Isaías 42 - DIOSPA QHELQACHISQ

Tata Diospa ajllakusqan Kamachin

¹ Kaymin noqaj kamachiy, pitachus noqa kallpachani, chay. Paymin ajllakusqayqa paywantaj may kusisqa kani. Chantá payman Espirituyta qoni, tukuy suyukunapaj justiciata ruwananpaj.

² Payqa mana qhaparenqachu, nitaj jatunmanta parlanqachu, manataj callekunapipis sinch'ita parlanqachu.

³ Lajrasqa soqosota mana p'akerparenqachu, nitaj ñak'ayllata lawrashaj mecherotapis wañuchenqachu. Manachayqa cheqan justiciata ruwanqa.

⁴ Payqa mana sayk'onqachu, nitaj iskayrayanqachu, tukuy kay pachapi justiciata sayachinankama. Mama qocha patapi suyukunapis imatachus yachachisqanta suyallanqankutaj.

⁵ Tata Dios janajta ruwaspa, jatunman mast'arerqa. Jinallataj kay pachatapis ruwarqa, chaypi tukuy ima kajkunatawan ima. Payllataj kawsayta runakunaman qon, chantá kay pachapi tukuy purejkunamanpis kawsayta qollantaj. Chay Diosmin kamachinta nin:

⁶ Noqa Tata Dios qanta wajyarqayki munayniyman jina cheqan kajta ruwanaykipaj. Makiykimanta jap'isqayki, noqataj waqaychasqayki. Qanta runakunawan trato ruwasqay kanaykipaj churayki, tukuy suyupajtaj k'anchay jina kanaykipaj.

⁷ Noqa wajyarqayki ñawsakunaj ñawinta qhawarichinaykipaj, carcelpi kajkunata orqhonaykipaj, laqha carcelpi presochasqa tiyakojkunata kacharichinaykipaj ima.

⁸ Noqa Tata Dios kani, chaymin suteyqa. Mana pitapis saqesajchu Diosta jina wajta jatunchanankuta. Nillataj munanichu Diosta jina lantikunata yupaychanankuta.

⁹ Ñawpajta imatachus sut'incharqani, chayqa junt'akunña, kunantaj watej sut'inchallasajtaj. Manaraj junt'akushajtin, imachus jamunanmanta willasqaykichej.

Tata Diosta jatunchanapaj takiy

¹⁰ Tata Diosman mosoj takiyta takiychej. Kay pachaj aswan karu k'uchunmantapacha payta yupaychaychej. Mama qochapi barcota purichejkuna, chay qochapi kawsajkuna ima payta yupaychaychej. Jinallataj mama qocha chawpipi kaj churukunapis, chaypi tiyakojkuna ima yupaychallaychejtaj.

¹¹ Ch'innejpi llajtakuna, jatunmanta takiychej, Cedarpi ranchokuna ima. Selapi tiyakojkunapis, kusiywan takirikuychej. Tukuy orqo patamanta may kusiywan qhaparimuychej.

¹² Tata Diosta jatunchaychej. Mama qocha kantupi llajtakunapis, payta yupaychaychej.

¹³ Tata Diosqa kallpasapa runa jina rikhurimonqa. Maqanakupi soldado jina phiñakonqa, manchayta qhaparispataj, awqanta atipanqa.

¹⁴ Tata Dios nin: Unayña noqaqa sonqoyta ñit'iykukuspa, ch'inlla karqani. Kunantajrí qhaparisaj, imaynatachus onqokushaj warmi nanaywan qhaparin, ansaqespataj ñak'ayllataña saman, ajinata.

¹⁵ Chantá noqa orqokunata, kinraykunata ima ch'inman tukuchisaj, chaypi q'omer kaj chhikatapis ch'akirachisaj. Mayukunata ch'aki pampaman tukuchisaj. Qochakunatapis ch'akirachillasajtaj.

¹⁶ Ñawsakunata mosoj ñanta pusasaj, jinataj mana rejsisqanku chaki ñankunata purichisaj. Ñawpaqenkupi kaj laqhayayta k'anchayman tukuchisaj, mana puriy atina ñantapis pampaman tukuchillasajtaj. Chaykunata noqamin ruwasaj, manataj paykunata saqerpayasajchu.

¹⁷ Lantikunapi atinikojkunarí, pikunachus metalmanta ruwasqa lantikunata ninku: Diosniyku kankichej, nispa, chaykunaqa p'enqaypi rikhurenqanku.

Israelqa manapuni wananchu

¹⁸ Qankuna, mana uyarejkuna, uyariychej. Qankunapis, ñawsakuna, qhawariychej, rikuychejtaj.

¹⁹ Pitaj chay ñawsari? Chay ñawsaqa kamachiy Israelmin. Mana pipis kachasqay jina joq'arachu, nitaj pipis ajllakusqay jina ñawsachu. Ajinamin qan kanki, kamachiy Israel.

²⁰ Tukuy imata qhawashaspapis, mana imatapis reparankichu. Uyariyta atishaspapis, mana imatapis uyarinkichu.

²¹ Tata Dios cheqan kayninrayku may jatun kamachisqanta jatuncharqa.

²² Chaywanpis wajkuna Israelta atipaykuspa, imanchus kaj chhikata qhechunku. Jinallataj wata runa kanapaj churanku, paykunata presochaspataj, carcelpi wisq'aykunku. Awqankoqa israelitakunawan munayninkuta ruwanku, nitaj pipis kacharichinanpaj kanchu. Paykunata wajnejman apakapunku, nitaj pipis paykunata kacharichej kanchu.

²³ Mayqenniykichejtaj chayta uyarenqari? Pitaj qhepaman imachus kananmanta uyarinanpaj jina kashanri?

²⁴ Pitaj Jacobpa mirayninta jaywaykorqa waj suyuman apasqa kanankupajri? Pitaj Israel suyumanta tukuy imanta qhechojpa makinman churaykorqari? Manachu Tata Dios chayta ruwarqa israelitakuna contranta juchallikusqankurayku? Paykunaqa mana Tata Diospa ñannintachu purerqanku, manataj kamachisqantapis kasorqankuchu.

²⁵ Chayrayku, paykunaj patankuman Tata Dios k'araj phiñakuyninta jich'amorqa, maqanakupitaj tukuracherqa. Tukuyninkutataj ninawan jap'iykucherqa. Chaywanpis paykuna mana unancharqankuchu, chay jinata ruphachishajtinpis, mana kasorqankuchu.