Isaías 15 - DIOSPA QHELQACHISQ

Moab suyoj contranpi sut'inchay

¹ Moab suyoj contranta Isaías kay jinata sut'incharqa: Uj ch'isilla Moab suyupi Ar llajta chinkachisqa kanqa, jinallataj Quir llajtapis laqayaman tukuchisqa kanqa.

² Dibón llajtamanta kajkunaqa loma patapi diosninkuta yupaychana wasikunaman waqaj wicharerqanku. Moabmanta runakunataj Nebo llajtarayku, Medeba llajtaraykutaj waqarikunku. Chayrayku runakunaj chujchanku, sunkhankuwan ima ruthusqa kashan.

³ Runakunaqa qhashqa p'achayoj callekunapi purinku, wasi pataman, plazakunaman llojsinku paran paranta waqarikuspa.

⁴ Jesbonwan, Elealewanpis maytapuni qhaparinku, chay qhaparisqankutaj Yahaskama uyarikun. Chayrayku Moabmanta wapu soldadokunapis maytapuni mancharikuywan qhaparinku.

⁵ Moab suyurayku mayta llakikuni, runankunaqa Soarkama chantá Eglat Selisiyakama ayqekunku. Luhit wichaynejta waqarikuspa wicharinku, Joronayinman rina ñanpitaj may jina llakiyta qhaparikunku chinkachisqa kasqankumanta.

⁶ Nimrín pujyupi yakupis ch'akipun. Pastopis ch'akirapullantaj. Qhorapis ch'akipun manañataj ima q'omerpis kanñachu.

⁷ Chayrayku runakunaqa kapuyninkuta Sauce Wayq'oj chimpanman astanku.

⁸ Chay jinata runakunaj qhaparikusqanku Moab suyoj mojonninkama uyarikun, waqasqankutaj Eglayinkama chayan, Ber Elimkama ima.

⁹ Dimón qayllapi yakupis yawarwan junt'a kashan. Chaywanpis aswan llakiytaraj Dimón llajtaman apachimusaj. Leonkunaqa Moabmanta ayqekushajkunata mikhonqanku, jinallataj chay suyupi qhepakojkunatapis.