Jeremías 13 - DIOSPA QHELQACHISQ

Linomanta awasqa chumpi

¹ Tata Dios niwarqa: Rispa, linomanta awasqa chumpita rantikamuy, chantá ñañu wasaykiman chumpiykukuy. Chaywanpis ama t'ajsankichu, nispa.

² Chantá Tata Diosta kasuspa, noqa uj chumpita rantikorqani, chaywantaj chumpiykukorqani.

³ Chantá Tata Dios watej parlallawarqataj:

⁴ Rantispa churakushanki, chay chumpita oqharispa, Éufrates mayuman riy, chaypitaj chhanka jusk'uman chumpita pakaykamuy, nispa.

⁵ Chantá Éufrates mayuman rerqani, chaypitaj chay chumpita pakaykamorqani, Tata Dios kamachiwasqanman jina.

⁶ Chaymanta unayninman Tata Dios nillawarqataj: Ujtawan Éufrates mayuman rispa, pakamuy nerqayki, chay chumpita apamuy, nispa.

⁷ Chantá Éufrates mayuman rispa, mask'arqani maypichus chumpita pakaykorqani, chaynejta. Chay chumpitaj allin ismusqaña kasqa, manañataj ni imapaj walejchu.

⁸ Chantá Tata Dios ujtawan nillawarqataj:

⁹ Tata Dios ajinata nin: Ajinallatataj Judajta, Jerusalenpatawan runaykachayninkuta ismuchisaj.

¹⁰ Millayta ruwaj runakunaqa kamachisqayta mana uyariyta munankuchu, manachayqa k'ullukuspa, sonqonkoj yuyasqanta ruwanku. Paykunaqa waj dioskunaj qhepankuta purinku paykunaj munayninkuta ruwanankupaj, chantá yupaychanankupaj ima. Ajinata ruwasqankurayku kay ismusqa chumpi jina mana imapaj walejchu kanku.

¹¹ Imaynatachus pipis chumpinta ñañu wasanman mat'iykukun, ajinallatataj Israel aylluywan, Judá aylluywanpis ruwarqani, noqaman sumaj ujchasqa kanankupaj. Ajinata ruwarqani aylluy kanankupaj, sutiyta jatunchaj kanankupaj, yupaychasqa, jatunchasqataj kanaypaj. Chaywanpis, mana kasuwarqankuchu. Ajinata Tata Dios nin.

P'akisqa p'uñu

¹² Tata Dios nillawarqataj: Jeremías, paykunaman nillaytaj: Israelpa Tata Diosnin kayta nin: Sapa p'uñu vinowan junt'achisqa kanan tiyan, nispa. Israelitakunataj kutichisonqanku: Manachu yachaykuña sapa p'uñupis vinowan junt'achina kasqantari? nispa.

¹³ Qantaj kutichinki: Tata Dios nillantaj: Kay suyupi tukuy tiyakojkunata machaykuchisaj: Davidpa kamachinan tiyanapi tiyashanku, chay kuraj kamachejkunata, sacerdotekunata, noqamanta sut'inchajkunata, jinallataj Jerusalenpi tukuy tiyakojkunatapis.

¹⁴ Chantá paykunata ch'allpaspa, p'uñuta jina phirirasaj, tatakunata wawankutawan khuskata. Paykunamanta mana khuyakuspa, ni uj puchuyojta tukuchisaj. Ajinata Tata Dios nini.

Judá suyupi tiyakojkuna wijch'usqa kanqanku

¹⁵ Chantá Jeremías israelitakunata nerqa: Tata Dios parlanña. Ama wapuykachaychejchu, manachayqa allinta uyarispa, kasuta ruwaychej.

¹⁶ Tata Diosniykichejta jatunchaychej, manaraj laqhayayta apachimushajtin, laqhayaykojtintaj montepi misk'awajchej. Qankunaqa k'anchayta suyashankichej, paytajrí chay k'anchayta tuti laqhaman tukuchenqa.

¹⁷ Sichus mana kasunkichejchu chayqa, mayta runaykachasqaykichejrayku pakayllapi mayta waqasaj. Mayta waqasqayraykutaj, ñawiy tukukonqa, imaraykuchus qankuna Tata Diospa ayllun waj suyuman apasqa kankichej.

Diosqa kuraj kamachejman willachin

¹⁸ Kuraj kamachejman, jinataj qoyamanpis kay jinata niy: Kamachinaykichej tiyanakunamanta urayk'uspa, pampapi tiyakuychej, imaraykuchus umaykichejta k'achancharqa, chay pilluykichejqa urmanña, nispa.

¹⁹ Neguevpi llajtakunaqa soldadokunawan muyuykusqaña kashanku, nitaj pipis punkunkuta yaykuyta atinchu. Chantá Judá suyupi tukuy tiyakojkuna waj suyukunaman apasqa kanku.

²⁰ Qankuna wichaynejman qhawariychej, awqaykichej jamushanña. Maypitaj kashan, jap'ichikorqaykichej, chay oveja tropari? Maytaj jatunchakunaykichej ovejakunari?

Judapi tiyakojkuna waj suyuman apasqa kanqanku

²¹ Kuraj kamachej, qoya, ima ninkichejtaj, maypachachus yachachisqaykichej runakunallataj qankunata kamachisonqachej chaypachari? Chay kajtin, qankuna onqokoj warmi jina nanaywan jap'ichikunkichej.

²² Sitajchus tapukunkichej: Imaraykutaj kay llakiy qhatiriwan? nispa chayqa, allinta yachaychej jatunta juchallikusqaykichejrayku chay chayamusqanta. Chayraykumin chay awqakuna p'achaykichejta q'ollurispa, qankunamanta alqochakusonqanku.

²³ Yana runaqa yurajman tukuyta atinmanchu? Atillanmantajchu onzaqa ch'ejchinta chinkachiyta? Ajinallatataj qankunapis millayta ruwanaman yachasqa kashaspa, manapuni allin kajta ruwayta atiwajchejchu.

²⁴ Chayraykumin qankunata ch'eqerachisqaykichej, imaynatachus ch'innejmanta wayra pajata apakapun, ajinata.

²⁵ Chaymin qankunata qhatirinan kashan. Chayta jap'inaykichejta noqapuni nerqani, imaraykuchus noqamanta qonqaporqankichej, qhasi manakaj dioskunapitaj atinikorqankichej. Noqa Tata Diosmin chayta nini.

²⁶ Noqapis qanta q'alallata sayachisqayki, p'enqayniykita tukuy rikunankupaj.

²⁷ Khuchichakuypi purisqaykita rikuni, q'oñiriyniyki jap'isojtin, mana p'enqakuspa, phisu warmi jina purisqaykita. Orqokunapi, jinallataj pampapipis wasanchasqaykita rikullanitaj. Ay, Jerusalén, qanmanta imachus kanqa. Mayk'ajkamataj chay jina ch'ichipaj qhawasqa kallankipuniri? nispa.