Jeremías 25 - DIOSPA QHELQACHISQ

Israelitakuna wijch'usqa kanankumanta willay

¹ Josiaspa churin Joacín tawa watataña Judapi kamachishajtin, Tata Diosqa Jeremiasman willarqa Judá suyuman imachus jamunanta. Chay karqa Babiloniapi kuraj kamachej Nabucodonosor uj watallataraj kamachishajtin.

² Chantá Diosmanta sut'inchaj Jeremías kay willayta tukuy Judá suyupi, jinataj Jerusalenpi tukuy tiyakojkunamanwan willarqa:

³ Amonpa churin Josías chunka kinsayoj watata Judapi kamachisqanmanta kunankama, iskay chunka kinsayoj watataña Tata Dios noqaman parlamullawanpuni. Noqataj chayta qankunaman kutin kutinta willarqaykichej. Qankunatajrí manapuni uyariwarqankichejchu.

⁴ Jinallataj Tata Diosqa kutin kutinta waj sut'inchajkunata kachamusorqachej, qankunatajrí mana kasuta ruwarqankichejchu, nitaj uyariyllatapis munarqankichejchu, nillataj chay nisqankuta kasorqankichejchu.

⁵ Paykuna nisorqachej: Millay purisqaykichejta chantá millay ruwasqaykichejtapis saqeychej. Ajinatachus ruwankichej chayqa, tiyakuyta atillankichej, Tata Dios qankunaman, jinataj ñawpa tataykichejkunaman wiñaypaj qosorqachej, chay jallp'api.

⁶ Ama waj dioskunaj qhepankuta riychejchu, paykunaj munayninkuta ruwanaykichejpaj, yupaychanaykichejpajtaj. Imatachus ruwasqaykichejwan ama phiñachiwaychejchu. Noqataj mana imatapis contraykichejpi ruwasajchu, nispa.

⁷ Kunantajrí Tata Dios nin: Chaywanpis qankunaqa manapuni kasuyta munawarqankichejchu, manachayqa qankuna kikiykichej phiñachiwankichej, ruwakusqaykichej dioskunata yupaychaspa. Chaytaj qankunata mana allin rinasuykichejpaj kanqa, nispa.

⁸ Chayrayku Tukuy Atiyniyoj Tata Dios ajinata nin: Qankunaqa k'amisqayta mana kasuwarqankichejchu.

⁹ Chayrayku wichaynejmanta tukuy soldadokunata wajyasaj, jinallataj Babiloniamanta kamachiy Nabucodonosortapis. Chantá paykuna kay suyuman yaykumuspa, tukuy kaypi tiyakojkunawan maqanakonqanku, jinallataj chay qaylla suyukunawanpis. Ajinata qankunata kantumanta tukuchisqaykichej. Llajtaykichejkunata raqaykunallaña kanankupaj ruwasaj, jinallataj mancharikunapaj, asikunapaj jina ruwasaj.

¹⁰ Qankuna ukhupi kusiy wayñu, raymi takiykunapis manaña uyarikonqachu, nitaj casarakojkunaj takirisqankupis. Jinallataj maranpi kutanapis mana uyarikonqachu. Lamparakunapis manaña rikukonqachu.

¹¹ Tukuy kay suyoqa ch'inyachisqa kanqa, raqayman tukuchisqataj. Kay suyumanta runakunataj qanchis chunka wata junt'ata Babiloniata kuraj kamachej makinpi kankichej.

¹² Qanchis chunka wata junt'akojtin, Babiloniata kuraj kamachejta millay ruwasqanmanta jasut'isaj, jinallataj caldeokunatapis. Chay suyukunata wiñaypaj ch'inyachisaj. Noqa Tata Diosmin chayta nini.

¹³ Nisqayman jina Babilonia suyuta jasut'isaj, tukuy suyoj contranpi Jeremiaspa willasqanman jina ñak'arichisaj, imaynachus kay p'anqapi qhelqasqa kashan, chayman jina.

¹⁴ Jatun suyukuna chantá atiyniyoj kuraj kamachejkunapis Babilonia llajtayojkunata chakinku uraman churanqanku. Ajinata ruwasqankuman jina paykunawan pagachikusaj, nispa.

Suyukuna jasut'isqa kanqanku

¹⁵ Israelpa Diosnin Tata Dios niwarqa: Qhawariy: Kay vasoqa vinowan jina phiñakuyniywan junt'a kashan. Chayta makiymanta jap'ispa, ujyachimuy maymanchus kachasqayki, chay tukuy suyukunaman.

¹⁶ Chantá chay vasota ujyaykuytawan, chankaykachanqanku, t'ojpirayanqankutaj, paykunaman maqanakuyta apachimusqayrayku, nispa.

¹⁷ Chantá noqa chay vasota Tata Diospa makinmanta jap'iytawan, tukuy suyukunaman ujyacherqani, mayqenkunamanchus Tata Dios kachawarqa, chaykunaman.

¹⁸ Chay vasota Jerusalén llajtaman jaywarqani, jinallataj Judá suyupi llajtakunaman, kuraj kamachejkunaman, jinataj kurajninkukunamanpis jaywallarqanitaj. Chay jinamanta Tata Dios paykunata kantumanta tukucherqa, wiñaypajtaj raqaykunallataña saqerqa mancharikunapaj, asikunapaj jina, imaynachus kunan kashanku, ajina.

