Jeremías 3 - DIOSPA QHELQACHISQ

Tata Dios nin Israel payman kutirikamunanta

¹ Tata Dios nillantaj: Sichus uj qhari warminmanta t'aqakunman, chay warmitaj waj qhariwanñataj casaranman chayqa, ñawpa qosanwan manaña ujtawan casarayta atinchu. Sichus kutikapunman chayrí, tukuy runapaj p'enqay kanman. Qanrí Israel, ashkha qhariykikunawan khuchichakorqanki. Chaywanpis kunan noqaman kutirimpuyta munashankiraj. Noqa Tata Diosmin chayta nini.

² Q'ara orqokunata allinta qhawariy: Mana mayqen orqo kanchu mana khuchichakusqaykeqa. Ch'innejpi Arabiamanta runakuna jina chukuykuspa, qhariykita ñan patallapi suyaj kanki. Kay suyutataj khuchichakusqaykiwan, chantá millay ruwasqaykiwan ima qhenchacharqanki.

³ Chayraykumin paraqa mana kanchu, qhepa kaj para, jinataj q'omer tiempo parapis. Qanqa mana p'enqarikunkichu, chayrayku phisu warmimantapis aswan millayraj kanki.

⁴ Manaraj unaychu niwasqaykeqa: Tatay kanki, sipas kashaspa munakusqay kanki, nispa.

⁵ Qanqa nishawankiraj: Phiñasqallapunichu kanki? Wiñaypajchu noqapaj phiñasqa kanki? nispa. Chayta nishawaspapis, qanqa atisqaykita millay kajta ruwashallankipuni, nispa.

Israelqa qosanta wasanchaj warmi jina

⁶ Kuraj kamachej Josías kamachishajtin, Tata Dios nillawarqataj: Mana kasukoj Israel ayllu imatachus ruwasqanta rikunkichu? Payqa tukuy orqo patapi khuchichakunaman qokorqa, jinallataj tukuy thansarara sach'a urapipis khuchichakullarqataj.

⁷ Noqa yuyarqani chay tukuy imata ruwaytawan, watej noqaman kutimpunawanta, manataj kutimpuwarqachu. Chay ruwasqanta mana kasukoj ñañan Judapis rikullarqataj.

⁸ Jinallataj pay rikorqa imaynatachus contraypi oqharikoj Israelta wijch'usqayta, chantá khuchichakusqanrayku paymanta t'aqakusqayta ima. Jinapis Israelpa ñañan wasanchaj Judá mana manchachikorqachu, manachayqa paypis khuchichakunaman qokullarqataj.

⁹ Israelqa imatachus ruwasqanta pujllakunata jinalla qhawaspa, tukuy suyuntinta ch'ichicharqa. Pay t'aqakuwaspa, rumikunata, k'ullukunatawan yupaychaj churakorqa.

¹⁰ Chaywanpis wasanchawaj Judaqa mana tukuy sonqowanchu noqaman kutirimuwarqa, manachayqa pujllakullawarqa. Noqa Tata Diosmin chayta nini.

¹¹ Tata Dios nillawarqataj: Mana kasukoj Israelqa pisi juchayoj chay wasanchawaj Judamanta nisqaqa.

¹² Chayrayku, wichaynejman rispa, kayta Israelman willamuy: Tata Dios nin: Noqaman kutimpuway, wasanchawaj Israel. Mana phiñasqachu qanta qhawasqayki, nitaj phiñakuyneyqa wiñaypajchu kanqa, imaraykuchus noqaqa khuyakuyniyojmin kani. Noqa Tata Diosmin chayta niykichej.

¹³ Millay juchayoj kasqaykita reparakuy. Noqa Tata Diospa contrayta oqharikusqaykita, mana rejsisqayki qharikunawan tukuy thansarara sach'a urapi khuchichakusqaykita, kamachisqayta mana kasusqaykita ima reparakuy. Rimariy kamachisqayta mana kasusqaykita. Noqa Tata Diosmin chayta nini.

