Jeremías 17 - DIOSPA QHELQACHISQ

Tata Dios Judá suyuta juchankurayku jasut'enqa

¹ Tata Dios nin: Judá, juchaykeqa fierro cincelwan, chantá puntachasqa diamantewan ima qhelqasqa kashan. Sonqoykipi, chay altarniykikunaj wajrankunapiwan qhelqasqa kashan.

² Wawaykikunaqa altarninkumanta yuyarikunku, Asera lantita yupaychana k'ullumanta ima. Chaykunaqa thansarara sach'akunaj qayllanpi kashanku, chay orqokunaj patanpi ima.

³ Jinallataj campopi, orqokunapi ima kashanku. Juchallisqaykirayku qhapaj tiyapuyniykita, valorniyoj kapuyniykita ima apakapunankupaj wajkunaman jaywaykusaj. Loma patapi yupaychana cheqakunatapis suwanankupaj jaywaykullasajtaj.

⁴ Imatachus chayaqeykipaj qorqayki, juchallisqaykirayku paykuna chay suyuta qhechusonqanku. Chantá awqaykej kamachinpi kanki mana rejsisqa suyupi, imaraykuchus phiñakuyniyta ninata jina k'ajaricherqanki, chaytaj wiñaypaj lawranqa, nispa.

⁵ Chantá Tata Dios nillarqataj: Maldicisqa kachun pichus runallapi atinikojqa, pichus runa yanapananta mask'aj, sonqonpitaj Tata Diosmanta karunchakoj.

⁶ Chay runaqa t'ajra pampapi wiñakoj retama jina kanqa. Allin kawsayta ni rejsillanqapischu. Manachayqa rumi loqho ukhupi kawsanqa, ni pejpa tiyakunan k'ara pampapi.

⁷ Saminchasqa kachun noqapi atinikoj runa, pichus noqa Tata Diospi suyakoj.

⁸ Payqa mayu patapi sach'a jina kanqa, mayu yakunejman saphichakoj. Q'oñi tiempo chayamojtin, mana manchachikonqachu, laqhenkunataj q'omerllapuni kanqa. Ch'aki wata kajtinpis, mana qawenqachu, manachayqa poqollanqapuni.

⁹ Runaj sonqonqa tukuy imamanta nisqaqa aswan ch'awka chantá millaytaj, nitaj chaypaj jampi kanchu. Pitaj chay sonqota rejsinmanri?

¹⁰ Noqa Tata Diosmin runaj sonqonta watuni, yuyaynintataj allinta qhawani. Chantá sapa ujman imaynatachus purisqanman jina, ruwasqanman jinataj pagapuni, nispa.

¹¹ Pichus millayta ruwaspa qhapajyajqa rijch'akun mana paypa runtullanta ojllaj yuthuman. Chay runa kallpallanpiraj kashajtin, qhapaj kapuynin chinkarenqa, qhepamantaj wajchaman tukonqa.

¹² Noqanchejpa yupaychananchej Temploqa Tata Diospa kamachinan tiyana. Chayqa may k'achitumin, qallariymantapacha orqo patapi ruwasqa.

¹³ Tata Dios, qanmin Israelpa suyakuynenqa kanki. Pichus qanta wasanchasojqa p'enqachisqa kanqa. Qanmanta tukuy karunchakojkuna chinkarenqanku, jallp'api runaj sutin qhelqasqa jina, imaraykuchus Tata Diosta saqerparerqanku, pichus paykunapaj kawsaj yaku juturi jina karqa, chayta.

Jeremiasqa Tata Diosmanta ujtawan mañakun

¹⁴ Tata Dios, qan jampiway, qhaliyachisqataj kasaj. Qan qhespichiway, kacharichisqataj kasaj, imaraykuchus Tata Dios, qanllata yupaychayki.

