Isaías 6 - DIOSPA QHELQACHISQ

Tata Dios Isaiasta wajyan

¹ Kuraj kamachej Uziaspa wañupusqan watapi, noqaqa Tukuyta Kamachej Diosta chhika patapi sumaj kamachinan tiyanapi tiyashajta rikorqani, may jatunchasqata. P'achanpa kantuntaj Templonman junt'aykorqa.

² Paypa patanpitaj serafinkuna phawasharqanku. Sapa ujninku sojta lijrayoj karqa: Iskay lijrankuwan uyankuta pakakorqanku, iskaywantaj chakinkuta, iskaywantaj phawasharqanku.

³ Chantá purajmanta ninakusharqanku: Tukuy Atiyniyoj may llimphu, llimphu, llimphu Tata Diosqa. Tukuy kay pacha jatun kayninpa lliphipiyninwan junt'a kashan, nispa.

⁴ Chay jinata qhaparisqankuwan Temploj punkunkuna thalarikorqa, chay ukhumantaj q'oshñi junt'aykorqa.

⁵ Chantá nerqani: Ay, imanasajtaj? Kunanqa wañusajchari, imaraykuchus mana allin parlaj runa kaspapis, jinataj mana allin parlayniyoj runakunaj chawpinkupi tiyakushaspa, ñawiywan Tukuy Atiyniyoj Tata Diosta rikuni, nispa.

⁶ Chantá ujnin serafín ujllata noqaman phawamorqa, altarmanta tenazawan nina k'aja oqharisqa.

⁷ Chantá nina k'ajawan simiyman chayaykuchiwaspa, niwarqa: Kay nina simiykiman chayasqanrayku kunanqa juchayki pichasqaña, juchaykimantataj llimphuchasqa kanki, nispa.

⁸ Chaymantataj Tukuyta Kamachej Diosta tapojta uyarerqani: Noqamanta sut'inchananpaj pitataj kachasajri? Pitaj nisqanchejmanta willaj rinmanri? nispa. Chantá noqa nerqani: Noqa kaypi kashani, noqata kachaway ari, nispa.

⁹ Jinapi Tata Dios niwarqa: Rispa, kay jinata chay runakunaman willamuy: Allinta uyarispapis, mana yachakunkichejchu. Rikushaspapis, manallataj entiendenkichejchu, nispa.

¹⁰ Kay runakunaj sonqonkuta rumiyachiy, ninrinkutapis wisq'aykuy, ñawinkutapis ñawsayachiy. Ajinamanta ñawinkuwan mana rikonqankuchu nitaj ninrinkuwan uyarenqankuchu, manallataj entiendenqankuchu. Ajinamanta mana noqaman kutirikamonqankuchu qhaliyachisqa kanankupaj, nispa.

¹¹ Noqarí taporqani: Tukuyta Kamachej Dios, mayk'ajkamataj ajina kanqari? nispa. Paytaj niwarqa: Kayqa llajtankukuna chinkachisqa kanankama kanqa, mana uj runayoj nitaj wasiyoj ni piniyoj kanankama, campopis ch'inpacha qhepakunankama.

¹² Kay kanqa Tata Dios runakunata karuman wijch'usqata apachinankama, chay suyunkutaj ch'inpacha kanankama.

¹³ Sichus chunkamanta ujllapis kay suyupi qhepakunman chayqa, chaypis chinkachisqallataj kanqa. Chaywanpis imaynatachus roble sach'ata, encina sach'atapis k'utojtinchej k'ullullanña qhepakun, ajinata qhepakonqa ajllakusqay Israel aylloqa, nispa.