Isaías 7 - DIOSPA QHELQACHISQIsaías Ajazman Diosmanta sut'inchan 1 Ajaz karqa Uziaspa allchhin jinataj Yotanpa churin. Pay Judapi kamachishajtin, Siriata kuraj kamachej Resinwan, Israelta kuraj kamachej Pecaj, pichus Remaliaspa churin karqa, chaypiwan Jerusalenman kachaykukorqanku maqanakuspa jap'inankupaj. Chaywanpis mana chay llajtata atipayta aterqankuchu. 2 Chaypacha wakinkuna Judata kuraj kamachej Ajazman willamorqanku: Paykunaqa Siriamanta kajkunawan, Efrainmanta kajkunapiwan ujchakunku, nispa. Chayta uyarispa, kuraj kamachej Ajaz, runankunapiwan maytapuni kharkatiterqanku, imaynatachus sinch'i wayra sach'akunata kuyuchin, ajinata. 3 Chantá Tata Dios Isaiasta nerqa: Qanwan, churiyki Sear Yasubwan ima kuraj kamachej Ajazta taripamuychej, Pata Estanquej larq'anpa tukukuyninpi, maynintachus P'acha T'ajsanaman ñan rin, chay qayllapi. 4 Jinaspataj, payta niy: Allinta qhawakuy, amataj llakikuychu. Ama manchachikuychu, nitaj q'ewakuychu chay iskay q'oshñillajña k'aspikunamantaqa: Siriata kuraj kamachej Resín, Remaliaspa churin Pecaj ima, chaykunamanta. 5 Siriamanta kajkunawan, Efraín suyumanta kajkunawan, Remaliaspa churinwan ima qanpa contraykipi oqharikushanku, nishankutaj: 6 Judajpa contranpi rinachej. Paykunata mancharichimuspa, suyunkuta jap'ikapunachej, chaymantaj Tabelpa churinta kuraj kamachej kananpaj churasunchej, nispa. 7 Chaywanpis Tukuyta Kamachej Tata Dios nin: Chay yuyasqankoqa mana jinachu kanqa, nitaj jayk'ajpis junt'akonqachu. 8 Siriaj jatun llajtanqa Damasco, Damascoj kuraj kamachejnintaj Resín. Chaywanpis Efrainqa sojta chunka phishqayoj watamanta manaña suyuchu kanqa. 9 Efraín suyoj jatun llajtanqa Samaria. Remaliaspa churin Pecajtaj Samariaj kuraj kamachejnin. Sichus qankuna mana chayta jap'ikunkichejchu nitaj sinch'ita sayankichejchu chayqa, mana unaytachu qhepakunkichej, nispa. Isaiasqa Emanuel paqarinanmanta sut'inchan 10 Chantá Tata Dios Ajazman nillarqataj: 11 Diosniyki Tata Diosmanta uj señalta mañakuy, ukhu pachamanta chayrí janaj pachamantapis kachun, nispa. 12 Ajaztajrí kuticherqa: Mana señalta mañakuymanchu, nitaj Tata Diosta mat'ikuymanchu ruwanantapuni yachayta munaspa, nispa. 13 Chantá Isaías nerqa: Davidpa mirayninmanta kajkuna, uyariychej: Qankunapaj runakunata phiñacheyqa pisichu, Diosniytapis phiñachiyllatataj munanaykichejpaj? 14 Chayrayku kikin Tukuyta Kamachej Diosllamin uj señalta rikuchisonqachej. Uyariwaychej, qharej mana chayasqan sipas wijsallikonqa, paqarichikuspataj, wawanta “Emanuel” sutichanqa. Chay suti niyta munan “Dios noqanchejwan kashan”. 15 Chay wawaqa ñojñuta, abeja misk'itawan mikhonqa, allin kajta mana allin kajta ajllayta yachanankama. 16 Chantá wawa manaraj yuyayninman chayashajtin, pikunatachus manchachikushanki, chay iskay kuraj kamachejkunaj suyunkukunaqa ch'innejman tukuchisqa kanqanku. 17 Chay qhepamanrí Tata Dios jatun llakiykunata apachimusonqa qanman, aylluykiman, tataykej ayllunman ima. Chay jina llakiykuna ni jayk'aj karqachu, Efraín ayllu Judá suyumanta t'aqakusqanmantapacha. Tata Dios Asiriaj kuraj kamachejninta contraykipi kachaykamusonqa. 18 Chaypacha Tata Dios silbarispa, Egipto karu mayukunamanta, chantá Asiriamanta ima soldadokunata wajyanqa. Chaykunataj ch'uspi jina chayrí abeja jina aywirispa muyuykusonqanku. 19 May chhika soldadokuna jamuspa, tiyakonqanku ch'in wayq'okunapi, chhanka jusk'ukunapi, khishkarara ch'umikunapi, uywa ujyana qochakunapi ima. 20 Chaypacha Tukuyta Kamachej Dios Éufrates mayu chimpamanta Asiriaj kuraj kamachejninwan mañarisqa cuchillowan jina Israelta raphanqa tukuy jallp'anta, tukuy poqoyninta, chantá tukuy runankunata ima. 21 Chaypacha uj wakata iskay ovejatawan uywakoj runa 22 ashkha lecheta ch'awanqa. Chayrayku chay suyupi qhepakojkunaqa ñojñuta, abeja misk'itawan mikhonqanku. 23 Waranqa uva sach'ayoj jallp'a, mayqenchus waranqa qolqe valej, chaypacha khishkarara ch'umi chayman junt'aykonqa. 24 Jinallataj runakuna flechana arcowan k'ita animalkunata jap'ejlla yaykonqanku, chay tukuynin jallp'ankuman khishkarara ch'umi junt'aykusqanrayku. 25 Ñawpajta huertakuna kaj kanku, chayman ni pi riyta munanqachu, imaraykuchus khishkarara ch'umiwan junt'a kanqa. Chay kanqa wakakunata, ovejakunata, cabrakunata michinallapajña. |
Revisión Biblia Quechua Boliviano © Sociedad Bíblica Boliviana, 2017.
Bolivian Bible Society