¹⁵ Runakunaqa nillawankupuni: Maytaj Tata Diospa nisqan junt'akusqanri? Kunanpacha junt'akuchun ari, nispa.

¹⁶ Chaywanpis, noqaqa mana tanqarqaykichu, nitaj mañarqanichu ñak'ariykunawan jasut'inaykita. Tukuy ima nisqayta qan yachanki, imaraykuchus qan uyarishajtiyki parlarqani.

¹⁷ Ama ari mancharichiwaychu, imaraykuchus qanmin ñak'ariy p'unchaypi pakaykukunay kanki.

¹⁸ Qhatiykachawajkunaqa p'enqaypi rikhurichunku, amataj noqaqa. Paykunalla mancharikuchunku, amataj noqaqa. Paykunaj patankuman ñak'ariykunata apachimuy, tukuyninkutataj kutin kutinta phirirpariy.

Samarina p'unchayta waqaychana

¹⁹ Tata Dios nillawarqataj: Llajtaj Punkun nisqaman rispa, sayamuy, Judamanta kuraj kamachejkuna maynintachus yaykunku, llojsinkutaj, chayman. Chantá kikillantataj ruwamuy Jerusalenpa tukuy punkunkunapipis.

²⁰ Chantá runakunaman niy: Judamanta kuraj kamachejkuna, tukuy runakuna, jinallataj Jerusalenpi tiyakojkuna, pikunachus kay punkunejta yaykojkuna, Tata Diospa nisqanta uyariychej.

²¹ Tata Dios nin: Allinta qhawakuychej: Ama samarina p'unchaypi q'epita q'epiychejchu, nitaj Jerusalenpa punkunnejta apaykuychejchu.

²² Amallataj samarina p'unchaypi wasiykichejmanta q'epillatapis orqhoychejchu, nillataj ima ruwanallatapis chay p'unchaypi ruwaychejchu. Manachayqa samarina p'unchaytaqa noqapaj t'aqapuwaychej, imaynatachus ñawpa tataykichejman kamacherqani, ajinata.

²³ Paykunatajrí mana uyariwarqankuchu, manachayqa k'ullukuspa, mana kasuwayta munarqankuchu, nitaj jasut'isqankuwan wanarqankuchu, nispa.

²⁴ Tata Dios nillantaj: Cheqatapuni kasuwaychej, amapunitaj samarina p'unchaypi kay llajtaj punkunkunanejta ima q'epitapis apaychejchu. Chay p'unchayta noqapaj t'aqapuwaychej, amataj ima ruwanaykichejtapis ruwaychejchu.

²⁵ Sichus kasuwankichej chayqa, Davidpa kamachinan tiyanapi kuraj kamachejkuna kallanqankupuni. Paykuna chantá kurajkuna ima carretapi, chayrí caballopi kay llajtaman punkunta yaykonqanku, Judamanta runakunawan, chantá Jerusalenmanta runakunawan khuska. Jerusalenpi tiyakojkunapis wiñaypaj kallanqapuni.

²⁶ Chantá Judá suyumanta, Jerusalén qayllapi llajtakunamanta, Benjamín jatun aylloj llajtankunamanta, mama qocha kantumanta, orqokunamanta, chantá Néguev cheqamanta ima runakuna Tata Diospa Templonman jamonqanku. Chaymantaj uywa ñak'asqa q'olachinakunata, uywa ñak'asqa jaywanata, poqoykunamanta jaywanata, inciensota, pachis nispa jaywanatapis apamonqanku.

²⁷ Sichus mana kasukuspa samarina p'unchayta mana noqapaj t'aqapuwankichejchu, manachayqa samarina p'unchaypi q'epiykichejta Jerusalenman apaykullankichejpuni chayqa, noqa llajtaj punkunkunaman ninata jap'iykuchisaj. Chay ninataj Jerusalenpa kamachina wasinta tukuchinankama ruphaykonqa, manataj pipis thasnuyta atenqachu, nispa.