¹⁴ Tata Dios nillantaj: Contrayta oqharikoj churiykuna, noqaman kutirimuychej, imaraykuchus noqa qankunaj dueñoykichej kani. Noqa sapa llajtamanta ujta ajllakusaj, sapa ayllumantataj iskayta, jinaspataj, Sionman ujtawan kutichimusaj.

¹⁵ Chantá noqa jina sonqoyoj kamachejkunata churapusqaykichej, paykunataj qankunata sumaj yachaywan, allin yuyaywantaj michisonqachej.

¹⁶ Qankuna jallp'aykichejpi kaspaña, astawan mirajtiykichej, ashkha wawayojñataj kajtiykichej, mana pipis parlanqañachu Tata Diospa trato ruwasqan arcamanta. Manaña pipis chaypi yuyanqañachu, nitaj ujtawan yuyarikunkichejñachu. Manataj pipis watukonqañachu, nitaj qankuna waj mosoj arcata ruwakunkichejchu. Noqa Tata Diosmin chayta nini.

¹⁷ Chaypacha Jerusalenta sutichanqanku: “Tata Diospa Kamachinan Tiyana”, nispa, tukuy suyumanta kajkunataj chaypi yupaychanawankupaj tantakonqanku. Manaña ujtawan sonqonkupi k'ullukuspa sajra yuyasqankuwan apachikonqankuchu.

¹⁸ Chay p'unchay chayamojtin, Judá aylloqa Israel aylluwan khuska tantakonqa. Iskayninkutaj wichaynej suyumanta kutimonqanku, ñawpa tataykichejkunaman chayaqepaj qorqani, chay jallp'aman.

Israelqa lantikunata yupaychaspa juchallin

¹⁹ Israel, noqa qanta wawaypaj jina jap'ikapuyta yuyarqani, sumaj moq'ena jallp'ata qonasuypaj, tukuy kay pachapi jallp'amanta aswan sumaj jallp'ata. Noqa yuyarqani: Tatáy, nispa ninawaykita, manataj jayk'ajpis noqamanta karunchakunawaykita.

²⁰ Chaywanpis qankunaqa, imaynatachus uj warmi qosanta wasanchan, ajinata wasanchawarqankichej. Noqa Tata Diosmin chayta nini.

²¹ Ch'in orqokunapi qhaparisqanku uyarikun. Chayqa kashan khuyakuyta mañakuspa israelitakunaj waqasqanku. Paykuna cheqan ñanmanta pantaykorqanku, jinataj Diosninku Tata Diosmanta qonqaporqanku.

²² Tata Diosrí paykunata nin: Mana kasukoj churikuna, noqaman kutirimpuwaychej, noqataj contrayta oqharikoj sonqollapuni kasqaykichejmanta qhaliyachisqaykichej, nispa. Qankuna niwankichej: Arí, watejmanta kutimpusqayku, imaraykuchus qanllamin Diosniyku Tata Dios kanki.

Israelitakunaqa Tata Diosman kutichinku

²³ Cheqapuni qhasi kasqa orqo pataman lantikunata yupaychaj wicharisqaykoqa, jinallataj orqokunapi qhaparqachasqaykupis. Diosniyku Tata Diosllamin Israel suyuta yanapawasqayku.

²⁴ Lantikunata p'enqayta yupaychasqaykupi, wawakunallaraj kashajtiyku imatachus tataykukuna tarerqanku, chay tukuyta chinkacherqayku lantikunata p'enqayta yupaychasqaykupi. Jinallataj ovejakunata, wakakunata, qhari wawakunata, warmi wawakunata ima chinkachillarqaykutaj.

²⁵ May p'enqayta k'umuykuchisqa kashayku ari, honrayku t'akasqa kasqanrayku pampallata qhawaspa, imaraykuchus wawa kasqaykumantapacha kunankama noqayku, ñawpa tataykukuna ima juchallillarqaykupuni. Jinallataj noqayku Tata Diosniykoj contranpi oqharikuspa, mana kamachisqaykita kasorqaykuchu, nispa. Ajinata israelitakuna nerqanku.