Isaías 40 - DIOSPA QHELQACHISQ

Tata Dios Jerusalenta sonqochan

¹ Qankunaj Diosniykichej nin: Sonqochaykuychej, Israel aylluyta sonqochaykuychej.

² K'acha simiwan Jerusalenman parlaykuspa, wata runa kananku tukukapusqanta niychej. Willallaychejtaj juchanku pampachasqaña kasqanta. Tata Diosqa chay juchankumanta uj jinatawan paykunata jasut'inña, nispa.

³ Uj runata kay jinata qhaparishajta uyarerqani: Tata Diospaj uj ñanta ch'innejpi kichaychej, ch'aki t'ojra jallp'apitaj Diosninchejpaj cheqan ñanta ruwapuychej.

⁴ Tukuy meq'ankunaman junt'achiychej, jinataj orqokunata, moqokunata ima pampachaychej. Wist'u kajta cheqanyachiychej. Moqo moqolla kajtapis pampachaychej.

⁵ Chantá Tata Diospa jatun kayninpa lliphipiynin rikhurenqa, tukuy runataj chayta rikonqanku, imaraykuchus chayta Tata Diospuni nin, nispa.

⁶ Uj runaj nisqanta uyarillarqanitaj: Qhapariy, nispa nejta. Noqataj nerqani: Imatataj qhaparisajri? nispa. Paytaj kutichiwarqa: Qhapariy tukuy runaj kawsayninku qhora jinalla kasqanta, jatun kayninkutaj pampa t'ika jinalla.

⁷ Qhoraqa ch'akipun, t'ikapis qawirapun, Tata Diospa samaynin phukurejtin. Runakunawanpis ajinallataj kanqa.

⁸ Qhora ch'akipun, t'ikapis qawirapun, Diosninchejpa simi nisqanrí wiñay wiñaynintinpaj sayallanpuni, nispa.

⁹ Sión llajta, sumaj willaykunata apamoj, orqo pataman wichariy. Jerusalenman sumaj willaykunata apamoj, mana manchachikuspa, jatunmanta qhapariy. Judá suyupi llajtakunaman chay jinata willay: Diosniykichej chayamushanña, nispa.

¹⁰ Tukuyta Kamachej Tata Dios jatun atiyninwan jamuspa, atiyniyoj makinwan tukuy imata k'umuykuchin. Payqa ayllunta kacharichiytawan, paykunata pusamushan.

¹¹ Ayllunta qhawanqa, imaynatachus uj michej ovejankunata michin, ajinata. Corderokunata makinpi marq'arikonqa, uñachakojtataj alliyllawan pusanqa.

Israelpa Diosnin jinaqa mana waj kanchu

¹² Pitaj mama qochata midinanpaj ch'ulla makillanwan oqharinri? Jinallataj pitaj janajtapis mashkhachus kasqanta maki ruk'anallanwan medinmanri? Pitaj kay pachapi kaj chhika jallp'ata chimpuman churanri? Jinallataj pitaj romanawan jatuchaj orqokunata, chantá juch'uy lomakunatapis pesanmanri?

¹³ Pitaj Tata Diospa Espiritunta yuyaychanman, chayrí yuyaychaspa yachachinmanri?

¹⁴ Tata Dios pimantapis yachayta mañakorqachuri? Pitaj payman cheqan justiciata ruwananpaj yachachinri? Pitaj payman ima jatun yachaykunamantapis yachachinri? Pitaj payman yuyaychan chay jina yuyayniyojpuni kanantari?

¹⁵ Tata Diospajqa tukuy suyu uj sut'oj yaku jinalla kanku, chayrí balanzapi ñut'u jallp'a jinalla. Mama qochapi churukunatapis ñut'u jallp'ata jinalla chinkarpachin.

¹⁶ Libanopi llant'aqa ninata enqhanapaj mana wakinmanchu, nillataj tukuy uywakunapis wakinmanchu, Tata Diospaj jina q'olachinata jaywanapaj.

¹⁷ Tata Diospa ñawpaqenpi tukuy suyoqa mana imachu kanku, tukuyninkutaj manapis kankumanchu jinalla kanku.

¹⁸ Tata Diosta imawantaj rijch'anachisunmanri? Chayrí imaynatataj lantita payman rijch'akojta ruwasunmanri?

¹⁹ Lantita ruwaj runaqa ninapi metalta unuyachispa, lantita jich'an. Qoriwan k'achanchayta yachaj runataj chay lantita qoriwan lluch'in, qolqe metalmanta cadenakunatapis ruwapullantaj.

²⁰ Wajcha runaqa mana chay jina lantita ruwayta atispa, mana mullphaj k'ulluta oqharikun. Chaymantataj lantita sumaj ruwayta yachajta mask'an, chay k'ulluta llajllaspa sinch'ita sayaj lantita ruwapunanpaj.

²¹ Chaywanpis manachu yachankichej? Nitajchu imatachus Dios nisqanta uyarerqankichej? Manachu willasorqachej qallariymantapacha imachus kasqantari? Manachu kayta pipis yachachisorqachej kay pacha ruwakusqanmantapacha?

²² Tata Diosmin kay pachamanta aswan patapi tiyasqa kashan. Chaymantapacha qhawarimuspataj, runakunata phinki phinkikuna jinallata rikumun. Payqa janajtapis toldota jina aysan, imaynatachus runa tiyakunan toldota aysan, ajinata.

²³ Tata Diosqa atiyniyoj runakunata manakajman tukuchin. Kay pachapi kamachejkunatapis manapis kankumanchu jinaman tukuchillantaj.

²⁴ Paykunaqa chaypachallaraj mallkisqa sach'aman rijch'akunku, manaraj allinta saphichakoj sach'aman. Tata Dios wayrachimojtinrí, paykuna ch'akipunkupacha, muyoj wayrataj q'opata jina paykunata apakapun.

²⁵ May Llimphu Kaj Dios tapurin: Piwantaj rijch'anachiwankichejmanri? Pitaj noqa jina kanmanri? nispa.

²⁶ Janajta qhawariychej. Pitaj chay tukuy ch'askakunata ruwarqari? Tata Dios, pichus chaykunata ujmanta uj orqhomuspa yupan, tukuyninkutataj sutinkumanta wajyan, chay. Payqa tukuy atiyniyoj, tukuy kallpayojtaj, chay jinapuni kasqanraykutaj mana ujpis makinmanta chinkanchu.

²⁷ Jacobpa ayllun Israel, imaraykutaj rimaspa kay jinata parlankichej: Tata Diosqa imaynatachus kawsasqanchejta mana rikuwanchejchu? Llakikusqanchejmantataj mana khuyarikunchu, nispari?

²⁸ Manachu jayk'aj yacharqankichej? Manallatajchu uyarerqankichej? Tata Diosqa wiñay wiñaypaj kawsaj Diosmin. Jinallataj tukuy kay pachatapis paymin ruwarqa. Payqa mana llawch'iyanchu, nitaj sayk'unchu. Paypa yuyasqantaqa mana pipis yachayta atinmanchu.

²⁹ Manachayqa Tata Dios sayk'usqakunata kallpachan, pisi kallpayojmanpis kallpata qon.

³⁰ Waynakunaqa llawch'iyanku, sayk'upunkutaj. Aswan sinch'i kallpayojkunapis sayk'upuspa, urmapunku.

³¹ Tata Diospi atinikuspa suyakojkunarí watej mosoj kallpayoj kanqanku. Paykunaqa anka jina phawanqanku, t'ijurispapis mana sayk'onqankuchu, karuta purispapis, mana llawch'iyanqankuchu.