Isaías 53 - DIOSPA QHELQACHISQ

¹ Pitaj willasqaykuta jap'ikorqari? Pimantaj Tata Dios atiyninta rikucherqari?

² Kamacheyqa Tata Diospa ñawpaqenpi ijimoj sach'a jina wiñanqa, ch'aki jallp'api saphichakoj jinataj p'utumonqa. Mana k'achituchu kanqa, sonqonchej payman aysakunanpaj, nitaj k'acha uyayojchu kanqa payta munakunanchejpaj.

³ Runakuna payta qhesachanqanku, pisipajtaj qhawanqanku. Payqa imaymana nanaywan ñit'isqa kanqa, jinataj ñak'ariypi, llakiypi ima yachasqa kanqa. Payta wasanchaspa, wajnejta qhawasunchej. Payta qhesachasun manataj munakuywan qhawasunchu.

⁴ Chaywanpis payqa onqoyninchejta apanqa, nanayninchejtataj ñak'arenqa. Noqanchej yuyasunchej Diosmin payta jasut'ispa ñak'arichisqanta, maytataj k'umuykuchisqanta.

⁵ Chaywanpis pay k'irisqa kanqa noqanchej Tata Diosta mana kasusqanchejmanta, juchanchejraykutaj tukuy ukhun t'unasqa kanqa. Jinapis pay jasut'isqa kasqanrayku sonqo tiyaykuyta apamuwasunchej, ukhun chay jina khallasqa kasqanraykutaj qhaliyachisqa kasunchej.

⁶ Tukuyninchej ovejakuna jina ch'eqerapunchej, sapa ujtaj munasqanchej ñanta ririkapunchej. Tata Diostajrí tukuynin juchanchejta payman q'epirichenqa.

⁷ Payqa may jina maqasqa, ñak'arichisqataj kaspapis, mana imatapis parlarenqachu. Payqa cordero jina ñak'anaman apasqa kanqa. Imaynatachus oveja millmanta ch'inllamanta ruthuchikun, ajinata mana siminta kicharenqachu.

⁸ Payqa yanqhamanta presochasqa kanqa, paytataj juchachanqanku wañuchisqapuni kananpaj. Ni miraynillanpis kanqachu aswan qhepaman paymanta parlanankupaj. Ajinata payqa aylluypa juchanraykumin runa chawpimanta chinkachisqa kanqa.

⁹ Payqa mana ima juchatapis ruwanqachu, nitaj siminmanta llulla parlaypis llojsenqachu. Chaywanpis payta millay runakunawan khuska p'ampanqanku, jinapis qhapaj runaj covachanpi p'ampasqa kanqa.

¹⁰ Chay tukuywanpis, Tata Dios munanqapuni kamachin ñak'arichisqa, t'unasqataj kananta. Chay kamachitaj kikin kawsayninta jucharayku uywa ñak'asqa jaywanata jina jaywaykukonqa. Chayrayku payqa aswan qhepaman mirayninta rikonqa, wiñaypajtaj kawsanqa. Paynejtataj Tata Diospa munaynenqa junt'akonqapuni.

¹¹ Maypachachus pay rikonqa chay jina llakiyta ñak'arispa imatachus tarisqanta chaypacha, may sonqo junt'asqa kanqa. Cheqan kamachi chay jina ñak'arisqanwan ashkhata cheqanpaj qhawasqa kanankuta ruwanqa, imaraykuchus paykunaj juchankumanta jasut'isqa kanqa.

¹² Chayrayku payta atiyniyojkunawan khuska jatunchasaj. Jinataj atipajkunaj t'inkankuta jap'enqa, pay kikin wañuyman jaywaykukusqanrayku. Payqa juchasapakunawan khuska yupasqa kanqa. Tukuypa juchankuta apanqa, paykunaraykutaj Diosmanta mañaponqa.