Jeremías 15 - DIOSPA QHELQACHISQ

Tata Dios Judá suyuta mana khuyarikuspa jasut'enqa

¹ Tata Dios niwarqa: Sichus Moiseswan, Samuelwanpis kay aylluyrayku mañakuwankuman chaypis, manapuni kay runakunamanta khuyakuymanchu. Kay runakunata ñawpaqeymanta qharqoy. Maymanpis ripuchunku.

² Sichus tapusunkuman: Maymantaj risqaykuri? nispa chayqa, paykunaman niy: Ajinata Tata Dios nin: Millay onqoywan wañunanku kajkunaqa chay onqoywan wañuchunku. Maqanakupi wañunanku kajkunataj maqanakupi wañuchisqa kachunku. Chantá yarqhaywan wañunanku kajkuna yarqhaywan wañuchunku. Jinallataj llajtankumanta waj suyuman apasqa kananku kashan, chaykunaqa apasqapuni kachunku, nispa.

³ Tata Dios nillantaj: Noqa tawa jasut'iykunata apachimusqaykichej: Maqanakupi wañuchisqa kankichej, alqokuna ayaykichejta qhatataykachanqanku, suwintukunataj ayaykichejta mikhonqanku, k'ita animalkunapis ayaykichejta oqoykonqanku ima.

⁴ Judá suyuta ñawpa kuraj kamachej Ezequiaspa churin Manasés imatachus Jerusalenpi millayta ruwasqanmanta, chayta ruwasaj. Chayta rikuspataj, tukuy suyumanta kajkuna mayta mancharenqanku.

⁵ Jerusalén, pitaj qanmanta khuyakusonqari? Pitaj qanmanta sonqonta nanachikusonqari? Pitaj qhalita kawsanaykimanta qhawarisonqari?

⁶ Qan saqerpariwarqanki, wasanchawarqankitaj. Noqa Tata Dios chayta nini. Chayrayku noqa makiyta oqharisaj jasut'isunaypaj, tukuchisunaypajtaj, imaraykuchus sapa kuti qanta khuyakuspa sayk'uniña.

⁷ Noqa llajtakunaj punkunpi qanta jorkawan jina wayrachispa wijch'usqayki. Mana wawayojta, phirisqatataj saqesqayki, imaraykuchus millay ruwasqaykita mana saqeyta munarqankichu.

⁸ Warmisapakuna mama qochaj kantunpi t'iyu jina may chhika kanqanku. Kikin chawpi p'unchaypi mamankuman, wawankumanwan wañuchejta kachamusaj. Kaymanta jinalla paykunaj patankuman ñak'ariyta, mancharikuytawan urmachimusaj.

⁹ Ashkha wawayoj mamakunaqa mana kallpayoj llawch'iman tukonqanku, samakuytapis mana atenqankuchu. Manaraj wañunankupi wañonqanku. P'enqachisqa, k'umuykachachisqataj kanqanku. Pipis chaymanta kawsashaj qhepakojtaj awqanwan wañuchisqallataj kanqa. Ajinata noqa Tata Dios nini.

Jeremías llakikuspa qhaparin

¹⁰ Chantá noqa Jeremías nerqani: Ay, noqamanta, mamáy, imapajtaj paqarichikuwarqankiri? Kay pachapi kaj chhika runakuna contrayta sayaykuspa, noqawan churanakunankupajchu? Mana pimanpis qolqeta manunichu, nitaj pipis noqaman manuwanchu. Chaywanpis tukuy maldiciwanku, nispa.

¹¹ Chantá Tata Dios nerqa: Noqa waqaychasqayki, Jeremías. Chantá awqaykikuna mañakusonqanku paykunapaj mañapunaykita, paykuna llakiypi, ñak'ariypi ima kashajtinku.

Tata Dios Israelta jasut'inanta nin

¹² Tata Dios nillarqataj: Pitaj wichaynejmanta apamusqa fierrota, chayrí broncetapis p'akiyta atinmanri?

¹³ Israel, tukuy juchaykiraykumin awqaykej makinman jaywaykusaj tukuy qolqeykita, valorniyoj kapuyniykita, tukuy imachus jallp'aykipi kajtawan ima. Tukuyninta paykuna apakapunankupaj jaywaykusaj.

¹⁴ Chantá mana rejsisqayki suyupi awqaykej wata runan kanaykita ruwasaj, imaraykuchus phiñakuyneyqa ninamanta aswan sinch'ita k'ajarin, chaytaj contraykipi lawrarenqa, nispa.

Jeremías Tata Diosman ujtawan qhaparikun

¹⁵ Chantá noqa nerqani: Tata Dios, qan tukuy imata yachanki. Noqamanta yuyarikuy ari, waturikuwaytaj yanaparinawaykipaj. Tukuy qhatiykachawajkunamanta vengakuy ari. Ama paykunata ch'inllamanta qhawakuychu, pajtataj wañuchiwankuman. Qan yachanki imaynatachus qanrayku k'umuykachachisqa kasqayta.

¹⁶ Parlamushawajtiyki, niwasqaykita sumajta uyarerqani. Chaytaj sonqoyta qhallallaricherqa, kusiytaj sonqoy ukhupi karqa, imaraykuchus Tukuy Atiyniyoj Tata Diosníy, qanpatamin kani.

¹⁷ Pikunachus raymillapi purinku, chaykunawanqa mana khuskachakorqanichu, nitaj kusikorqanichu. Qan noqata ajllakuwasqaykimantapacha sapallayña karqani, imaraykuchus noqapis qan jina juchata chejnikullanitaj.

¹⁸ Jina chayqa, imaraykutaj kay nanayniy mana jayk'aj thañinchuri? Imaraykutaj kay k'iriy mana thañipunchuri, nitaj jampisqa kayta atinchuri? Qanqa ch'aki mayu jina noqapaj kanki, nispa.

Tata Dios Jeremiasman kutichin

¹⁹ Chantá Tata Dios kutichiwarqa: Noqamanchus kutirikamuwanki chayqa, noqa qanta kamachiypi kanaykipaj jap'ikapusqayki. Sichus qhasi manakaj imakunata manaña thawtinkichu, manachayqa allin imakunallataña ninki chayqa, sutiypi parlamojta kachasqayki. Paykuna qanman kutirikamuchunku, qantajrí amapuni paykunaman kutirikunkichu.

²⁰ Noqa broncemanta perqata jina kay runakunaj ñawpaqenkupi sayachisqayki. Paykuna maqanakusonqanku chaypis, mana atipasonqankuchu, imaraykuchus noqamin qanwan kashani waqaychasunaypaj, kacharichisunaypajtaj. Noqa Tata Dios tiluspa chayta niyki.

²¹ Noqamin preciota pagaspa millay runakunaj makinkumanta kacharichisqayki, mana khuyakojkunaj atiyninkumantataj qhespichisqayki, nispa.