Jeremías 10 - DIOSPA QHELQACHISQ

Tata Dios lanti yupaychanata mana munanchu

¹ Israel ayllu, imatachus Tata Dios qanman nisusqanta uyariy.

² Tata Dios ajinata nin: Ama waj suyukunaj ruwasqallankutataj ruwaychejchu, nillataj janajpi t'ukuna señal kajtin, mancharikuychejchu chay waj suyukuna jinaqa.

³ Chay runakunaj diosninkoqa qhasi manakajlla kanku. Montemanta uj sach'ata k'utuytawan, llajllayta yachaj runa t'illminawan lantita ruwan.

⁴ Chaymantataj qolqe metalwan, qoriwan ima chay llajllasqan k'ulluta k'achanchaykun. Chantá mana urmananpaj, lantita clavowan sumajta sayachin martillowan takaspa.

⁵ Chay lantikuna p'isqo manchachinaman rijch'akunku, imaynatachus pepino chajrapi manchachita churanku, ajina. Jinallataj chay lantikuna mana purinkuchu, q'epiykachanaraj kanku. Ama paykunamanta manchachikuychejchu. Chay lantikunaqa ni pita yanapankuchu, nitaj mana allin kajtapis ruwayta atinkuchu, nispa.

⁶ Chantá Jeremías nerqa: Tata Dios, mana pipis qan jinaqa kanchu. Qanqa may jatun kanki, sutiykitaj may atiyniyoj.

⁷ Qanqa tukuy suyukunaj kuraj kamachejnin kanki. Pitaj qanta mana manchachikusunkimanchuri? Qanqa jatun respetowan qhawasqa kanaykipaj jina kanki. Tukuy yachayniyojkunamanta, kamachejkunamantapis manapuni ujpis qan jina kanchu.

⁸ Lantikunata yupaychajkunarí wampu kanku, manataj uj chhikan yuyayninkupis kanchu. K'ullumanta ruwasqa lanteqa mana imatapis yachachiyta atinchu.

⁹ Lantikunata lluch'inankupaj Tarsismanta qolqe metalta apamunku, Ufazmantataj sumaj qorita. Chantá lanti ruwasqankuta puka telawan, puka kulli telawan ima p'achallichinku. Chay tukoyqa yachajkunaj ruwasqallanku kanku.

¹⁰ Tata Diostajrí cheqa kaj Diospuni, kawsaj Dios, wiñaypaj Kuraj Kamachejtaj. Maypachachus pay phiñakun, chaypacha, kay pacha kharkatitin. Phiñakojtenqa, suyukunapis mana sayayta atinkuchu.

¹¹ Israelitakuna, lantikunata yupaychajkunaman niychej: Janajta, kay pachatapis chay lantikuna mana ruwarqankuchu. Chayrayku kay pachamanta chinkachisqa kanqanku, nitaj ujllapis kay pachapi qhepakonqachu, nispa.

Tata Diosta yupaychanapaj takiy

¹² Tata Dios atiyninwan kay pachata ruwarqa, yachayninwantaj kay pachata sumajta sayacherqa, yachayniyoj kasqanwantaj janajta jatunman aysarqa.

¹³ Jatunmanta sinch'ita qhaparejtin, janajpi yakupis tantakunku. Phuyukunata kay pachaj k'uchumanta jatarichimun. Parachispa, lliuj lliujkunata k'ancharichimun. Wayratapis maypichus waqaycharqa, chaymanta orqhomun.

¹⁴ Tukuy runarí mana yuyayniyoj, wamputaj kanku. Lantikunata ruwajkunaqa p'enqakuymanta uyankuta mana mayman churayta atenqankuchu. Lantikuna qhasi manakaj q'otiriyolla kasqankurayku, mana kawsayniyojchu kanku.

¹⁵ Chaykunaqa qhasi manakaj asikunapaj jina kanku. Juicio p'unchaypitaj chinkachisqa kanqanku.

¹⁶ Jacobpa Diosninrí mana chaykuna jinachu, imaraykuchus pay tukuy ima kaj chhikata ruwarqa. Paymin Israel aylluta ajllakorqa chayaqen kananpaj. Paypa sutenqa Tukuy Atiyniyoj Tata Diosmin.

Judá suyuman jamoj ñak'ariymanta takiy

¹⁷ Soldadokunawan muyuykusqa tiyakojkuna, tukuy kapuyniykichejta oqhariychej.

¹⁸ Tata Dios ajinata nin: Kunan kutipi kay suyupi tiyakojkunata warak'awan jina karuman wijch'usaj. Paykunata ñak'arichisaj tullunkukama nanay chayananpaj, nispa.

¹⁹ Jerusalenpi tiyakojkuna ninku: Ay, noqaykumanta, mana imayoj llakiyllapiña rikhuriyku. K'iriykupis mana jampiy atina. Sonqoykupitaj nerqayku: Chay nanayqa muchuna jinallachá, nispa.

²⁰ Toldoykupis tukuynin llik'irasqa, watanankunapis p'itirasqa kashanku. Wawaykukunapis saqerpariwayku, manañataj kankuchu. Manaña pipis watej toldoykuta oqharej kanchu, nillataj cortinaykuta aysaykurejpis kanchu.

²¹ Aylluta michejkuna wampuman tukorqanku. Tata Diosta mana mask'ankuchu. Chayraykumin paykunata mana allinchu rin. Tukuy ovejankunapis ch'eqerapunku.

²² Uyariychej, uj llakiy willay chayamun. Wichaynejmanta may chhika soldadokuna jamushanku, chaykunataj Judá suyupi llajtakunata raqayman tukuchenqanku. Chaypi k'ita alqokunallaña kawsanqanku, nispa.

²³ Chantá Jeremías ajinata Tata Diosmanta mañakorqa: Tata Diosníy, runaqa kawsayninmanta mana dueñochu kasqanta yachani. Runaqa kawsaynin imachus kananmanta mana yachanchu.

²⁴ Tata Diosníy, justiciaykiman jina cheqan ñanniykiman churawayku, manataj k'araj phiñakuyniykiman jinachu, ama tukusqata tukuchinawaykupaj.

²⁵ Phiñakuyniykita kachaykuy, pikunachus mana rejsisunkuchu, chay suyukunaj patankuman, pikunachus sutiykita mana yupaychankuchu, chaykunaj patankuman. Ajinata ruway, imaraykuchus paykuna Jacobpa mirayninta tukucherqanku, suyunkutataj raqayllataña saqerparerqanku, nispa.