Jeremías 19 - DIOSPA QHELQACHISQ

P'akisqa p'uñumanta rijch'anachina

¹ Tata Dios niwarqa: Rispa, p'uñuta rantimuy. Chantá kay llajtamanta wakin kurajkunata, jinataj wakin kuraj sacerdotekunata ima wajyay.

² Chaymantataj paykunawan khuska Ben Jinón valleman riychej, K'analla Punku nisqa qayllaman, chaypitaj imatachus willasqayki, chayta paykunaman willanki.

³ Niy: Judamanta kuraj kamachejkuna, Jerusalenpi tiyakojkunapis, Tata Diospa nisqanta uyariychej: Israelpa Diosnin Tukuy Atiyniyoj Tata Dios ajinata nin: May jatun ñak'ariyta kay cheqaman kachaykamusaj, pikunachus chayta uyarejkunataj mana ima niyta atishaj qhepakonqanku.

⁴ Chayta ruwasaj, imaraykuchus qankuna saqerpariwarqankichej, kay cheqatataj millachikunayman tukucherqankichej. Kaypi dioskunaman inciensota q'oshñicherqankichej, mayqenkunatachus mana tataykichejkuna, ni qankuna, nitaj Judamanta kuraj kamachejkuna rejserqankuchu, chaykunaman. Chantá kay cheqapi mana juchayoj runakunata wañuchillarqankichejtaj.

⁵ Chantataj altarkunata ruwarqankichej, wawaykichejkunata Baal diosman q'olachipunaykichejpaj. Chayta noqa mana kamacherqanichu, manapuni chay jina kananta yuyallarqanipischu.

⁶ Chayrayku uj p'unchay chayamonqa, chay p'unchaypitaj kay cheqa manaña Tofet sutiwan sutichasqachu kanqa, nitaj Ben Jinón valle sutiwan. Manachayqa Runa Wañuchina valle sutiwan rejsisqa kanqa.

⁷ Kay cheqapi noqaqa Judá, jinataj Jerusalén imatachus ruwanankupaj wakichikorqanku, chayta chinkachisaj. Noqapuni awqankuwan paykunata atipachisaj, paykunatataj espadawan wañurachenqanku. Chantá Judamanta runakunaj ayankuta suwintukunaman, k'ita animalkunaman ima mikhunankupaj qarasaj.

⁸ Kay llajtata ch'in raqayman tukuchisaj, tukuy t'ukunankupaj jina. Chantá tukuy chayninta purejkuna t'ukushaj qhepakonqanku, chay jina phirisqa kasqanta rikuspa.

⁹ Jinataj Judapi tiyakojkunaman churinkoj, ususinkoj aychankuta mikhuchisaj. Runakunaqa purajmanta mikhunakonqanku, awqanku llajtankuta jap'inanpaj muyuykusqankurayku, mana imatapis ruwayta atispa, nispa.

¹⁰ Chantá Tata Dios nillawarqataj: Chayta niytawankama, chay runakunaj ñawpaqenkupi p'uñuta p'akispa, niy:

¹¹ Tukuy Atiyniyoj Tata Dios ajinata nin: Noqapis kay suyuta, kay llajtatapis p'akisaj, imaynatachus kay p'uñuta p'akikojta rikunkichej, ajinata, manañataj ujtawan ñawpaj karqankichej jina kankichejñachu. Runakunaqa wañusqankuta Tofetpi p'ampanqanku, imaraykuchus wajnejpi manaña ayata p'ampanankupaj campo kanqachu.

¹² Ajinatamin kay llajtata, chaypi tiyakojkunatapis ruwasaj. Kay llajtata ruwasaj Tofet jina kananpaj. Ajinata noqa Tata Dios nini.

¹³ Jerusalenpi wasikunata, chantá Judapi kuraj kamachejkunaj wasinkuta ima Tofet jina ch'ichipaj qhawasqa kanqanku. Ajinata ruwasaj, imaraykuchus chay wasi patapi tukuy ch'askakunaman inciensota q'oshñicherqanku, jinallataj waj dioskunaj sutinpi vinota jich'aspa jaywarqanku, nispa.

¹⁴ Chayta niyta tukuytawan, Jeremías Tofetmanta kutimorqa, maymanchus Tata Dios payta kachasqa sutinpi parlamunanpaj, chaymanta. Chantá Tata Diospa Templonpa pationpi sayaspa, tukuy runaman nerqa:

¹⁵ Israelpa Diosnin Tukuy Atiyniyoj Tata Dios nin: Kay llajtaman, jinataj muyuyninpi kaj llajtakunamanwan, ima jasut'ichus jamunanta nerqani, chayta kachaykamusajpuni, imaraykuchus sonqoykichejta rumiyacherqankichej, nisqayta ama uyarinawaykichejpaj, nispa.