: Kay suyoqa mana runakunayoj, mana uywakunayojtaj ch'in qhepakun, caldeokunaj makinkuman jaywaykusqa kasqanrayku, nispa. Chaywanpis kay suyupi runakunaqa watej jallp'ata rantikonqanku.

⁴⁴ Jallp'ata qolqewan rantikuspa, papel ruwasqankuta sellaspa testigokunaj rikunankuta wakichenqanku. Ajina kanqa Benjamín jap'iypi, jinallataj Jerusalén llajtaj muyuyninpi, chantapis Judáj llajtankunapi, orqorara cheqanejpi kaj llajtakunapi, pampapi kaj llajtakunapi, jinataj Néguev cheqapi kaj llajtakunapi ima. Ajina kanqa, imaraykuchus noqa Babiloniamanta paykunata kutichimusaj. Noqa Tata Dios chayta nini.