¹⁹ Egiptota kuraj kamachej faraonmanpis ujyachillarqanitaj, jinallataj kamachinkunaman, kurajninkunaman, tukuy runankunamanpis.

²⁰ Chantá Egiptopi tiyaj waj suyumanta runakunamanpis ujyacherqani. Jinallatataj Uz suyupi tukuy kuraj kamachejkunaman, chantá Filistea suyupi Ascalón llajtaman, Gazaman, Ecronman, Asdod llajtamanta puchojkunamanpis ujyachillarqanitaj.

²¹ Chaymantaqa Edom suyuman, Moabman, Amón suyuman ima ujyachillarqanitaj.

²² Chantá Tiromanta, Sidonmantapis tukuy kuraj kamachejkunaman, Jatun Mama Qochaj chimpanpi kaj tukuy kuraj kamachejkunaman ima ujyachillarqanitaj.

²³ Jinallataj Dedanman, Temaman, Buzmanpis, pikunachus chujchankuta ruthukunku, chay ayllumanpis ujyachillarqanitaj.

²⁴ Arabiamanta tukuy kuraj kamachejkunaman, ch'innejpi tiyakoj tukuy ayllukunaj kuraj kamachejninkukunamanpis ujyachillarqanitaj.

²⁵ Jinallataj Zimrimanta, Elammanta, Mediamantawan kaj kuraj kamachejkunaman ujyachillarqanitaj.

²⁶ Chantá wichaynejmanta kaj kuraj kamachejkunaman, qayllapi kajkunaman, chayrí karupi kajkunamanwan ujyacherqani. Tukuy kay pachapi kaj kuraj kamachejkuna ujyarqanku. Tukuyninkumanta qhepatataj Babiloniamanta kuraj kamachejpis ujyallarqataj.

²⁷ Chantá Tata Dios nillawarqataj: Noqa, Israelpa Diosnin, Tukuy Atiyniyoj Tata Dios paykunata kamachini machaykunankukama, lanzarparinankukama, pampaman urmaspataj manaña jatarikuyta atinankukama ujyanankuta, contrankupi maqanakuta kachaykamusqayrayku.

²⁸ Qanmanta chay vasota manachus ujyayta munanqanku chayqa, paykunaman niy: Imaynamantapis ujyanaykichejpuni tiyan, imaraykuchus Tukuy Atiyniyoj Tata Diosmin chayta nin.

²⁹ Noqapaj t'aqasqa llajtayta, maypichus yupaychawanku, chay llajtata jasut'iyta qallariniña. Qankunarí mana jasut'isqalla qhepakunaykichejta yuyankichejchu? Manapuni mana jasut'isqaqa qhepakunkichejchu, imaraykuchus tukuy kay pachapi tiyakojkunaman maqanakuta kachaykamusaj. Noqa Tukuy Atiyniyoj Tata Diosmin chayta nini.

³⁰ Qantaj Jeremías, sutiypi kay tukuyta sut'inchaspa, paykunata niy: Tata Diosqa patamanta sinch'ita qhaparimonqa, janaj pachapi kamachinan tiyana kashan, chaymantapacha. Ayllunpa contranta ima qhaparimonqa, imaynatachus uvata ch'irwajkuna qhaparimunku, ajinata.

³¹ Tata Diospa qhaparisqanqa tukuy kay pachaj k'uchunkama chayanqa, imaraykuchus Tata Diosqa suyukunaj contrankupi juiciota oqharenqa. Payqa tukuy runata juzgananpaj wajyanqa, millayta ruwajkunatataj wañuchisqa kanankupaj juchachanqa. Tata Diosmin chaytaqa nin.

³² Tukuy Atiyniyoj Tata Dios nillantaj: Qhawariy, ñak'areyqa suyumanta suyuman chayanqa. Uj manchay sinch'i llojlla para jina oqharikamonqa kay pachaj k'uchunmantapacha, nispa.

³³ Pikunatachus Tata Dios chay p'unchaypi wañuchenqa, chaykunaqa kay pachaj ujnin kantumanta ujnin kantukama mast'alla kanqanku. Mana pipis paykunamantaqa waqanqachu, nitaj pipis ayankuta p'ampaykamunankupaj oqharenqachu. Wanu jina pampapi wijch'usqa kanqanku.

³⁴ Qhapariychej, michejkuna, nanaywan qhapariychej. Aylluyta pusajkuna, nanaywan pampapi sunt'iraychej, imaraykuchus wañuchisqa kanaykichej p'unchay chayamunña, qankunataj wira oveja jina ñak'asqa kankichej.

³⁵ Michejkunapaj mana pakakunanku kanqachu, aylluyta pusajkunapis mana ayqeyta atenqankuchu.

³⁶ Michejkuna qhaparinku. Nanaywan ayqonku ovejaykunata pusajkuna, imaraykuchus Tata Diosmin pastonkuta ch'akirparichin.

³⁷ Tata Diosqa k'arajta phiñakuspa, pastoyoj tukuy pampata chinkarqaricherqa.

³⁸ Imaynatachus uj león jusk'unmanta llojsin, ajinata llojserqa. Llajtankoqa raqayllamanña tukuchisqa kanqa, imaraykuchus Tata Dios sinch'ita phiñakuspa, sinch'i maqanakuta paykunaman kachaykonqa, nispa.