Jeremías 12 - DIOSPA QHELQACHISQ

Jeremías Diosman quejakun

¹ Tata Dios, qanwan churanakuyta mana atiymanchu, imajtinchus qanqa cheqanta ruwaj kanki. Chaywanpis kayta tapurisuyta munayman: Imaraykutaj millay ruwajkunata tukuy imapi allin rinri? Imaraykutaj wasanchajkunapis mana imamanta llakikuspa kawsakunkuri?

² Qanqa paykunata mallkerqanki, paykunataj jap'ikuspa wiñanku, chantá poqonkutaj. Siminkuwan qanta yupaychasunku, sonqonkupirí qanmanta karupi kashanku.

³ Qantajrí, Tata Dios, allinta rejsiwanki. Imaynachus sonqoy qanpaj kasqantapis yachanki. Imaynatachus runa ovejata camalman qhatin, ajinallatataj chay runakunata apakapuy. Wañuchina p'unchaypajtaj señalaykuy.

⁴ Mayk'ajkamataj jallp'a ch'akillapuni kanqari? Mayk'ajkamataj campopi qhorapis qawisqa kanqari? Uywakuna, p'isqokunapis wañurapushanku, kay suyupi tiyakojkunaj millay ruwasqanrayku. Paykunaqa imatachus ruwasqankuta qan mana rikusqaykita ninku, nispa.

Diosqa Jeremiasman kutichin

⁵ Chantá Diosqa Jeremiasta nerqa: Sichus chakipi rej soldadokunaj qhepanta t'ijurispa sayk'unki chayqa, caballokunapi rejkunawan imaynatataj atipanakuwajri? Sichus ni imamanta manchachikuna pampapi manchachikorqanki chayqa, imanakuwajtaj Jordán mayu kantupi ch'umi ukhupi rikhurispari?

⁶ Kikin wawqeykillamantataj wasanchasunku, qhepaykimantataj phiñasqa rimakusunku. Ama paykunapi atinikuychu, misk'ita parlashasojtinkupis, nispa.

Tata Dios Israelmanta llakikun

⁷ Tata Dios nillarqataj: Aylluyta saqerparini, chayaqey kashajtinpis qhesachani. Chay munasqa suyuyta awqankukunaj makinkuman jaywaykuni.

⁸ Aylluy, pichus noqajta karqa chay, montepi león jina noqaj contraypi qhaparirinku, chayraykutaj paykunata chejnikuni.

⁹ Aylloyqa k'achitu phuruyoj anka jina. Chaywanpis waj ankakuna payta maqaj wakiykunku. Jamuychej tukuy k'ita animalkuna, tantaykukuspa, payta t'isarpariychej.

¹⁰ Ashkha kamachejkuna uva huertayta t'ustiykunku, jallp'aytataj saruranku. Munasqa jallp'ayta ch'inman tukuchinku.

¹¹ Ch'inllata, q'ara pampatataj saqerparinku. Chantá noqa chay suyuta llakiymanta waqashajta rikuni. Tukuynin suyu phirisqa kashan, chaymantaqa mana pipis llakikunchu.

¹² Tukuy ch'in orqokunapi tukuy imata phirej wapu soldadokuna jamorqanku, imaraykuchus noqa Tata Diospa espaday tukuy runata wañurachin, kay suyoj ujnin k'uchunmanta ujnin k'uchunkama. Jinataj allin kawsay mana pipajpis kanchu.

¹³ Trigota tarpuspapis, khishkallata oqharerqanku. Tukuy llank'asqankoqa qhasillapaj karqa. Noqaj sinch'i phiñakusqayrayku chajrapis mana poqorqachu, nispa.

Tata Diospa nisqan Israel suyoj muyuyninpi kajkunapaj

¹⁴ Tata Dios ajinata nillantaj: Israel suyoj muyuyninpi tiyakoj millay runakunamanta, pikunachus Israelman qosqay jallp'ata jap'ikapunku, chaykunamanta nini: Noqaqa paykunata suyunkumanta t'irasaj, Judatataj paykunaj chawpinkumanta orqhomusaj.

¹⁵ Jinaytawankamataj, paykunamanta watej khuyakullasajtaj. Chantá sapa ujninkuta suyunkuman, chayaqenkuman ima kutichimusaj.

¹⁶ Paykunaqa aylluyman Baalpa sutinrayku tiluyta yachacherqanku. Kunanrí aylluy ukhupi tiyakunankupaj yachachisqayta jap'ikunanku tiyan, sutiyraykutaj tiluyta yachananku tiyan: Tata Diospa sutinrayku tiluni, nispa.

¹⁷ Chaywanpis sichus mayqen suyu mana uyarikoj kanman chayqa, chay suyuta saphinmanta t'iraytawan, chinkachisaj, nispa. Ajinata noqa Tata Dios nini.