Jeremías 1 - DIOSPA QHELQACHISQ

Tata Dios Jeremiasta wajyan

¹ Kayqa Hilciaspa churin Jeremiaspa parlasqan. Payqa Benjamín jatun aylloj jap'iyninpi kaj Anatot llajtamanta karqa, sacerdote ayllumantataj.

² Tata Dios Jeremiasman parlarqa, Amonpa churin Josías chunka kinsayoj watataña Judata kamachishajtin.

³ Jinallataj Tata Diosqa Jeremiasman parlallarqapuni sut'inchananpaj, Josiaspa churin Joacín Judapi chunka ujniyoj watata kamachinankama. Chay wataj phishqa killanpitaj Jerusalenpi tiyakojkuna Babilonia suyuman apasqa karqanku.

Tata Dios Jeremiasta kachan

⁴ Tata Dios kay jinata niwarqa:

⁵ Mamaykej wijsanpi manaraj kashajtiyki, ñapis qanta ajllakorqaykiña. Manaraj paqarikushajtiyki, ñapis t'aqarqaykiña, suyukunaj sut'inchajnin kanaykipajtaj churarqayki, nispa.

⁶ Noqatajrí kuticherqani: Ay, Tukuyta Kamachej Tata Dios, noqaqa ancha waynallaraj kani. Runaj ñawpaqenpi parlaspapis, manaraj sumajta parlayta atinirajchu, nispa.

⁷ Chantá Tata Dios niwarqa: Ama niwaychu waynallaraj kasqaykita. Qanqa rinayki tiyan, maymanchus kachasqayki, chayman, imatachus kamachisusqaytataj willamunayki tiyan.

⁸ Ama paykunamanta manchachikuychu, imaraykuchus noqa qanwan kashani yanapasunaypaj. Noqa Tata Diosmin chayta nini, nispa.

⁹ Chaypacha Tata Dios makinwan simiyta llankhaykuwaspa, niwarqa:

¹⁰ Noqa simiykiman nisqaykunata churani. Kunanqa jatun suyukunapi, juch'uy suyukunapi ima atiyta qoyki sik'inaykipaj, thuñinaykipaj, phirinaykipaj, t'unanaykipaj, chantá watej jatarichinaykipaj, mallkinaykipaj ima, nispa.

¹¹ Chantá Tata Dios nillawarqataj: Jeremías, imatataj rikunkiri? nispa. Noqataj kuticherqani: Uj almendro sach'ata rikuni, nispa.

¹² Jinallataj Tata Dios niwarqa: Allinta rikunki. Chaytaj niyta munan noqaqa qhawashallasqaytapuni kay tukuy nisqay junt'akunanpaj, nispa.

¹³ Tata Dios ujtawan kay jinata nillawarqataj: Imatataj rikunkiri? nispa. Noqataj kuticherqani: Uj t'impushaj mankata rikuni, wichaynejmanta jina phurmumushajta, nispa.

¹⁴ Chantá Tata Dios niwarqa: Wichaynejmanta ñak'areyqa kay suyupi tukuy tiyakojkunaj patankuman jich'akamonqa.

¹⁵ Noqa Tata Diospuni kayta nini: Wichaynejmanta tukuy suyuta wajyamusaj. Kuraj kamachejninkuna jamuspataj, Jerusalenman yaykuna punkunpi kamachinanku tiyanata churanqanku. Jinallataj jatuchaj perqankuna chaypi, chantá Judáj tukuynin llajtanpipis toldonkuta sayachenqanku.

¹⁶ Chay jasut'i judiokunapaj kananta kamachisaj, noqata wasanchaspa saqerpariwasqankumanta. Paykunaqa inciensota q'oshñichispa, makinkuwan ruwakusqanku mana rejsisqa dioskunata yupaycharqanku.

¹⁷ Qantajrí mat'ita chumpiykukuspa, kallpachakuy. Rispataj, willamuy imatachus kamachiyki, chayta. Ama paykunata manchachikuychu, manachayrí noqa kikiy paykunaj ñawpaqenkupi qanta kharkatitichisqayki.

¹⁸ Kunan p'unchay noqa qanta churayki may sinch'i jark'achasqa llajtata jina. Fierromanta ruwasqa sayantata jina, broncemanta ruwasqa perqata jina churallaykitaj, tukuy Judá suyoj contranpi sayaykunaykipaj. Jinallataj kuraj kamachejninpata, kurajninkunajta, sacerdotenkunajta contrankupi sayaykullankitaj. Jinallataj tukuy runaj contranpi churanakunaykipaj churallaykitaj.

¹⁹ Paykunaqa qanwan maqanakonqanku, jinapis mana atipasonqankuchu, imaraykuchus noqa yanapasunaypaj qanwan kasaj, nispa. Noqa Tata Diosmin chayta nini.