Isaías 8 - DIOSPA QHELQACHISQ

Isaiaspa wawan señal kanqa

¹ Tata Dios niwarqa: Uj qhelqana tablata jap'ispa, chayman sut'ita qhelqay Maher Salal Jasbaz sutita.

² Jinataj sacerdote Uriasta, chantá Jeberequiaspa churin Zacariasta ima qhelqasqaykimanta testigo kanankupaj churay, nispa.

³ Chay qhepata noqa warmiywan puñuykorqani, paytaj wijsallisqa rikhurispa, uj wawata paqarichikorqa. Chaypachataj Tata Dios niwarqa: Wawaykitaqa Maher Salal Jasbazta sutichay.

⁴ Chay wawa manaraj tatáy, mamáy niyta yachashajtin, Asiriata kuraj kamachejqa Damascoj tukuy kapuyninta, Samariapi kaj chhikatawan apakaponqa, nispa.

⁵ Chaymanta Tata Dios ujtawan nillawarqataj:

⁶ Noqa Judá suyuta waqaychasqayqa, alliyllamanta purej Siloé yaku jina. Chaywanpis paykuna qhesachawaspa, kuraj kamachej Resinwan chantá kuraj kamachej Pecajwan kusirikunku.

⁷ Chayrayku Tukuyta Kamachej Dios paykunaj patankuta Éufrates mayu yakuwan llump'irichenqa. Chayqa Asiriata kuraj kamachej, paytaj tukuy atiyninwan paykunaj contranta jamonqa. Chay yakoqa tukuy mayuta atipaspa, tukuy mayu kantunta wasarenqa.

⁸ Chayqa Judá suyuman junt'aykonqa, kunkankamataj chayanqa. Emanuel, tukuynin suyuyki ankaj lijranwan jina qhataykusqa kanqa.

⁹ Tukuy suyu tantakuychej, imaraykuchus chinkachisqa kankichej. Qankunapis karupi kaj suyukuna, uyariychej: May jinatapis wakichikuychej. Chaywanpis qankuna chinkachisqallataj kankichej. May jina sumaj armatapis wakichikuychej, chinkachisqapuni kankichej.

¹⁰ Sumajtapis maqanakunapaj wakichikojtiykichej, qhasi manakajllapaj kanqa. Imata parlasqaykichejqa manapuni junt'akonqachu, imaraykuchus Diosqa noqaykuwan kashan, nispa.

Tata Diosllapi atinikuna

¹¹ Tata Dios lijrayman makinta churaspa, ama kay llajtayojkuna jina purinayta mayta k'amiwarqa:

¹² Runakuna kuraj kamachejpa contranpi oqharikushanku, nispa nejtinkoqa, ama chay nisqankuta kasuychejchu, nillataj mancharikunkichejchu paykuna imamantapis mancharikojtinkoqa.

¹³ Aswanpis Tukuy Atiyniyoj Tata Diosllata may llimphupaj qhawaychej. Payllata may jatun respetowan qhawaychej, payllatataj kasuychej.

¹⁴ Payqa qankunapaj pakakunaykichej wasi jina kanqa. Chaywanpis Israel suyupaj chantá Judá suyupaj rumi jina kanqa, chaypi misk'aspa urmanankupaj. Jerusalenpi tiyakojkunapajtaj ch'ipa jina, tojlla jinataj kanqa.

¹⁵ Ashkha runa chaypi misk'akuspa, urmaranqanku, chinkachisqataj kanqanku. Ashkhataj chay tojllapi urmaspa, ch'ipasqa qhepakonqanku, nispa.

Isaías yachachisqankunaman parlan

¹⁶ Tata Diospa kay kamachisqanta allinta waqaychaychej. Yachachisqanta sumajta jap'ikuychej, noqata qhatiwajkuna.

¹⁷ Noqaqa Tata Diospi atinikuspa suyakusaj. Payqa Jacobpa mirayninmanta t'aqakun chaypis, noqa paypi suyakusaj.

¹⁸ Noqawan, Tata Diospa qowasqan wawaykunawan ima israelitakunapaj t'ukuna señal jina kayku, Tukuy Atiyniyoj Tata Diospa churasqan, pichus Sión orqopi tiyakun, chaypata.

¹⁹ Sichus runakuna nisonqachej: Tapuriychej aysirikunata, chhichinakuspa parlaj layqakunata ima, nispa chayqa, niychej: Manachu runaqa Diosnillanta tapurikunmanri? Wañusqakunatachu kawsajkunamanta tapurikunkumanri? nispa.

²⁰ Chayrayku Tata Diospa yachachisqanta mask'aychej. Sichus mana Diospa yachachisqanman jina parlanku chayqa, paykuna pantaypi kashanku.

²¹ Paykunaqa kayman jaqayman puriykachanqanku, phutiypa jarap'asqan, yarqhasqataj. Chay jina yarqhasqa kaspa, paykuna mayta phiñakonqanku. Kuraj kamachejninkuta, Diosninkutapis maldicenqanku, makinkuta janajman oqharispa.

²² Jallp'ata qhawarispataj, rikonqanku llakiyllata, laqhayayllata, may waqaytataj. Jinataj tuti laqha ukhuman wijch'usqa kanqanku.