Isaías 59 - DIOSPA QHELQACHISQ

Israel juchallikusqanta rimarin

¹ Uyariychej, Tata Diospa atiynenqa mana pisiyapunchu kacharichisuyta atinanpaj, manataj ninrinpis joq'arayapunchu mana uyarisuyta munananpaj.

² Manachayqa qankunaj mana allin ruwasqaykichejmin Diosniykichejmanta karunchasunkichej. Juchaykichejraykutaj payqa qankunamanta karunchakun ama uyarisunaykichejpaj.

³ Qankunaj makiykichejqa yawarlla, ruk'anaykichejpis millayta ruwanawan ch'ichichasqa kashan. Simiykichejqa llullata parlan, qalluykichejtaj millay kajllata rimarin.

⁴ Mana pipis justiciata munajqa kanchu, nitaj pipis juezpa ñawpaqenpi llimphu sonqowan parlarinchu. Manachayqa qhasi manakajllapi atinikunku, llullata parlaspa. Millay kajllata ruwayta yuyaychakunku, chantataj juchallillankupuni.

⁵ Katari runtukunata ojllanku, mik'u mik'u llikhatataj ruwanku. Pichus chay runtuta mikhojqa wañonqa. Chay runtuta q'allpirejtinku, katari uñakuna llojsimonqanku.

⁶ Mik'u mik'oj llikhanmanta awasqa p'achaqa churakunapaj mana walejchu, nitaj ruwasqankoqa ni imapajpis allinchu. Millay kajta ruwaspa purinku, kallpapi atinikuspataj, mana allin kajllata ruwanku.

⁷ Chakinkoqa mana allin ruwayllaman paykunata apan, paykunataj usqhayta rinku mana juchayojta wañuchinankupaj. Paykunaqa juchallispa puriyllapipuni yuyanku. Maymanchus risqankupeqa ñak'ariyta, waqanatawan apanku.

⁸ Paykunaqa allinpi kawsakuyta mana rejsinkuchu, kawsayninkupitaj cheqan kajta ruway mana kanchu. Purinanku ñanqa wist'ulla, chay mana allin ñanpi paykunata qhatejtaj allinpi kawsayta mana tarenqachu.

⁹ Chayrayku, justiciaqa noqanchejmanta chinkarin, manataj cheqan kayqa taripawanchejchu. K'anchayta suyanchej, chaywanpis laqhalla tiyan. Sut'iyamunanta suyaspapis, laqhallapipuni purinchej.

¹⁰ Ñawsa jina perqata llojchispa purinchej, mana ñawiyojpis kasunman jina. P'unchaypacha tutapis kanman jina misk'akunchej. Kallpanchejpiraj kashaspapis, wañusqa jina kashanchej.

¹¹ Tukuyninchej jukumari jina qhaparinchej. Urpi jina uy, uy, nispa waqanchej. Justicia kananta suyanchej, manataj tarinchejchu. Kacharichisqa kanapis noqanchejmanta karunchakun.

¹² Juchanchejqa Tata Diospa ñawpaqenpi manchay ashkha, juchallanchejtaj mana allin kasqanchejmantata ch'ataykuwanchej. Mana allin kajta ruwasqanchejqa qhatiykachawanchej, yachanchejtaj juchayojpuni kasqanchejta.

¹³ Kay jinata juchallikorqanchej: Tata Diospa contranpi oqharikorqanchej, payta wasancharqanchej, paymantataj karunchakorqanchej. Chantá runa masinchejta ñak'arichejkunata astawan kallpacharqanchej, kawsaqenta wasanchajkunatataj yanaparqanchej. Sonqonchejpitaj llullakuyta wakicherqanchej, chaytataj parlarqanchej.

¹⁴ Justiciaqa pisipaj qhawasqa, cheqan kajtaj karupi kashan. Cheqan kajta ruwayqa mana maypi kanchu. Manataj munanchejchu maychus kajta ruwanata.

¹⁵ Ch'uwa sonqo kayqa chinkapun, pichus mana allin kajta ruwanata saqepojmantataj, tukuy imanta qhechuspa apakapunku. Chayta rikuspa, Tata Dios phiñakorqa, manaña justicia kasqanrayku.

¹⁶ Chaypacha Tata Dios t'ukorqa mana ujllapis ñak'arichisqa runata yanaparej kasqanmanta. Chayrayku pay kikin atiyninwan paykunata kacharicherqa, justiciantaj payta sumajta sayacherqa.

¹⁷ Cheqan kajta ruwaywan sumajta p'achallikorqa, fierro pecherawan jina. Paykunata qhespichiyta munanatataj monterata jina umanman churakorqa. Vengakuyta munanawan p'achata jina churakullarqataj, sinch'i phiñakuywantaj mantawan jina qhataykukorqa.

¹⁸ Ajinata wakichikorqa awqankunaman ruwasqankuman jina qopunanpaj. Mayta phiñakuspa tukuy awqankunata, mama qocha kantupi tiyakojkunatawan jasut'enqa.

¹⁹ Inti yaykuynejpi tiyakojkunaqa Tata Diosta manchachikonqanku. Jinallataj inti llojsimuynejpi tiyakojkunapis Tata Diosta jatunchanqanku, imaraykuchus payqa ashkha mayu yaku jina manchayta llump'irimonqa, sinch'i wayraj apamusqan.

²⁰ Tata Dios nin: Preciota pagaspa kacharichejqa Sión llajtaman jamonqa, Jacobpa ayllunmanta pikunachus noqaman juchankumanta kutirikojkunata kacharichinanpaj, nispa.

²¹ Tata Dios nillantaj: Kay tratota paykunawan ruwasaj: Qankunaman qosqay Espíritu, simiykichejman churasqay nisqay ima qankunamanta mana karunchakonqachu, nitaj wawaykichejkunamanta, nillataj allchhiykichejkunamantapis, kunanmanta wiñaypaj, nispa.