Isaías 57 - DIOSPA QHELQACHISQ

Lanti yupaychajkuna juchachasqa kanqanku

¹ Cheqan kaj runakuna wañupojtinku, mana pipis paykunamanta yuyarikoj kanchu. Manataj pipis entiendenchu Dios paykunata pusakapusqanta, ama llakiypi ñak'arichisqa kanankupaj.

² Paykuna wañuspa, allinpi kayman ripunku. Diospa ñawpaqenpi cheqanta purejkunaqa wañuspa, samarikuyta tarinku, nispa.

³ Chantá Tata Dios nillantaj: Qankuna layqa warmej wawankunarí, kayman jamuychej. Qankuna, pichus warminta wasanchaj qharimanta, phisu warmimantawan mirajkuna, jamuychej.

⁴ Pimantataj qankuna alqochakushankichejri? Pejpa contrantataj leqhopayaspa parlankichej, pimantaj qalluykichejtapis sik'inkichejri? Manachu qankunaqa contraypi oqharikojkunaj wawanku kankichej, llullakojkunaj mirayninkutaj?

⁵ Qankunaqa thansa sach'a urapi lantiykichejkunata yupaychaspa, khuchiriyokunata ruwankichej. Jinallataj vallekunapi, qaqa jusk'upi wawaykichejta uywa ñak'asqata jina q'olachinkichej.

⁶ Jerusalén llajta, qanqa wayq'omanta llusk'a rumikunata yupaychayta munanki. Arí, chaypi qanpaj tiyan uj cheqa yupaychanaykipaj. Chay rumikunaman qanqa vinowan ch'allanki, chaymantaj ch'aki mikhuy jaywanata jaywanki. Noqarí chay millay ruwasqaykimanta ch'inllachu kakusaj?

⁷ Jatuchaj orqo patapi khuchichakunaykipaj puñunata wakichikamunki. Chaykama wicharinki uywa ñak'asqata q'olachispa jaywanaykipaj.

⁸ Wasi punkoj wasanpi, sayantakunapi ima lantita yuyarikunayki imakunatapis churallankitaj. Noqamanta karunchakuytawan, q'arakuspa jatun puñunaykipi pitachá munakunki, chaywan puñuykorqanki. Lantiykej qayllanpitaj khuchichakunayki runakunawan tratota ruwarqanki.

⁹ Sumajta k'achanchakorqanki, sumaj q'apashaj jawinawan jawiykukuspataj, Moloc lantiman rerqanki. Kachaykikunata karuman kacharqanki, ukhu pachakamataj paykunata urayk'ucherqanki, waj dioskunata mask'apusunankupaj.

¹⁰ Chay chhikata purisqaykipi qan sayk'orqanki. Chaywanpis mana nerqankichu: Kayqa yanqhalla, nispa. Aswanpis watej kallpachakorqanki, chayrayku imatachus ruwanaykita mana saqerqankichu.

¹¹ Chay lantikunatachu manchachikunki? Paykunachu chay jinatapuni kharkatitichisunku ajinata wasanchanawaykipaj, noqamantataj qonqapuspa mana yuyarikunaykipaj? Noqa unayta ch'inlla kasqayraykuchu, qan manaña manchachikuwanki?

¹² Kunan noqa sut'iman orqhosaj ruwasqaykita, imatachus cheqan kasqanta yuyanki, chayta. Chaywanpis chayqa mana yanapasonqachu.

¹³ Yanapanayta mañakuspa qhaparejtiyki, chay tantasqayki lantikunamin librasuchunku. Chaywanpis paykunata wayralla aparanqa, uj phukuyllawan chinkarichisqa kanqanku. Pichus noqapi atinikojrí, kay jallp'ata chayaqenpaj jap'enqa, noqapaj t'aqasqa orqopitaj tiyakonqa, nispa.

Tata Diosqa Israelta sonqochan

¹⁴ Tata Dios nillantaj: Ñanta pichaychej. Ñanmanta rumikunata wijch'uychej aylluy chayninta karu suyumanta kutimpunanpaj.

¹⁵ Ajinata patapi kaj wiñaypaj kawsaj Tata Dios nini, May Llimphu Kaj sutiyoj Dios: Noqa patapi tiyakuni, may llimphu cheqapi. Jinallataj llamp'u sonqoyojwan, k'umuykojwan ima kashani, k'umuykoj sonqoyojkunata, sonqo p'akisqakunatapis kusichinaypaj.

¹⁶ Mana wiñaypajchu aylluyta juchachasaj, nitaj wiñaypaj phiñakusajchu. Sichus wiñaypaj phiñakuyman chayqa, ruwasqay runakuna ñawpaqeypi q'enaqakunkuman.

¹⁷ Israel millay ruwayta munapayasqanrayku noqa phiñakorqani. Chayrayku payta sinch'ita jasut'erqani, phiñakuyniypitaj payta saqerparerqani. Jinapis pay mana kasuwaspa, sonqonpa munasqanta ruwallarqapuni.

¹⁸ Imaynatachus kawsasqanta rikuni. Chaywanpis noqa payta qhaliyachisaj, pusaykachaspataj sonqochasaj, kusichisaj ima.

¹⁹ Noqataj paykunata nisaj: Karupi kajkunapaj jinallataj qayllapi kajkunapaj allin kawsay kachun. Ajinata noqamin aylluyta qhaliyachisaj, nispa.

²⁰ Mana allinta ruwajkunarí sinch'i wayraj qhollchoqeyachisqan mama qocha jina kanku. Kayman jaqayman q'opata, t'urutapis wijch'un, nitaj tiyaykuyta atinchu.

²¹ Millayta ruwajkunapaj manallataj allin kawsay kanchu. Ajinata Tata Diosniy nin.